.jpg)
ភ្ញៀវទេសចរអង្គុយលើនាវា សម្លឹងមើលឆ្នេរម៉ាយ៉ា ដ៏ស្រស់ស្អាត ពីចម្ងាយ។ រូបថត AFP
កោះភីភី៖ ភ្ញៀវទេសចរអង្គុយលើនាវាបានត្រឹមតែថតរូបសែលហ្វ៊ី ហើយសម្លឹងពីចម្ងាយ ខណៈយានលើទឹកបន្ថយល្បឿនប៉ប្រះសំណាញ់ខណ្ឌចែកកុំឲ្យមានវត្តមានទេសចរទៅចុះចតនៅឆ្នេរខ្សាច់ដ៏សក្បុស ហ៊ុមព័ទ្ធដោយភ្នំបៃតង ផុសពីលើផ្ទៃទឹកដ៏ខៀវស្រងាត់។
នាយកដ្ឋានអភិរក្សរុក្ខជាតិ និងសត្វ នៃឧទ្យានជាតិថៃបានប្រកាសថា នឹងបិទឆ្នេរ ម៉ាយ៉ា នៅដែនកោះភីភីភាគខាងត្បូងប្រទេស ថៃ រហូតដល់ឆ្នាំ ២០២១ ដើម្បីឲ្យឆ្នេរដែលល្បីដោយសារខ្សែភាពយន្តហូលីវូដរឿង The Beach នេះអាចស្ដារជីវចម្រុះពីឥទ្ធិពលបៀតបៀនដោយវត្តមានភ្ញៀវទេសចរយ៉ាងកកកុញ។
ដើម្បីឆ្នេរឆកដ៏តូចនេះគេគ្រោងនឹងបិទលែងទទួលភ្ញៀវត្រឹមតែ ៤ ខែ អំឡុងរដូវមូសុងនៅឆ្នាំ ២០១៨។ ប៉ុន្តែអ្នកជំនាញបានសម្រេចពន្យារពេលបើកឡើងវិញ ដើម្បីស្ដារអេកូឡូស៊ី ផ្កាថ្ម និងជីវចម្រុះ នៅតំបន់ឆ្នេរម៉ាយារហូតដល់ ២ ឆ្នាំទៀតឯណោះ។
ខ្សែសំណាញ់ខណ្ឌមិនឲ្យនាវាចូលក្បែរឆ្នេរម៉ាយ៉ា។ រូបថត AFP
ឆ្នេរម៉ាយ៉ា បានល្បីសុសសាយនឹងទាក់ទាញភ្ញៀវទេសចរមកពីជុំវិញពិភពលោក ដោយសារវាត្រូវបានប្រើប្រាស់ជាទីតាំងថតភាពយន្តហូលីវូដរឿង The Beach ដែលសម្ដែងដោយតារាភាពយន្តល្បី លេអូណាដូ ឌីកាព្រីយោ នៅឆ្នាំ ១៩៩៩។
ឥទ្ធិពលខ្សែភាពយន្តហូលីវូដកាលពីជិត ២ ទសវត្សរ៍មុននេះ បានធ្វើឲ្យឆ្នេរដ៏តូច ដែលមានប្រវែងតែ ២៥០ ម៉ែត្រ និងទទឹងតែ ១៥ ម៉ែត្រទទួលភ្ញៀវកកកុញ ប្រមាណជា ៥ ០០០ នាក់ក្នុង ១ ថ្ងៃ។
ជំនួយការសាស្ត្រាចារ្យលោក ថន ថាមរ៉ុងណាវ៉ាសាវ៉ាត មកពីសាកលវិទ្យាល័យជលជីវសាស្ត្រ កាសេតសាត នៅជាសមាជិកគណៈកម្មការឧទ្យានជាតិបាននិយាយថា ការពន្យារពេលបើកឆ្នេរម៉ាយ៉ាឡើងវិញ គឺដោយសារតែនាយកដ្ឋានអភិរក្សជីវចម្រុះ ត្រូវការពេលវេលាស្ដារការពារបរិស្ថាន និងអភិវឌ្ឍហេដ្ឋារចនាសម័ន្ធ ដូចជាស្ពានដើរ កំពង់ចំណតនាវាទេសចរណ៍ និងកន្លែងស្នាក់នៅសម្រាប់អាជ្ញាធរ។ ទន្ទឹមនឹងនោះប្រព័ន្ធសំបុត្រឌីជីថលនឹងត្រូវបានដាក់លក់ នៅពេលដែលឆ្នេរនេះបើកដំណើរការឡើងវិញ។
ទិដ្ឋភាពអ៊ូអរមុនពេលមានការប្រកាសបិទឆ្នេរម៉ាយ៉ា។ រូបថត AFP
ក្រុមអ្នកជំនាញ និងមន្ដ្រីបរិស្ថានបានព្រមានថា ភ្ញៀវទេសចរច្រើនពេកបង្កផលប៉ះពាល់ដល់សម្រស់ឆ្នេរទាំងបញ្ហាសំរាម បរិស្ថាន និងប្រព័ន្ធអេកូឡូស៊ីផងដែរ។
លោកបានអះអាងទៀតថា៖ «នៅពេលដែលឆ្នេរម៉ាយ៉ា បើកទទួលភ្ញៀវទេសចរឡើងវិញ ចំនួនភ្ញៀវទេសចរនឹងត្រូវបានកំណត់ត្រឹមតែ ២ ៤០០ នាក់ ក្នុងមួយថ្ងៃ ហើយក៏មានការកំណត់រយៈពេលលេងកម្សាន្តផងដែរ»។
ប្រព័ន្ធកក់សំបុត្រចូលតាមអនឡាញ នឹងត្រូវបានអនុវត្តសាកល្បង ដើម្បីធានាដល់ការគ្រប់គ្រងស្ថិតិទេសចរណ៍ ការប្រមូលព័ត៌មាន និងការស្វែងរកចំណូលថវិកាប្រកបដោយតម្លាភាពដល់អាជ្ញាធរប្រចាំការថែរក្សាទីនោះ។
ខណៈឆ្នេរម៉ាយ៉ា បានត្រឹមតែគយគន់ពីចម្ងាយ ភ្ញៀវទេសចរដែលមកកម្សាន្តនៅថៃនៅមានជម្រើសទៅឆ្នេរ និងកោះឯទៀត នៅតំបន់ឧទ្យានជាតិកោះភីភី ដែលនៅតែបន្តស្វាគមន៍ភ្ញៀវទេសចរដដែល៕ AFP
