កំពង់ឆ្នាំង: ជាវិថីតភ្ជាប់ខេត្ដកំពង់ឆ្នាំង ត្រង់ស្រុកជលគិរីទៅស្រុកព្រៃឈរខេត្ដកំពង់ចាម ទំនប់ទឹកស្ទឹងតាកុយ បានក្លាយជាគោលដៅកម្សាន្ដពេញនិយម ជាមួយការងូតទឹក ជិះទូក និងទស្សនាវាលទឹកល្ហល្ហាចព័ទ្ធដែនកោះតូចៗដោតរាយប៉ាយនារដូវវស្សា និងគយគន់វាលស្រែវាលស្រូវវែងអន្លាយឆ្ងាយសន្លឹមនារដូវប្រាំង។
ធ្វើដំណើរតាមច្រកផ្សារផ្អាវស្រុកបាធាយ ខេត្ដកំពង់ចាមប្រមាណ ៣០ គីឡូម៉ែត្រទៅដល់ខ្នងទំនប់ វាលទំនាបដើមផ្លូវប្រែជាអស់ទឹក និងជំនួសវិញជាមួយដំណាំស្រូវបៃតងស្រស់។ ភ្ជាប់ពីវាលស្រែធម្មជាតិបំព្រង វាលភក់ល្វឹងល្វើយត្រូវបានលើកជាភ្លឺទប់ទឹកដើម្បីត្រៀមរង់ចាំសំណាបសន្ទូងថ្មី។ មកដល់ដែនដីស្រុកជលគិរីនៃខេត្ដកំពង់ឆ្នាំង ទឹកហាក់នៅមានសភាពធំធេងភ្ជាប់ភូមិឋានក្បែរជើងភ្នំ។
ក្យូសតូចៗតម្រៀបគ្នាជាជួរប្របតាមច្រាំងលយលើផ្ទៃទឹក ជាទីឋានរង់ចាំស្វាគមន៍ភ្ញៀវជិតឆ្ងាយដែលមានបំណងមកកម្សាន្ដស្ទឹងតាកុយគ្រប់រដូវ។
លោក គង់ សុវណ្ណារិទ្ធ ក្មួយប្រុសម្ចាស់ហាង និងក្យូសក្បែរមាត់ស្ទឹងបាននិយាយថា ៖ «មានគេមកលេងទីនេះច្រើនជាពិសេសនៅថ្ងៃបុណ្យភ្ជុំ ដែលសម្បូរទឹកច្រើន។ ពួកគេជួលទូកជិះទៅតាមកោះដោយម្នាក់ចំណាយលុយបង់ថ្លៃទូកពី ៤០០០ ទៅ ៥០០០ រៀល។ មនុស្សម្នានាំគ្នាមកលេងទីនេះច្រើន ២-៣ ឆ្នាំនេះ»។
លោកបន្ដថា ៖ «នៅទីនេះ ពូរបស់ខ្ញុំមានលក់ម្ហូបអាហារ និងភេសជ្ជៈគ្រប់មុខទៅតាមការកុម្ម៉ង់របស់ភ្ញៀវ ហើយយើងមានក្យូសទាំងអស់ ១៦»។
អតិថិជនដែលកុម្ម៉ង់ម្ហូបនៅភោជនីយដ្ឋានគ្មានឈ្មោះ ដែលមានតែមួយគត់នៅលើខ្នងទំនប់នេះក៏អាចជួលក្យូសអង្គុយលម្ហែ និងទទួលទានអាហារវេចខ្ចប់ខ្លួនឯងក្នុងតម្លៃ ៥០០០ រៀលចំពោះក្យូស។
ដោយទទួលស្គាល់ថា វាជាទីឋានកំពុងពេញនិយម និងទាក់ទាញអ្នករស់នៅក្បែរខាង និងអ្នកដំណើរមកលេងជាហូរហែ ប្រធានមន្ទីរទេសចរណ៍ខេត្ដកំពង់ឆ្នាំង ក៏បានពោលសរសើរពីទេសភាពទំនប់ស្ទឹងតាកុយនេះផងដែរ។
លោក សេង សាលី ប្រធានមន្ទីរទេសចរណ៍ខេត្ដកំពង់ឆ្នាំងបាននិយាយថា៖ «ពេលទឹកឡើង ភ្ញៀវទៅលេងកម្សាន្ដដោយងូតទឹក និងជិះទូក។ វាស្រស់ស្អាតហាក់បីដូចជាសមុទ្រទឹកសាបដែលព័ទ្ធជុំវិញដែនកោះតូច»។
រដូវកាលផ្លាស់ប្ដូរទឹកធ្លាប់តែធំល្វឹងល្វើយនារដូវវស្សាក៏ចាប់ផ្ដើមស្រកចុះបន្ដិចម្ដងៗ ខណៈប្រជាពលរដ្ឋផ្ដើមធ្វើស្រូវប្រដេញទឹក។ បច្ចុប្បន្ននេះ ទិដ្ឋភាពផ្ទៃទឹកទាំងសងខាងទំនប់ត្រូវបានជំនួសបន្ដិចម្ដងៗដោយវាលស្រែ ដែលជាទស្សនីយភាពមួយប្លែកភ្នែកសម្រាប់ភ្ញៀវផងដែរ។
លោក សេង សាលី បានបន្ដថា៖ «បើ នៅរដូវប្រាំងនេះ វាប្រែក្លាយជាវាលស្រែប្រាំងរបស់ប្រជាកសិករទាំងអស់»។
លោក គង់ សុវណ្ណារិទ្ធ បានប្រាប់ថា មិនយូរប៉ុន្មានទៀត ក្នុងខែធ្នូនេះបរិវេណទាំងអស់នេះ នឹងប្រែក្លាយជាវាលស្រែទាំងអស់។ ប៉ុន្ដែភ្ញៀវក៏នៅតែបន្ដអង្គុយលេង និងគយគន់វាលស្រែធំធេងទៀត។
ពេលមកកម្សាន្ដនៅទំនប់នេះ កុំភ្លេចបង្ហួសដំណើរទៅដល់ទីរួមស្រុកជលគិរីទស្សនាផ្សារអ្នកស្រុក និងមើលទូកចម្លងសម្រាប់អ្នកចង់ធ្វើដំណើរទៅទីរួមខេត្ដកំពង់ឆ្នាំងដោយឆ្លងកាត់បឹងទន្លេសាបដែលមានរយៈពេលប្រមាណ ២ ម៉ោង។
ទំនប់ទឹកស្ទឹងតាកុយ ដែលតភ្ជាប់ស្រុក ២ នៃខេត្ដកំពង់ឆ្នាំង និងខេត្ដកំពង់ចាម ស្ថិតក្នុងឃុំព្រៃគ្រី ស្រុកជលគិរី ខេត្ដកំពង់ឆ្នាំង៕
វីដេអូ៖