.jpg)
ស្ពានបេតុងលយចូលផ្ទៃសមុទ្រជាកន្លែងតម្រូវចិត្តភ្ញៀវទេសចរថតរូបសែលហ្វ៊ី។ រូបថត លៀប ទេពិទូ
ក្រុងព្រះសីហនុ: ទោះមិនមានឆ្នេរខ្សាច់សក្បុស អំណោយផលដល់ភ្ញៀវចុះងូតទឹកលេងកម្សាន្ដដូចនៅឆ្នេរ តាបារាំងក្បែរខាង ឆ្នេរពយយាយម៉ៅ ក៏មានភាពទាក់ទាញពិសេសផ្ទាល់ខ្លួន ដែលអាចអន្ទងចិត្ដភ្ញៀវមិនភ្លេចឆៀងអើតឈ្ងោកមិនដាច់រយៈ។
ស្ពានបេតុងលយចូលផ្ទៃសមុទ្រត្រូវបានសាងសង់ឡើងតម្រូវចិត្ដភ្ញៀវឈរគន់មើលទិដ្ឋភាពឆកកំពង់សោម និងថតរូបសែលហ្វ៊ីពេញអេក្រង់តែឆ្នេរក្រាលដោយថ្មដុះរដិបរដុបច្រូងច្រាង នេះមិនអនុគ្រោះដល់ការងូតទឹកលេងកម្សាន្ដទេ ជាពិសេសចំពោះកុមារ។
ឆ្នេរមានទេសភាពស្រស់ស្អាត ប៉ុន្តែមានថ្មច្រើនដែលមិនអំណោយផលដល់ការចុះងូតទឹកលេងកម្សាន្ត។ ហុង មិនា
បើវាមិនទាន់គ្រប់គ្រាន់ក្នុងការទាក់ទាញចិត្ដភ្ញៀវនិយមការងូតទឹកសមុទ្រ ដែលខំស្កាត់មកពីឆ្ងាយ អ៊ីចឹងរមណីយដ្ឋានពយយាយម៉ៅ ដែលស្ថិតក្នុងឃុំកែវផុស នៅមានអាងហែលទឹកជាប់មាត់សមុទ្រ ជំនួសឲ្យភាពមិនអំណោយផលនៃឆ្នេរក្រាលដោយថ្មគឺអាងទឹកសាបប្រើប្រាស់មិនចេះរីងស្ងួតផុសពីក្រោមដីតាមធម្មជាតិ ដែលរចនាម៉ូដរូបបេះដូងគួរឲ្យទាក់ទាញ។
អ្នកស្រី សុង ស្រីរ័ត្ន ជាអ្នកគ្រប់គ្រងរមណីយដ្ឋានពយយាយម៉ៅ បានប្រាប់ ភ្នំពេញ ប៉ុស្ដិ៍ ថា៖ «យើងទើបដាក់ឲ្យដំណើរការអាងហែលទឹកនៅមាត់សមុទ្រចំនួន ១ សម្រាប់បម្រើសេវាកម្មជូនភ្ញៀវដែលមានបំណងចង់ហែលទឹកលេង។ ដោយសារទីនេះអត់មានឆ្នេរអំណោយផលដល់ការងូតទឹកសមុទ្រដូចកន្លែងដទៃ យើងខ្ញុំក៏នឹកឃើញសង់អាងទឹកសម្រាប់ភ្ញៀវទទួលយកនូវបទពិសោធហែលទឹកសាបអែបមាត់សមុទ្រ»។
ខុសពីតំបន់ឆ្នេរសមុទ្រដទៃទៀតដែលមិនសម្បូរប្រភពទឹកសាបដែលមានតម្លៃថ្លៃចំពោះការប្រើប្រាស់ និងលាងជម្រះកាយក្រោយពីងូតទឹកសមុទ្រ ឆ្នេរពយយាយម៉ៅ មិនខ្វះទឹកសាបដោយប្រភពទឹកសាបធម្មជាតិផុសពីក្នុងដី ផ្ដល់នូវទឹកសាបសម្រាប់ភ្ញៀវហែលក្នុងអាង និងងូតលាងសម្អាតកាយនាមាត់សមុទ្របង្កើយ។
ឫសដើមកោងកាងនៅឆ្នេរដែលក្រាលទៅដោយថ្មរដិបរដុប។ ហុង មិនា
ស្ថិតក្នុងអាងដែលរចនាឡើងយ៉ាងស្រស់ស្អាតជារូបរាងបេះដូងទំហំអង្កត់ផ្ចិតប្រមាណ ៣ ម៉ែត្រ ទឹកដ៏ថ្លាឈ្វេងបន្ដផុសពីក្រោមដីផ្ដល់ជាប្រភពទឹកសាបប្រើប្រាស់ខួបប្រាំងខួបវស្សា។
អ្នកខេត្ដកំពង់ចាមទើបមកមើលការខុសត្រូវរមណីយដ្ឋានពយយាយម៉ៅ របស់ជីតា អ្នកស្រី សុង ស្រីរ័ត្ន បាននិយាយថា៖ «ខ្ញុំមិនច្បាស់ថា ប្រភពទឹកសាបក្បែរមាត់សមុទ្រនេះជ្រាបមកពីណានោះទេគ្រាន់តែដឹងថានៅក្បែរនេះមានភ្នំមួយ។ ប្រហែលជាវាជ្រាបហូរពីភ្នំនោះក៏មិនដឹង»។
អ្នកស្រីបញ្ជាក់ថា៖ «សំខាន់ទឹកសាបនេះមានគុណភាពស្អាត ដែលយើងអាចយកមកប្រើប្រាស់ដាំស្ល បង្ហូរចូលអាងធំសម្រាប់ភ្ញៀវហែលលេង និងស្រោចស្រពដំណាំទាំងអស់នៅទីនេះ។ វាមិនដែលរីងស្ងួតម្ដងណាឡើយ យ៉ាងច្រើនណាស់នៅរដូវប្រាំងគ្រាន់តែវាមិនជ្រាបឡើងច្រើនដល់ពេញមាត់អាងប៉ុណ្ណោះ»។
ផ្លូវទៅកាន់ឆ្នេរពយយាយម៉ៅ ពោរពេញដោយទេសភាពបៃតងខ្ចី អមសងខាង យ៉ាងស្រស់ត្រកាល។ រូបថត លៀប ទេពិទូ
អាងទឹកសាបជាប់មាត់សមុទ្រដែលទើបបើកដាក់ឲ្យដំណើរការបណ្ដើរៗមានបណ្ដោយប្រវែងជាង ១០ ម៉ែត្រ និងទទឹងជិត ៥ ម៉ែត្រ គិតថ្លៃ ៥ ០០០ រៀលសម្រាប់មនុស្ស ពេញវ័យ និង ១០ គុណនឹង ២ ម៉ែត្រ តម្លៃ ២០០០ រៀលសម្រាប់កុមារ។
អ្នកគ្រប់គ្រងរមណីយដ្ឋានពយយាយម៉ៅ មកពីទឹកដីចម្ការកៅស៊ូដែលហាក់មិនសូវស្គាល់ភូមិសាស្ដ្រឃុំកែវផុសច្បាស់ អ្នកស្រី សុង ស្រីរ័ត្ន បានប្រាប់ថា ហែលទឹកសាបនៅសមុទ្រគឺជាបទពិសោធប្លែកអារម្មណ៍របស់ភ្ញៀវ ជាពិសេសទេសចរក្នុងស្រុកដែលនិយមហែលទឹក និងស្រូបខ្យល់អាកាសបរិសុទ្ធនៃសមុទ្រ។
ជាមួយដំណើរការទទួលភ្ញៀវពេញដៃពេញជើងរយៈពេលប៉ុន្មានខែចុងក្រោយនេះ រមណីយដ្ឋានពយយាយម៉ៅនៅបន្ដអភិវឌ្ឍខ្លួនដើម្បីផ្គាប់តម្រូវការភ្ញៀវនិយមលេងទឹកដែលនឹងមិនស្រងាកចិត្ដចំពោះភាពមិនអំណោយផលនៃឆ្នេរដ៏គួរឲ្យគយគន់មួយនេះ។
ចៅស្រីម្ចាស់រមណីយដ្ឋានដែលមានកម្មសិទ្ធិដី ២០ ហិកតា អ្នកស្រី ស្រីរ័ត្ន បានឲ្យដឹងថា៖ «យើងមានគម្រោងសង់អាងទឹកចំនួន ៣ ទៀតនៅប្របតាមឆ្នេរនេះ តែយើងធ្វើទៅតាមដំណាក់កាលបន្ដិចម្ដងៗ»។
អាងទឹករាងបេះដូង ផ្ទុកទឹកសាបប្រភពផុសចេញពីដីជាភាពទាក់ទាញនៃឆ្នេរនេះ។ ហុង មិនា
លោក ស៊ូ ម៉េង ជាស្វាមី អ្នកស្រី សុង ស្រីរ័ត្ន បានបង្ហើបប្រាប់ថា៖ «យើងនៅមានគម្រោងសង់ក្ដាររំអិលសម្រាប់ក្មេងៗលេងរំអិលចូលទឹកផងដែរ។ បើយើងមិនខិតខំកសាងអាង និងកន្លែងលេងសម្រាប់ក្មេងៗនោះទេ ពួកគេមិនអាចចុះហែលទឹកសមុទ្រដែលសម្បូរថ្មមុតជើងបានឡើយ»។
លោកបន្ដថាភ្ញៀវនៅតែអាចចុះងូតទឹកលេងបាន បើទោះបីជាស្ថានភាពមានថ្មរដិបរដុបច្រើនយ៉ាងណាក៏ដោយ ហើយទីតាំងអាងទឹកទាំងនោះត្រូវបានសាងសង់ឡើងលើបរិវេណសម្បូរថ្មស្រួចច្រើនប៉ុណ្ណោះ។
ជាមួយក្យូសទទួលទានអាហារសង់ដង្ហែតាមផ្លូវចូលចំនួន ២០ ភ្ញៀវអាចកុម្ម៉ង់ម្ហូបចាប់ពីគ្រឿងក្លែម មាន់ដុត ទាអាំង រហូតដល់គ្រឿងសមុទ្រតម្លៃពី ២ ម៉ឺន ទៅ ៥ ម៉ឺនរៀលក្នុងមួយចានជាមួយតម្លៃជួលក្យូស ៣ ម៉ឺនរៀល។
រមណីយដ្ឋានពយយាយម៉ៅ ស្ថិតក្នុងភូមិរិទ្ធី ២ ឃុំកែវផុស ស្រុកស្ទឹងហាវ ខេត្ដព្រះសីហនុចម្ងាយប្រមាណ ១៩០ គីឡូម៉ែត្រពីរាជធានីភ្នំពេញ និងប្រមាណ ៥០ គីឡូម៉ែត្រពីផ្លូវបំបែកស្រែអំបិល។
សម្រាប់ព័ត៌មានលម្អិត និងធ្វើការកក់កន្លែង រមណីយដ្ឋានពយយាយម៉ៅ ដែលនៅមិនឆ្ងាយប៉ុន្មានពីឆ្នេរខ្សាច់សតាបារាំង សុំទាក់ទងតាមលេខទូរស័ព្ទ ០៨៦ ៧១ ៦៧ ៤៤៕
ភ្ញៀវទេសចរចុះសំចតទិញផ្លែទុរេន សាវម៉ាវ តាមផ្លូវទៅឆ្នេរពយយាយម៉ៅ។ ហុង មិនា
ផ្កាព្រៃដែលរីកស្គុសស្គាយនៅក្បែរឆ្នេរពយយាយម៉ៅ ជាទីថតរូបគួរឲ្យគយគន់។ ហុង មិនា
រមណីយដ្ឋាន ពយយាយម៉ៅ មានបម្រើដូចជាគ្រឿងក្លែម និងមាន់ដុត។ហុង មិនា
វីដេអូ៖
