The Phnom Penh Post Search

Search form




Logo of Phnom Penh Post newspaper Phnom Penh Post - ដេអូសៃ ​ជា​ឧទ្យាន​ជាតិ​ប៉ាគីស្ថាន​ស្អាត​ដាច់​គេ​ ១ ​ក្នុង​លោក​

ដេអូសៃ ​ជា​ឧទ្យាន​ជាតិ​ប៉ាគីស្ថាន​ស្អាត​ដាច់​គេ​ ១ ​ក្នុង​លោក​

Content image - Phnom Penh Post

ដេអូសៃ ​ជា​ឧទ្យាន​ជាតិ​ប៉ាគីស្ថាន​ស្អាត​ដាច់​គេ​ ១ ​ក្នុង​លោក​

ប៉ាគីស្ថាន: ឧទ្យាន​ជាតិ​ដេអូសៃ​ (Deosai) ​​​នៅ​​ប្រទេស​ប៉ាគីស្ថាន​ បាន​ក្លាយ​ទៅ​​ជា​ទី​កម្សាន្ត​​ដែល​មាន​សម្រស់​បុប្ផា​រីក​ស្គុស​ស្គាយ​ស្រស់​ស្អាត​ជាង​គេ​បំផុត​នៅ​លើ​ពិភព​លោក។ វា​មាន​ពូជ​ផ្កា​រាប់​ពាន់​ប្រភេទ​ បាន​​ដុះ​ត្រៀប​ត្រា​ និង​បញ្ចេញ​សម្រស់​​ស្រស់​បំព្រង​ និង​ក្លាយ​ជា​​កម្រាល​ព្រំ​បុប្ផា​សម្រាប់​​​ហ្វូង​​សត្វ​​កន្លង់​ និង​មេអំបៅ​យ៉ាង​ច្រើន​​កក​កុញ​ផង​ដែរ។

ឧទ្យាន​​ជាតិ​​នេះមាន​​​កម្ពស់​​​ប្រមាណ​ ៤១​១៤ ​ម៉ែត្រ​ពី​ទឹក​សមុទ្រ​ ​ដែល​​ធ្វើ​​វា​ក្លាយ​ទៅ​ជា​បឹង​បុប្ផា​​​ខ្ពស់​ជាង​​គេ​​​លើ​ពិភព​​លោក​។ ​​ឧទ្យាន​ជាតិ​នេះ​មាន​ផ្ទៃ​ដី​ទំហំ​​ ៣០០០ ​គីឡូម៉ែត្រ​ ហើយ​​​សម្បូរ​ច្រើន​ផ្កា​ចម្រុះ​​ដុះ​និង​​វាល​ស្មៅ​ដែល​ស្ថិត​នៅ​ឯ​តំបន់​ធម្មជាតិ​ស្ថិត​នៅ​ចំណោត​ភ្នំ​ទីបេ​ខាង​លិច​ ​ការ៉ាកូរ៉ាម។

នៅ​និទាឃរដូវ វា​ត្រូវបាន​គ្រប​​ដណ្ដប់​ដោយ​​ផ្កា​ព្រៃ​​ដែល​បញ្ចេញ​សម្រស់​ដេរដាស​ និង​មេ​អំបៅ​ដ៏​ច្រើន​សន្ធឹក​សន្ធាប់​ដែល​រំលេច​ទិដ្ឋភាព​ល្អ​គ្មាន​ពីរ​នៅ​លើ​ឧទ្យាន​នេះ​។

សម្រស់​បុប្ផា​រីក​ស្គុសស្គាយ​នៅ​ភ្នំ​ឧទ្យាន​ដេអូសៃ​ ប្រទេស​ប៉ាគីស្ថាន។
សម្រស់​បុប្ផា​រីក​ស្គុសស្គាយ​នៅ​ភ្នំ​ឧទ្យាន​ដេអូសៃ​ ប្រទេស​ប៉ាគីស្ថាន។

ក្រៅ​ពីមាន​​ឈ្មោះ​ជា​តំបន់​ខ្ពង់​រាប​ខ្ពស់​ជាង​គេ​លើ​លោក ឧទ្យាន​ជាតិ​ដេអូសៃ​​នេះ ​ក៏​មាន​បឹង​​សេអូសា (Sheosar)​ ​មាន​​ន័យ​ថា​ «បឹង​ខ្វាក់​»​ ផង​ដែរ។ បឹង​​នេះ​មានប្រវែង ២,៣​​ គីឡូ​ម៉ែត្រ​ ទទឹង​ ១,៨ គីឡូម៉ែត្រ​ ​ហើយ​មាន​ទឹកជម្រៅ​៤០​ម៉ែត្រ​ជា​​មធ្យម។ ​បឹង​នេះ​​ស្ថិត​នៅ​ក្បែរ​​ជ្រលង​ ឈីលីម លើ​ឧទ្យាន​ដេអូសៃ​។

កាល​​ពី​ឆ្នាំ​១៩៩៣ ឧទ្យាន​ជាតិ​​​ដេអូសៃ​​​ត្រូវ​បាន​គេ​អភិ​រក្ស​ជា​តំបន់ជម្រក​​រក្សា​ទុក​នូវ​ពូជ​សត្វ​ខ្លា​ឃ្មុំ​ពណ៌​ត្នោត​ដែល​បាន​ពូជពី​ភ្នំ​ហិមាល័យ។

គេ​សង្កេត​ឃើញ​ថា ​រយៈ​ពេល​ប៉ុន្មាន​ទសវត្សរ៍​នេះ ​ថ្វី​ដ្បិត​តែ​រដ្ឋាភិបាល​ប៉ាគីស្ថាន​តែងតែ​​គិត​គូរ​ចំពោះ​ការ​​អភិរក្ស​ពូជ​​សត្វ​ខ្លា​ឃ្មុំ​ពណ៌​ត្នោត​នេះ​យ៉ាង​ណា​ក៏​ដោយ​ ក៏​​​​ការ​គំរាម​កំហែង​ទៅ​លើ​សត្វ​កម្រ​នេះ​នៅ​កើត​មាន​ដដែល។ ក្រៅ​ពី​សត្វ​ខ្លា​ឃ្មុំ តំបន់​នេះ​ក៏​សម្បូរ​ពូជ​សត្វ​ផ្សេងៗ និង​​សត្វ​ស្លាប​​នានា​ផង​ដែរ​។

ពេល​ភ្ញៀវ​ទេស​ចរ​ចង់​ទៅ​កម្សាន្ត​នៅ​ប្រទេស​ប៉ាគីស្ថាន ពួក​គេ​មិន​ចោល​តំបន់ ឧទ្យាន​ជាតិ​ដេអូសៃ​ឡើយ។

ឧទ្យាន​ជាតិ​​ដេអូសៃ​នេះ​គឺ​ជា​ជម្រក​របស់​ក្រុម​សត្វ​ព្រៃ​នានា​ដូច​ជា​ពពួក​សត្វ​ពពែ​ស្នែង​វែង ​កញ្ជ្រោង​​ក្រហម ​ស្វា​រោម​​មាស ​កំប្រុក​រោម​មាស ប្រើស ខ្លារខិន​ពណ៌​ស រួម​ទាំង​មាន​​សត្វ​ដទៃ និង​សត្វ​ស្លាប​ផ្សេង​ទៀត​​សរុប​ ១២៤ ​ប្រភេទ។ ចំពោះ​​សត្វ​ស្លាប​នៅ​​តំបន់​នោះ​​មាន​​ដូច​ជា​ឥន្រ្ទី​ពណ៌មាស លលក​ខ្មោច ត្មាត​ ស្ទាំង ចាប​ស្រុក ​ព្រម​ទាំង​សត្វ​ទោម​ជា​ដើម៕ PR

អត្ថបទគួរចាប់អារម្មណ៍