The Phnom Penh Post Search

Search form




Logo of Phnom Penh Post newspaper Phnom Penh Post - ញ៉ាំ​អាហារ ទស្សនា​តម្បាញ​សូត្រ​នៅ​ចម្ការស្នេហ៍​




ញ៉ាំ​អាហារ ទស្សនា​តម្បាញ​សូត្រ​នៅ​ចម្ការស្នេហ៍​

Content image - Phnom Penh Post
ភ្ញៀវ​ទេសចរ​ជាតិ និង​អន្ដរជាតិ​អាច​ទស្សនាការ​ចិញ្ចឹម​ដង្កូវ​នាង​រហូត​យកសូត្រ​ទៅ​ត្បាញ​ជា​សំពត់​។ រូប សហការី

ញ៉ាំ​អាហារ ទស្សនា​តម្បាញ​សូត្រ​នៅ​ចម្ការស្នេហ៍​

កណ្តាលៈ នៅ​លើ​វិសាល​ភាពនៃ​ដែន​ដី​កោះធម្មជាតិ​ទំហំដី​ប្រមាណជា ៣ ហិកតា​ ដែល​បណ្តែត​ខ្លួន​នៅ​កណ្តាល​ផ្ទៃសាគរ​នៃទន្លេមេគង្គ​នោះ ​រមណីយ​​ដ្ឋាន​ចម្ការស្នេហ៍​ ឬ​ Silk Island បាន​ទាក់ទាញ​ភ្ញៀវ​ទេសចរ​ទាំងខ្មែរ​​ និងបរទេស​ចេញ​ចូលមិន​ចេះដាច់​ជារៀងរាល់​ថ្ងៃ​ បន្ទាប់ពី​បាន​បើក​បម្រើ​ភ្ញៀវ​ទេស​ចរ​អស់រយៈ​ពេលជាងពីរ​ឆ្នាំ​មក​ហើយ​។ ​

រមណីយ​ដ្ឋាន​ចម្ការ​ស្នេហ៍​ ស្ថិត​នៅ​ក្នុង​ភូមិ​កោះ​តូច ឃុំ​កោះ​ឧកញ៉ាតី ស្រុកខ្សាច់កណ្តាល​ ខេត្ត​កណ្តាល ខណៈ​លោក​អ្នកអាច​ចេញ​ដំណើរ​ពី​ភ្នំពេញ​ឆ្លង​កាត់​ស្ពានជ្រោយចង្វារ​ចម្ងាយ​ប្រមាណ​ពីរ​បីគីឡូម៉ែត្រ តាមផ្លូវ​ជាតិលេខ ៦ ដោយត្រូវ​បត់​ចូល​ទៅ​តាមផ្លូវ​កំពង់ចម្លង​ព្រែក​លៀប​ ឬចូល​តាម​ច្រកតាម​ភោជនីយដ្ឋាន​ម្លប់មៀន ៩៩ ក៏​បាន។

បន្ទាប់​មក​លោកអ្នក​ត្រូវ​ជិះ​ទូក​ដឆ្លង​ឆ្ពោះ​ទៅ​កាន់​ ​ចម្ការស្នេហ៍​ តែម្ដង។ ម្ចាស់ទី​លម្ហែ​ដ៏​មនោ​រម្យសម្រាប់​ដំណើរកម្សាន្ដ​ជិតៗ​តំបន់​ទីក្រុង​នាពេល​ចុងសប្តាហ៍​ ​លោក រិន ណារ៉ាន់ វ័យ ៤៨ ឆ្នាំ​ បាន​ឲ្យ​ដឹង​ថា៖ «​ទី​នេះ​យើងមានសេវា​កម្ម​ច្រើន​សម្រាប់​ម្រើ​អារម្មណ៍​ទេសចរទាំង​ខ្មែរ និង​បរទេស​ដូចជា ​ចម្ការ​ដើមមនសម្រាប់​ចិញ្ចឹម​សត្វ​ដង្កូវ​នាង ​ជាប្រភព​នៃការផលិត​សរ​សៃ​សូត្រ​​ដ៏​ល្អ​ប្រណីត​ក្នុង​សិប្បកម្មកតម្បាញ​សូត្រ​ខ្មែរ​។

យើង​​មាន​សំណង់​ផ្ទះបងប្អូន​ជន​ជាតិ​ភាគ​តិច​ភ្នង​ ចំនួន ៤០ ខ្នង​ឯណោះ សម្រាប់​ទុក​ឲ្យ​ភ្ញៀវចូល​ទស្សនា ដោយ​ផ្ទះ​នីមួយៗអាចផ្ទុក​មនុស្ស​បាន​ចំនួន​​ប្រមាណជា​បីបួននាក់ប៉ុណ្ណោះ។ ក្រៅ​ពី​នេះ​យើង​ក៏​មាន​ក្យូស​ប្រក់ស្បូវ​ធំៗ​មួយ​ចំនួនដែល​ជាទីកន្លែង​​អង្គុយ​ទទួលទាន​អាហារ​ថ្ងៃ​ត្រង់​ ដែលអាច​ដាក់​មនុស្សបានចំនួន​ចន្លោះ ២០ ឬ​ ៣០ នាក់​​ផងដែរ»។

Content image - Phnom Penh Post
នៅ​ចម្ការ​ស្នេហ៍​ក៏មាន​សង់​ផ្ទះ​បងប្អូន​ជនជាតិ ៤០ ខ្នង​សម្រាប់​ឲ្យ​ភ្ញៀវ​ចូល​ទស្សនា និង​អង្គុយលេង​ផង​ដែរ។ រូប សហការី

ចំពោះ​ការ​ចូល​ទស្សនា​នៅ​តំបន់​ចម្ការ​មន​ កន្លែងរវៃសរសៃសូត្រ សិប្បកម្ម​តម្បាញ​ហូល​ ផាមួង ពីសូត្រដង្កូវ​នាង​ជា​ដើម​នោះ ទេស​ចរខ្មែរម្នាក់​ត្រូវ​ទិញសំបុត្រ​មួយ​សន្លឹក​តម្លៃ ២០០០ ​រៀល អាច​ចូលទស្សនា​បាន​មួយ​ចប់​ ខណៈ​ភ្ញៀវ​បរ​ទេសមួយសន្លឹក​តម្លៃ​មួយ​ដុល្លារ។

លោក រិន ណារ៉ាន់ បង្ហើប​ឲ្យ​ដឹង​ពី​ចំនួន​ភ្ញៀវ​ទេសចរ​ប្រចាំ​ជា​មធ្យម​ថា៖​ «សម្រាប់​ថ្ងៃ​ធម្មតា​ យើង​បាន​ទទួល​ភ្ញៀវ​ទេសចរ​មកទស្សនា​នៅ​ចម្ការ​ស្នេហ៍​នេះ​ជា​មធ្យម​ពី​ ៧០ ទៅ​ ៨០ នាក់ ខណៈ​ថ្ងៃ​ចុង​សប្តាហ៍​វិញ​ពី ​១០០ ​ទៅ ២០០ នាក់»។ ​ដោយ​ឡែក​ទី​កម្សាន្ត​ទឹកនៃ​ចម្ការ​ស្នេហ៍​មិនមែនជា​អាង​ហែល​ទឹក​ ដែល​មាន​ពណ៌​ថ្លា​ខៀវស្រងាត់​ និង​ជីក​សង់​នៅ​លើ​ដីគោក​ដូចតាមសណ្ឋាគារ​ធំៗ​នោះ​ឡើយ។

អាង​ហែល​ទីនេះ​ ត្រូវ​បាន​គេ​យក​ចំណែក​មួយផ្នែក​តូច​នៃ​ដង​ទន្លេ​មេគង្គផ្ទាល់​តែ​ម្តង​ដោយ​គ្រាន់​តែ​សង់​ជា​ស្ពានដើរ​ព័ទ្ធជុំវិញ​ និង​ជណ្តើរតោង​ឡើង​ ខណៈ​ពណ៌​របស់ទឹកវិញ​គឺ​មាន​សភាព​ប្រែប្រួល​ទៅ​រដូវកាល​នៃទឹកទន្លេ​តែ​ម្តង។​ ​

ម្ចាស់​រមណីយ​ដ្ឋាន​ចម្ការស្នេហ៍ ក៏ក្រើន​​រំឭក​ដែរ​ថា៖ «អាងហែល​ទឹកនេះ​ នៅ​បាតក្រោមជា​ប្រភេទ​ដី​ខ្សាច់​ ហើយ​យើង​មិន​អនុញ្ញាតឲ្យ​ភ្ញៀវ​ណា​មិនទាន់​ចេះ​ហែល​ទឹក​មកចុះហែល​លេងឡើយ​ព្រោះ​ខ្លាច​រអិល​ ឬ​ស្រុតដី​ អាច​បណ្តាល​ឲ្យ​លង់ទឹក​បាន»។

សម្រាប់​សេវា​កម្ម​ម្ហូបអាហារ​នៅ​ចម្ការ​ស្នេហ៍​ហាក់ដូចជា​ មាន​សភាព​ចម្លែក​ជាង​គេ​បន្តិច​ ត្រង់ថាសាច់​សម្រាប់​​ចម្អិន​ម្ហូប​គឺ​មានតែ​សាច់ត្រី មាន់ និង​សាច់​គោ​ប៉ុណ្ណោះ ប្រសិន​បើ​ចង់​កុម៉្មង់​សាច់ជ្រូកប្រហែល​ជា​ពិបាក ខណៈ​តម្លៃវិញ​ក៏​រៀងថ្លៃបន្តិច​ដែរ​។

លោក រិន ណារ៉ាន់​ បង្ហើប​ពីតម្លៃ​ម្ហូបត្រួសៗ​ថា៖ «​កន្លែង​យើង​ពេញ​និយម​លើ​មុខ​ម្ហូប​មាន់ស្រែ​ដុត​ និង​ត្រីរ៉ស់​បឹង​កញ្ឆែត។ យើង​មាន​តែ​សាច់មាន់ ត្រី និង​​សាច់​គោ​ទេ​ដែល​បម្រើ​ជា​ម្ហូប​ទទួលភ្ញៀវព្រោះ​សាច់​ជ្រូក​កម្រ​មាន​ភ្ញៀវ​កុម្ម៉ង់។ មាន់ស្រែ​ដុត​មួយតម្លៃ​ ១៦ ​ដុល្លារ ចំណែកត្រី​រ៉ស​បឹងកញ្ឆែត​វិញ​មាន​តម្លៃ ១០​ ដុល្លារ»​៕

អត្ថបទគួរចាប់អារម្មណ៍