ក្រុងដាឡាត់ៈ ធ្វើដំណើរពីក្រុងហូជីមិញប្រមាណជា៤-៥ម៉ោង លោកអ្នកអាចទៅដល់ទីក្រុងដាឡាត់ លើតំបន់ភ្នំក្នុងទឹកដីខេត្តឡាមដុង។
ភ្ញៀវទេសចរដែលបានទៅលេងប្រទេសវៀតណាមកម្រខកខានទៅទស្សនាក្រុង ដាឡាត់ដ៏ត្រជាក់គ្រប់រដូវ ដែលពោរពេញដោយតំបន់ផ្ទះម៉ូដបារាំង និងសំណង់ទួអេហ្វហ្វែល ស្រដៀងនឹងទីក្រុងប៉ារីសរបស់ប្រទេសបារាំងដែរនោះ។
គេបាននិយាយថា ក្រុងដាឡាត់គឺជាទីកន្លែងផ្តល់នូវទេសភាពដ៏ល្អប្រពៃមួយលើ ពិភពលោកសម្រាប់តំបន់មានអាកាសធាតុត្រូពិក។
ទីឋានសួគ៌នេះស្ថិត នៅលើទឹកដីខ្ពង់រាបឡាងបៀន ដែលមានកម្ពស់រហូតដល់ ១៥០០ ម៉ែត្រ។ តំបន់នេះគឺជាទីរមណីយដ្ឋានមួយដែលត្រូវបានប្រទះឃើញក្នុងសតវត្សរ៍ទី១៩។
បច្ចុប្បន្នទឹកដីនៃក្រុងដាឡាត់នេះបានក្លាយជាទីជម្រើសសម្រាប់ ឋានសួគ៌របស់ក្រុមភ្ញៀវទេសចរ ជាពិសេសគឺសម្រាប់គូស្នេហ៍មានបំណងចង់ក្រេបចន្ទទឹកឃ្មុំតែម្តង។
ទេសភាពដ៏ទាក់ទាញរបស់ក្រុងដាឡាត់ មានដូចជា សម្រស់ដ៏ត្រកាលនៃបឹង និងតំបន់ទឹកជ្រោះ ជ្រលងភ្នំទាំងឡាយដែលមានព្រៃព្រឹក្សាខៀវស្រងាត់ និងផ្ការីកស្គុសស្គាយជាប់ពេញមួយរដូវកាល។
ចំពោះសេវាកម្មវិញក្រុងដាឡាត់មានសាងសង់ភូមិដ្ឋានមានផ្ទះធ្វើពី ឈើ កន្លែងស្ប៉ា និងសណ្ឋាគារដ៏ល្អប្រណីតៗសម្រាប់ភ្ញៀវ ជាទីក្រុងដែលគេបានប្រសិទ្ធនាមថាទីក្រុងនៃ «ឋានសួគ៌របស់គូស្នេហ៍»។
បើគេក្រឡេកទៅមើលផ្នែកសេវាកម្ម ម្ហូបអាហារវិញនោះ ដាឡាត់មានអាហារដ្ឋានព្រោងព្រាត ហើយនាពេលរាត្រីក៏មានតូបអាហារឆ្ងាញ់ៗពាសពេញចិញ្ចើមថ្នល់ហូរហែផងដែរ។
នៅពេលត្រឡប់ទៅផ្ទះវិញ ភ្ញៀវទេសចរនិយមទិញចំណីមួយផ្ញើមិត្តភក្តិបងប្អូន ដូចជា ផ្លែឈើស្រស់ ផ្លែស្ត្រប៊ើរី តែ កាហ្វេ ពូជផ្កាអ័រគីដេ និងផ្លែប៊័រជាដើម។ នៅតាមហាងមួយចំនួនក៏មានលក់ស្រាលិង្គខ្លាដែលគេល្បីថាអាចប៉ូវ សុខភាពផ្លូវភេទផងដែរ៕ PR
