ក្រុងសៀមរាប: ឈរលើប៉មដែកកម្ពស់ជិត ២០ ម៉ែត្រ ខណៈក្រុមការងារជួយពាក់ឧបករណ៍សុវត្ថិភាពបន្តោកនឹងខ្សែកាបទាំងមនុស្ស និងកង់ព្រមទាំងរៀបរាប់ប្រាប់ពីវិធីជិះកង់ឆ្លងកាត់ខ្សែកាបប្រវែង ២០០ ម៉ែត្រ អ្នកនៅលើកង់ចាប់ផ្ដើមញ័រជើងតិចៗ បេះដូងបង្កើនចង្វាក់ភ្លេងកាន់តែរន្ថើន មុនពេលលើកជើងទាំង ២ រវៃឈ្នាន់កង់ទៅមុខសន្សឹមៗ ដោយដៃម្ខាងឆ្លៀតកាន់កាមេរ៉ា GoPro ផ្ដិតយករូបភាពសកម្មភាពដ៏រញ្ជួយអារម្មណ៍នេះ។
ជាមួយបទពិសោធជិះកង់ហោះលើខ្សែកាប ដែលមានតែមួយគត់នៅកម្ពុជា លោក ផាណារ៉ា បានប្រាប់ពីអារម្មណ៍ផ្ទាល់ខ្លួនថា៖ «ខ្ញុំពិតជាភ័យញ័រជើងមែន ពេលផ្ដើមធាក់កង់លើអាកាសបែបនេះ»។
ទោះបីជាលោកថ្លាថ្លែងអំពីអារម្មណ៍ភ័យខ្លាចក៏ពិតមែន ប៉ុន្ដែលោកនៅតែមានភាពសប្បាយរីករាយដ៏រំជើបរំជួល ដែលមិនអាចរំលងបាន។
ទិដ្ឋភាពកង់ហោះប៉ប្រ៉ះចុងជើង លើក្យូសលម្ហែ ដែលអ្នកហាត់កីឡាលើអាកាសអាចគយគន់ទេសភាពភ្នំ ជាពិសេស បឹងត្រាវកុដិទំហំ ៦០ ហិកតាដ៏៏ធំល្វឹងល្វើយ ធ្វើឲ្យកើតជាអារម្មណ៍ស្រស់ស្រាយផង និងភ័យបុកពោះផង។
ទីកម្សាន្ដកង់ហោះ រួមទាំង សកម្មភាពជិះខ្សែរ៉ក និងស៊ូភើមេនហោះឆ្លងកាត់បឹងនេះ ស្ថិតក្នុងរមណីយដ្ឋានម្លប់ឈើ ត្រាវកុដិ ភូមិក្រពើ ឃុំបល្ល័ង្ក ស្រុកប្រាសាទបាគង ខេត្ដសៀមរាប ២៣ គីឡូម៉ែត្រ ខាងជើងឆៀងខាងកើតក្រុងសៀមរាប។
កញ្ញា នីតា ជាម្ចាស់ឧបករណ៍កម្សាន្ដ បានឲ្យដឹងថា កញ្ញាមានសេវាកម្មជិះកង់លើអាកាស (Sky Bike) ខ្សែរ៉ក (Zip Line) ស៊ូភើមេន ឬ គេងទៅ។ ប៉ុន្ដែអ្វី ដែលប្លែកខុសពីទីរមណីយដ្ឋានដទៃនោះគឺ ការជិះកង់ហោះ និង ស៊ូភើមេន។
ចំពោះតម្លៃ ម្ចាស់ឧបករណ៍កង់ហោះក្នុងរមណីយដ្ឋាន ម្លប់ឈើត្រាវកុដិ បានប្រាប់ថា៖ «សម្រាប់ភ្ញៀវខ្មែរ ជិះកង់ចម្ងាយ ២០០ ម៉ែត្រ និងជិះខ្សែរ៉កមកវិញ ២០០ ម៉ែត្រដូចគ្នា តម្លៃ ១០ ដុល្លារម្នាក់។ បើជិះខ្សែរ៉កសម្រាប់ខ្សែ ១៥០ ម៉ែត្រ ជិះពីរដងនៅលើផ្ទៃទឹក តម្លៃ ៥ ដុល្លារ។ ចំណែកជិះរ៉កប៉ប្រះចុងឈើប្រវែង ២០០ ម៉ែត្រ តម្លៃ ៥ ដុល្លារដែរ។ ខ្សែស៊ូភើមេន ប្រវែង ៤៥០ ម៉ែត្រ ដែលមាន ២ ដំណាក់កាល មានតម្លៃ ៧ ដុល្លារ»។
កញ្ញា នីតា បានបន្ថែមថា សម្រាប់អ្នកចង់ទទួលបាននូវភាពរំជើបរំជួលគ្រប់ស្ថានភាពលើខ្សែទាំង ៣ ជិះកង់ហោះ ខ្សែរ៉ក និងស៊ូភើមេន ភ្ញៀវត្រូវចំណាយប្រាក់ ១៥ ដុល្លារម្នាក់។
ភ្ជាប់ជាមួយកង់ហោះ ទៅនឹងរមណីយដ្ឋានធម្មជាតិនានាក្នុងតំបន់រមណីយដ្ឋានត្រាវកុដិ លោក អ៊ូ បញ្ញា ប្រធានសមាគមសហគមន៍ទេសចរណ៍ធម្មជាតិត្រាវកុដិ បានឲ្យដឹងថា បឹងធម្មជាតិត្រាវកុដិ មានទំហំបឹងប្រមាណ ៦០ ហិកតា ភោជនីយដ្ឋាន តូបលក់ដូរប្រហែល ៦០ កន្លែង និងក្យូស ២៥០ រួមទាំង ភោជនីយដ្ឋានធំៗចំនួន ៣។
លោកបានលើកឡើងថា៖ «សហគមន៍យើងខ្ញុំផ្ដោតលើសេវាកម្មលក់ តម្លៃ និងគុណភាពអនាម័យ ដែលត្រូវមានស្ដង់ដាររួមមួយ ជាពិសេស ការប្រើប្រាស់មាន់ស្រែ បន្លែអ្នកភូមិ និងវិធីចម្អិនក្រោមការបង្រៀនពីមេចុងភៅលំដាប់ផ្កាយ ៤ និង ៥»។
ផ្ដើមពីក្យូសតែ ២ និងអ្នកលក់ ៣ តូប ក្នុងឆ្នាំ ២០១៣ និងមានចក្ខុវិស័យវែងឆ្ងាយ ដោយសារតែជាតំបន់សក្កានុពលពីព្រោះត្រាវកុដិស្ថិតក្នុងចំណុចប្រសព្វចម្ងាយប្រមាណជាង ១០ គីឡូម៉ែត្រ ទៅកាន់ភ្នំគូលែន ប្រាសាទចៅស្រីវិបុល ប្រាសាទបេងមាលា តំបន់អង្គរ ប្រាសាទបាគង ប្រាសាទបន្ទាយស្រី ព្រំដែនថៃ និងឡាវ លោកក៏សម្រេចចិត្ដចងក្រងជាសហគមន៍។ បច្ចុប្បន្ន ត្រាវកុដិ ទទួលភ្ញៀវចាប់ពី ៥០០ ទៅ ២០០០ នាក់ក្នុងមួយថ្ងៃ។
ចំពោះសេវាកម្មជិះកង់ហោះសម្រាប់ភ្ញៀវបរទេស កញ្ញា នីតា បានបញ្ជាក់ថា៖ «យើងអត់ទាន់ដាក់តម្លៃភ្ញៀវបរទេសនោះទេ ពីព្រោះយើងមិនទាន់មានការធានារ៉ាប់រងនៅឡើយ»។
វាគ្មានអ្វីចម្លែកនោះទេ ដែលបុរសៗសារភាពពីអារម្មណ៍ចំពោះការភ័យខ្លាច ខណៈជិះកង់អត់ជាប់ដី តែជាខ្សែកាបកម្ពស់ជាង ១០ ម៉ែត្រ។ អ្នកជិះកង់ជានារីៗខ្លះ ស្រែកអស់ពីពោះចំពោះការភ័យខ្លាច៕