The Phnom Penh Post Search

Search form

Logo of Phnom Penh Post newspaper Phnom Penh Post - ញ៉ាំ​ម្ហូប​មាន់​ស្រែ​បាយ​សំរូប​នៅ​ហាង ខ្ទម​ស្រែ​ ក្បែរស្រះស្រង់​




ញ៉ាំ​ម្ហូប​មាន់​ស្រែ​បាយ​សំរូប​នៅ​ហាង ខ្ទម​ស្រែ​ ក្បែរស្រះស្រង់​

Content image - Phnom Penh Post
ភ្ញៀវ​ប្រុស​ស្រី​អង្គុយ​ទទួលទាន​អាហារ​លើ​គ្រែក្រោម​ម្លប់​ឆត្រ នៅ​ ខ្ទម​ស្រែ ស្ថិត​នៅ​ខាងត្បូង​ស្រះស្រង់​។ ឈឹម ស្រីនាង

ញ៉ាំ​ម្ហូប​មាន់​ស្រែ​បាយ​សំរូប​នៅ​ហាង ខ្ទម​ស្រែ​ ក្បែរស្រះស្រង់​

សៀមរាប: ស្ថិត​នៅតាម​មាត់​ស្រះស្រង់​ខាងត្បូង មនុស្ស​ប្រុស​ស្រី​អង្គុយ​លេងលើ​កន្ទេល​ក្រហម​ក្រាល​លើគ្រែឈើ​បួនជ្រុង​ធំក្រោម​ម្លប់ឆត្រ​ពណ៌​ត្រាវ អមដោយ​ដើម​ស្វាយមាន​ព្យួរ​កន្ត្រកឫស្សី​។

ភ្ញៀវ​ទាំងនោះ​កំពុង​ស្រូប​ខ្យល់​អាកា​ត្រជាក់ ​ស្រង់​ក្លិនក្រអូប​ផ្កា​ព្រៃ និង​ស្ដាប់តន្ត្រី​ធម្មជាតិ​ប្រគំ​ដោយ​បក្សី​ចេចចាចៗ។ទីកម្សាន្ត​នេះបាន​បើក​ដំណើរការ​រយៈពេល ៧ ខែ​មកហើយ ដោយ​អ្នកស្រុក​និយម​ហៅ​ថា​ ខ្ទម​ស្រែ។

ស្ថិត​នៅ​ភូមិ ស្រះស្រង់​ត្បូង សង្កាត់ នគរធំ ខេត្តសៀមរាប ខ្ទមស្រែ ផ្ដល់បរិយា​កាសបែប​ស្រុក​ស្រែចម្ការ​សម្រាប់​ភ្ញៀវ​ដែល​ចង់​ទទួលទាន​អាហារ​ជនបទ​ ជជែកគ្នា​លេង និង​គយគន់​ទេសភាព​តាមមាត់ស្រះ។

លោក ​ម៉ាន ចាន់ណា អាយុ ២៥ ឆ្នាំ​ជាម្ចាស់​ខ្ទម​ស្រែ បាន​និយាយទាំង​ទឹក​មុខរីករាយ​ថា៖ «ខ្ញុំ​បើក​កន្លែង​អង្គុយលេង​កម្សាន្ត​បែបធម្មជាតិ​នេះ​ឡើង គឺ​ចង់ធ្វើ​បង្ហាញ​ពី​កន្លែងមាន​ទេសភាព​ស្រស់ស្អាត​បែប​ធម្មជាតិពិតៗ និង​ខុសពីកន្លែង​ដទៃ ម្យ៉ាងទៀត​ចង់ជួយ​ជ្រោម​ជ្រែង​ដល់ជីវភាព​អ្នកភូមិ​រស់នៅ​ទីនេះ​ឲ្យ​គាត់មាន​ជីវភាពគ្រាន់បើ​ជាង​នេះ​បន្តិច»។

លោក​បានលើក​ឡើងថា៖ «ដោយ​មានការ​គាំទ្រច្រើន​ពី​អ្នក​សៀមរាប និង​អ្នក​ភ្នំពេញ ដោយសារតែ​គាត់មក​ញ៉ាំ​នៅទីនេះ​ហើយ បានប្រាប់តៗគ្នា​ពីកន្លែង​នេះ ចាប់​ពីពេលនោះ​មកគឺមាន​ភ្ញៀវ​មកពី​ភ្នំពេញ​ច្រើន ពួកគាត់​ចូលចិត្តមកញ៉ាំ​ជា​លក្ខណៈ​ក្រុម​គ្រួសារ​ និង​មិត្តភក្តិ​»។

Content image - Phnom Penh Post
ម្ហូប​មាន់​ស្រែ​ និង​បាយ​អង្ករ​សំរូប​នៅ​អាហារ​ដ្ឋាន ខ្ទមស្រែ។ ឈឹម ស្រីនាង

ម្ហូប​នៅក្នុង​ខ្ទម​ស្រែ​បច្ចុប្បន្ននេះ​មាន​តែម្ហូប​ចម្អិនពី​មាន់ស្រែ​ដូចជា មាន់​ដុត​សៀង ដុត​ទឹកឃ្មុំ ឆា​គ្រឿងក្នុងមាន់​ត្រកួន ម្ជូរស្រែ​សាច់មាន់ និង​ឆាក្តៅមាន់ស្រែ។ ម្ហូប​ត្រូវបាន​បម្រើដោយ​ប្រើថាស​ឫស្សីដាក់​មាន់ ​និងកូនល្អី​ទ្រាប់​ស្លឹកចេក​ដាក់បាយសម្រូប។

ម្ចាស់​អាហារដ្ឋាន ខ្ទមស្រែ​បាន​លើកឡើង​ទៀតថា៖ «យើង​ប្រើមាន់​ស្រែសុទ្ធ​តែម្តង សម្រាប់​ធ្វើ​ម្ហូប ហើយ​មាន់​ស្រែ​ទាំងអស់នោះ​គឺ​ខ្ញុំដើរប្រមូល​ទិញ​ពី​អ្នកភូមិ​ជិតៗហ្នឹង​ដែល​គាត់​ចិញ្ចឹមនៅតាម​ផ្ទះ​តែម្ដង។ អ៊ីចឹង​ពេលខ្លះ​ទៅ​គឺមិនសូវ​ន​មាន់ស្រែ​គ្រប់គ្រាន់​សម្រាប់លក់​ឲ្យ​ភ្ញៀវ​នោះទេ ដោយ​ក្នុង​មួយថ្ងៃ​ខ្ញុំ​អាចលក់​មាន់ស្រែ​បានពី ៨ ២៥ ក្បាល​ភ្ញៀវ​ដែល​គាត់​មក​លេង​ច្រើនឬ​តិច»។

ជាទូទៅ​ភ្ញៀវ​មកទីនេះ​ច្រើនតែ​កុម្ម៉ង់​ជាឈុត​តម្លៃ ១៥ ដុល្លារ ​មានមាន់​មួយ ឆា​ត្រកួន និង​បាយ​អង្ករសំរូប ដែល​អាចញ៉ាំ​បាន ២ ទៅ ៣ នាក់។ សម្រាប់​ឈុតមាន់​មួយនេះ​ភ្ញៀវ​គាត់​អាចកុម្ម៉ង់​ដុត ឆា ឬ​ស្ងោរ​ក៏បាន។

​ខ្ទមស្រែ ដែល​ស្ថិតនៅ​ខាងត្បូង​ស្រះស្រង់ អាច​ទាក់ទងទូរស័ព្ទ​លេខ ០៧៨ ៣៣៤ ៤៩៦៕

អត្ថបទគួរចាប់អារម្មណ៍