ក្រុងព្រះសីហនុ: ឆ្នេរតាបារាំង រំលេចស្ពានលយចូលផ្ទៃសមុទ្រ បណ្ដែតលើឆ្នេរចោលសម្រស់ខ្សាច់សក្បុសដូចពពក កំពុងអន្ទងចិត្ដភ្ញៀវទេសចរប្រាថ្នាមកលេងទីឋានដ៏ស្រស់ត្រកាល ដែលផ្ដើមល្បីខ្លាំងតាមបណ្ដាញសង្គមហ្វេសប៊ុក។
ស្ថិតក្នុងភូមិរិទ្ធី ២ ឃុំកែវផុស ស្រុកស្ទឹងហាវ ខេត្ដព្រះសីហនុផ្ទៃដីព្រៃមួយហិកតាក្បែរឆ្នេរឆកកំពង់សោមដែលម្ចាស់ឆ្នេរគឺតាបារាំងទិញតាំងពីជាង ២០ ឆ្នាំមុនគ្រាន់តែចង់ទុកជាទីកន្លែងជ្រកកោនសម្រាប់ជីវិតចុងក្រោយប៉ុណ្ណោះ ដោយមិននឹកចង់បង្កើតរីសតកម្សាន្ដអ្វីឡើយ។
ចុះពីលើរថយន្ដ Jeep ក្នុងសម្លៀកបំពាក់អាវយឺត និងគគីរប្រឡាក់ដី សំដៅរើសំរាមរប៉ាត់រប៉ាយក្នុងបរិវេណចំណតរថយន្ដទុកដាក់ក្នុងធុងសំរាមយ៉ាងមានរបៀបរៀបរយ ខណៈស្បើយភ្ញៀវនាពេលល្ងាចបុរសចំណាស់រាងស្គម សក់ និងពុកមាត់ពណ៌ស ទំនងជាទាហានចូលនិវត្ដន៍ និងបុគ្គលិកដែលខ្វល់ខ្វាយពីបរិស្ថានឆ្នេរម្នាក់ប៉ុណ្ណោះ។
បុរសវ័យ ៦៨ ឆ្នាំរូបនេះដែលមើលទៅស្រដៀងនឹងជនជាតិបរទេសបន្ដិច បានចំណាយពេល ២២ ឆ្នាំមកនេះកែច្នៃតំបន់ព្រៃដែលគ្មានហេដ្ឋារចនាសម្ព័ន្ធអ្វីទាំងអស់ទៅតាមលទ្ធភាពសន្សឹមៗ។
លោក ពុធ ចន្ទតារាវុទ្ធ បានថ្លែងក្នុងសម្ដីច្បាស់ៗក្នុងសភាពនឿយហត់ពីការងារសម្អាតបរិស្ថានថា៖ «ដោយសារខ្ញុំធ្លាប់រស់នៅលើទឹកដីប្រទេសបារាំងតាំងពីអាយុ ២២ ឆ្នាំហើយពេលខ្ញុំមករស់នៅស្រុកខ្មែរយើងនេះ អ្នកស្រុកបង្កើតទម្លាប់ហៅខ្ញុំថា បងបារាំង ពូបារាំង អ៊ំបារាំង និងតាបារាំងរហូតដល់សព្វថ្ងៃ»។
តាបារាំងបានប្រាប់ ភ្នំពេញ ប៉ុស្ដិ៍ ថា៖ «កាលពីឆ្នាំ ១៩៩៧ ខ្ញុំទិញដីនេះដើម្បីរស់នៅខ្លួនឯងទេ ដោយសារខ្ញុំស្រឡាញ់ខ្យល់អាកាសមាត់សមុទ្រជាមួយភរិយាខ្ញុំ។ ខ្ញុំចេះតែអភិវឌ្ឍអ៊ីចឹងទៅ ហើយដល់ពេលយូរៗទៅ គេល្បី គេនាំគ្នាផ្សាយតាមហ្វេសប៊ុកក៏ស្គាល់ទាំងអស់គ្នាទៅ ហើយល្បីចុងក្រោយគឺឆ្នាំនេះតែម្ដង។ មានភ្ញៀវមកលេងទីនេះយូរហើយ តែមិនសូវល្បីដូចពេលនេះ។ មានមួយឡានៗអ៊ីចឹងទៅ»។
ជាមួយវត្ដមានភ្ញៀវទេសចរដែលភាគច្រើនជាពលរដ្ឋខ្មែរដ៏ច្រើនកុះករកំពុងបន្ដសម្រុកមកលេងឆ្នេរតាបារាំងនារដូវសម្បូរបុណ្យជាតិនៅក្នុងខែនេះ។
អាណិកជនខ្មែរដែលខំធ្វើការងារតត្រុកមិនខ្លាចនឿយហត់រូបនេះ បាននិយាយថា៖ «ពេលបុណ្យចូលឆ្នាំខ្មែរយើងមានភ្ញៀវច្រើនលើសលប់។ ខ្ញុំមិនអាចប៉ាន់ប្រមាណបានទេ តែបើប្រហែលជា ៥០០ នាក់អីធានាថាប្រាកដជាបានច្រើនណាស់»។
ជាមួយប្រវែងឆ្នេរខ្សាច់សសរុបទាំងអស់ ៣,៥ គីឡូម៉ែត្រ ចំណែកដីរបស់ឆ្នេរតាបារាំងមានត្រឹម ៥០ ម៉ែត្រដែលដំឡើងក្យូសលម្ហែចំនួន ៦ តម្លៃ ៣ ម៉ឺនរៀលសម្រាប់ក្រាលកន្ទេលអង្គុយលេង និងក្បូសលយចូលសមុទ្រចំនួន ១ តម្លៃ ៨ ម៉ឺនរៀល។
បើទោះបីជាចំនួនទេសចរកើនឡើងខ្លាំងរហូតដល់ភ្ញៀវភាគច្រើនត្រូវក្រាលកន្ទេលអង្គុយតាមគុម្ពោតព្រៃ ដែលធ្វើឲ្យម្ចាស់រីសតឆ្នេរតាបារាំងតែងតែបារម្ភពីសុវត្ថិភាពរបស់ពួកគេយ៉ាងណាក៏ដោយ ក៏លោកតាបារាំង មិនសម្រេចចិត្ដបង្កើនការសាងសង់ក្យូសបន្ថែមនោះទេ។
លោក ចន្ទតារាវុទ្ធ បានបន្ដថា៖ «ខ្ញុំអត់ធ្វើទេ។ គេបានស្នើខ្ញុំដែរ តែខ្ញុំអត់ចង់ធ្វើទេ។ ខ្ញុំចាស់ហើយ។ ខ្ញុំធ្វើប៉ុណ្ណឹងបានហើយ។ ខ្ញុំធ្វើនេះ ដោយសារខ្ញុំស្រឡាញ់ភ្ញៀវពីព្រោះវាជាកិត្ដិយស ហើយខ្ញុំសប្បាយចិត្ដដែលខ្ញុំធ្វើបានប៉ុណ្ណឹង ដោយនាំឲ្យពួកគាត់មកលេងដល់ទីកន្លែងខ្ញុំនេះ»។
ដោយផ្ដោតលើគោលដៅទេសចរជាតិជាចម្បង បុរសអាណិកជនបារាំងរូបនេះបានឲ្យដឹងពីសេវាកម្មម្ហូបអាហាររបស់រីសតឆ្នេរតាបារាំងថា៖ «យើងមានបម្រើមុខម្ហូបឡូខល [Local] ទូទៅដូចជា នៅព្រែកលៀប នៅភ្នំពេញអ៊ីចឹង កុំនិយាយដល់អន្ដរជាតិ ដូច បារ៍បារាំងនៅមាត់ទន្លេ Steak Ripe, Boulogne ឬ Salad អីទេ។ នៅទីនេះយើងមានមាន់ដុត មាន់ស្ងោរជ្រក់ មឹកឆា មឹកអាំង មឹកស្ងោរ ក្ដាម និងបង្គាអ៊ីចឹងទៅ»។
យ៉ាងណាមិញស្របពេលកំណើនភ្ញៀវទេសចរហក់ឡើងយ៉ាងគំហុកនៅទីកម្សាន្ដឆ្នេរខ្សាច់សតាបារាំងលោក ពុធ ចន្ទតារាវុទ្ធ នៅតែទទូចចំពោះការចូលរួមសម្អាតបរិស្ថានតំបន់ឆ្នេរដ៏ស្រស់បំព្រងទាំងអស់គ្នា បើទោះជាលោកស្នើសុំវិភាគទានសម្អាតបរិស្ថានពីអ្នកដំណើរយ៉ាងណាក៏ដោយ។
លោកបានលើកឡើងថា៖ «ខ្ញុំសូមអំពាវនាវដែរថា ឲ្យអតិថិជនទាំងអស់ជួយអនាម័យ តែពួកគាត់អត់បានធ្វើអ្វីដូចចិត្ដខ្ញុំចង់បាននោះទេ។ អ៊ីចឹងនៅសល់សំរាមទាំងអម្បាលម៉ាន ខ្ញុំប្រមូលដុតនៅក្នុងឡនេះ។ ខ្ញុំមិនឲ្យសំរាមប៉ះពាល់ដល់ឆ្នេរឡើយ ពីព្រោះខ្ញុំស្រឡាញ់ឆ្នេរណាស់»។
ជាចុងក្រោយ តាបារាំង សំណូមពរដល់រាជរដ្ឋាភិបាល ជាពិសេសអាជ្ញាធរដែនដីរៀបចំ តបណ្ដាញទឹក និងភ្លើង ដែលផ្ដល់ភាពងាយស្រួលក្នុងការផ្ដល់សេវាកម្មជូនភ្ញៀវ។
ឆ្នេរខ្សាច់សតាបារាំង ដែលបច្ចុប្បន្នមានសភាពទឹកពណ៌ប្រផេះ ព្រមទាំងក្យូសលម្ហែ និងបឹងហ្គាឡូ ២ តម្លៃ ៦០ ដុល្លារក្នុង ១ យប់ស្ថិតក្នុងភូមិរិទ្ធី ២ ឃុំកែវផុស ស្រុកស្ទឹងហាវ ខេត្ដព្រះសីហនុចម្ងាយប្រមាណ ១៩០ គីឡូម៉ែត្រពីរាជធានីភ្នំពេញ និងប្រមាណ ៥០ គីឡូម៉ែត្រពីផ្លូវបំបែកស្រែអំបិល៕
វីដេអូ៖