The Phnom Penh Post Search

Search form




Logo of Phnom Penh Post newspaper Phnom Penh Post - ខែ​វស្សា​សម្រស់​ទំនប់​ចិន ​រឹត​តែ​ស្អាត​ទាក់​ចិត្ត​ភ្ញៀវ​

ខែ​វស្សា​សម្រស់​ទំនប់​ចិន ​រឹត​តែ​ស្អាត​ទាក់​ចិត្ត​ភ្ញៀវ​

Content image - Phnom Penh Post
ទេស​ភាព​ទំនប់​ចិន​ មាន​ជម្រៅ​ទឹក​រាក់​ល្មម​លេង​កម្សាន្ដ និង​មាន​ខ្សាច់​លាយ​ថ្ម​បាយ​ក្រៀម​ក្រាល​បាតទឹក​។ ធិក កល្បាណ

ខែ​វស្សា​សម្រស់​ទំនប់​ចិន ​រឹត​តែ​ស្អាត​ទាក់​ចិត្ត​ភ្ញៀវ​

សៀមរាប: ជាមួយ​កម្ទេច​ថ្មបាយ​ក្រៀម​តូចៗ លាយ​ឡំ​ដីខ្សាច់​សក្បុស​ក្រាល​បាត​ទឹក ព្រៃភ្នំ​ពណ៌​បៃតង​ស្រស់​ព័ទ្ធ​ជុំវិ​ញ ទឹក​ហូរ​ថ្លា​ឈ្វេង ត្រជាក់​ស្រេង ហូរ​រលេញ គួរ​ឲ្យចង់​ហែល​លេង។

ទិដ្ឋភាព​ទាំង​អស់​នេះ លោកអ្នក​មិនអាច​ហាម​អារម្មណ៍​ខ្លួនឯង​មិន​ចុះ​ងូត​ក្នុង​ទំនប់​ប្រ​ឡាយ​ទឹក​មួយ​ដែល​អ្នក​ភូមិ​នៅទី​នោះ​និយម​ហៅថា «ទំនប់​ចិន» ក្នុង​ខេត្ត​សៀមរាប​នេះ​បានទេ។

ខ្យល់​ភ្នំ​បក់​រវិចៗ សំឡេ​ង​ទឹកហូរ​ឮសូរ​រងំ អាច​នឹង​កំពុង​សណ្តំ​អារម្មណ៍​អ្នក​ទេសចរ​ទាំងឡាយ​ដែលខំ​ចំណាយ​ពេល​ធ្វើ​ដំណើរ​តាម​ដងផ្លូវ​ជាង ១ ម៉ោង ឲ្យ​ជាប់​ចិត្ត​ទៅនឹង​សម្រស់​បែប​ធម្មជាតិ​របស់​ទំនប់​ប្រឡាយ​នេះ ខណៈ​ទំនប់​ចិន មាន​ទឹក​ពេញ​ព្រៀប​ និង​មាន​សភា​ពថ្លា​ឆ្លុះ​ដល់​បាត​ថ្ម ក្នុង​រដូវ​វស្សា​នេះ ។

អ្នក​ស្រី បៀម ភ័ណ្ឌ អាយុ ៤០ ឆ្នាំ ជា​ប្រជាជន​ដែល​រស់នៅ​ក្នុង​ភូមិ​ភ្នំ​ណាក់​ដំរី ឃុំ​ស្លែង​ស្ពាន ស្រុក​ស្រីស្នំ បាន​មាន​ប្រសាសន៍​ថា «ទំនប់​ចិន» នេះ​បាន​សាងស​ង់ឡើង​ដោយ​ចិនក្នុង​ឆ្នាំ ២០១២ ហើយ​ទើបតែ​សាង​សង់​រួចរាល់​ជា​ស្ថាពរ​កាលពី​ឆ្នាំមុន​ និង​មាន​ចម្ងាយ​ប្រមាណ​ជាជាង ៩០ គីឡូ​ម៉ែតពី​ទីរួម​ខេត្ត​សៀម​រាប។

បើទោះ​ជា​ទំនប់​នេះ​បាន​លាក់​ខ្លួនពួន​អាត្មា​ក្បែរ​ព្រៃភ្នំ តែ​ផ្លូវ​សម្រាប់ធ្វើ​ដំណើរ​ទៅ​ដល់​ទីនោះ​ហាក់​ដូចជា​មិនសូវ​ពិបាក​ទេ ដោយ​មាន​ផ្លូវដី​ក្រហម​ចាក់​ចូល​ទៅដល់​ទំនប់​នេះ​តែម្តង។

ទំនប់​នេះ​មិន​ត្រឹមតែ​ជា​កន្លែង​កម្សាន្ត​សម្រាប់​ភ្ញៀវជាតិ​ ដែល​ចូលចិត្ត​រុករក​កន្លែង​លេង​បែប​ត្រជាក់​ត្រជុំ​នោះទេ វា​ថែមទាំង​ជា​ប្រភព​ទឹកដ៏​សំខាន់​សម្រាប់​ចែកចាយ​ទៅកាន់​ប្រឡាយ​តូចៗ សម្រាប់​ប្រជាជន​ក្នុង​ស្រុក​ស្រីស្នំ​នេះ​ទៀត​ផង។ អ្វីដែល​ពិសេស​ទៀត​នោះ ទំនប់​ចិន​ក៏សម្បូរ​ត្រី​ច្រើន​គួរ​សម​ដែរ។

Content image - Phnom Penh Post
ភ្ញៀវ​ទេសចរ​នាំ​គ្នា​ទៅ​ងូត​ទឹក​លេង​កម្សាន្ដ​នៅ​ទំនប់​ចិន ដែល​សម្បូរ​ភ្ញៀវ​បំផុត​នៅ​រដូវ​ភ្ជុំ។ រូប សហការី

អ្នកស្រី​រៀបរាប់​ថា៖ «ទំនប់​នេះ​ទើប​តែ​ធ្វើ​ហើយ​ឆ្នាំមុន តែមាន​មនុស្ស​មកលេង​ច្រើន​មែនទែន បើខែ​ភ្ជុំបិណ្ឌ​វិញ អត់​មាន​កន្លែង​ចត​ឡានទេ មិន​ដឹង​មក​ពីណា​ខ្លះ រាប់​ពាន់​នាក់ ដោយ​សារ​តែ​ខែវស្សា​ហ្នឹង ទឹក​ពេញ ហើយ​សប្បាយ​លេង ហើយ​ទឹក​ហ្នឹង​ក៏មិន​ជ្រៅ កន្លែង​ខ្លះ​ត្រឹម​ជង្គង់ កន្លែង​ខ្លះ​ត្រឹម​ចង្កេះ និង​កន្លែង​ខ្លះទៀត​ត្រឹម​ក ប៉ុណ្ណោះ។ តែ​សម្រាប់​ថ្ងៃ​ធម្មតា​ភាគច្រើន​មានតែ​ក្មេងៗ​ក្នុងភូមិ និង​ភូមិ​ក្បែរ​ហ្នឹង​ទេ ដែល​ទៅ​លេង»។

អ្នកស្រី​ថា៖ «ទីនេះ​ក៏​សម្បូរ​ត្រី​ណាស់ដែរ អ្នក​ភូមិ​ម្នាក់ៗ​អាច​រកបាន​ត្រី​ប្រមាណ​ជា ២ ទៅ ៣ គីឡូក្រាម​ក្នុង​មួយ​ថ្ងៃ»។

នៅ​តាម​ដងផ្លូវ​នៃ​ទំនប់​នេះ មាន​ថ្មដុំៗ​តម្រៀប​គ្នា​តាម​មាត់​ទឹក កៀក​បង្កើយ​នឹងដើម​ឈើ​​ដែល​ផ្តល់​ម្លប់​យ៉ាង​ត្រឈឹង​ត្រឈៃ ជា​កន្លែង​សំចត​ដ៏​ត្រជាក់​សម្រាប់​លោកអ្នក​ឈប់​បរិភោគ​អាហារ មុនពេល​ចុះលេង​ទឹក​កម្សាន្ត។

ទិដ្ឋ​ភាព​បង់​សំណាញ់​រកត្រី​របស់​អ្នកភូមិ ព្រៃភ្នំ​ដែល​ស្ថិត​នៅចំ​ពីមុខ ទំនប់​ដែលមាន​បណ្តោយ​ជាង ១ គីឡូ​ម៉ែត្រនេះ នឹង​ញ៉ាំង​ឲ្យ​ដំណើរ​កម្សាន្ត​របស់​លោក​អ្នក​កាន់តែ​មាន​ន័យ​បំភ្លេច​មិន​បាន។ ចំពោះ​អ្នក​ទីក្រុង ទិដ្ឋភាព​នេសាទ នេះពិត​ជា​ប្លែក​ភ្នែក​។

ក្រៅពី​អំឡុង​ពេល​បុណ្យភ្ជុំ​បិណ្ឌ នៅ​ទំនប់​នេះ មិនសូវ​មាន​អ្នកលក់​ម្ហូប​អ្វី​ច្រើន​ទេ។ ដូចនេះ​ប្រសិន​បើ​លោក​អ្នក​មាន​បំណង​ចង់​ឃើញ​ទិដ្ឋភាព​ទំនប់​ប្រឡាយ​ដែលមាន​ទឹក​ហូរ​មិន​ឈប់​នេះ លោកអ្នក​គប្បី​វេចខ្ចប់​បាយ​ម្ហូប​មកពី​ផ្ទះ​ ឬក៏​ឈប់​ទិញ​ម្ហូប​ និង​មាន់​អាំង​ដែល​ល្បី​ថាឆ្ងាញ់​នៅក្នុង​ផ្សារ​ស្រុក​ពួក ក៏​កាន់តែ​ប្រសើរ៕

អត្ថបទគួរចាប់អារម្មណ៍