ក្រុងម៉ានីល: ទិដ្ឋភាពផ្ទៃមេឃពណ៌ខៀវចាំងឆ្លុះសមុទ្រទឹកបៃតងថ្លាដូចត្បូងមរកតបោកបក់មកផ្ទប់ឆ្នេរខ្សាច់សក្បុស ដែលរឹតតែបន្ថែម ភាពវិសេសដោយថ្មផុសមានរូបសំណាកព្រះម៉ែម៉ារី គឺជាអត្តសញ្ញាណនៃឆ្នេរ បូរ៉ាខេយ របស់ហ្វីលីពីន។
តែគួរឲ្យសោកស្ដាយឆ្នេរសមុទ្រដ៏ស្រស់ស្អាត និងទាក់ទាញទេសចររាប់លាននាក់មកលេងកម្សាន្តនេះ ជិតផុតវេលាស្វាគមន៍ភ្ញៀវហើយ។
ដែនកោះនេះនឹងត្រូវផ្អាកទទួលភ្ញៀវ ៦ ខែក្រោយពីមានក្ដីកង្វល់ចំពោះបញ្ហាប៉ះពាល់ច្រាំងឆ្នេរដ៏ស្រស់ស្អាតអស្ចារ្យរបស់ហ្វីលីពីន។
អ្នកនាំពាក្យឲ្យលោកប្រធានាធិបតី ហ្វីលីពីន រូទ្រីហ្គោ ឌូទើតេ បាននិយាយថា ការបិទនេះនឹងចាប់ផ្ដើមពីថ្ងៃទី ២៦ ខែមេសាខាងមុខនេះ។ កាលពីដើមឆ្នាំ លោក ឌូទើតេ បានថ្លែងថា កោះបូរ៉ាខេយកំពុងប្រែក្លាយជារណ្ដៅបង្ហូរទឹកស្អុយ និងបានគំរាមកំហែងបិទជាស្ថាពរតែម្ដង។
ដែនកោះ ដែលមានឈ្មោះល្បីល្បាញជាឆ្នេរខ្សាច់ពណ៌ស បានទាក់ទាញភ្ញៀវទេសចរជិត ២ លាននាក់កាលពីឆ្នាំមុន។
ការសម្រេចនេះ បានបង្កជាក្ដីកង្វល់ដល់ពលរដ្ឋរាប់ពាន់នាក់ ចំពោះមុខជំនួញលើដែនកោះទេសចរណ៍ឋានសួគ៌ បូរ៉ាខេយ នេះ។
រដ្ឋលេខាធិការទេសចរណ៍ ហ្រ្វេដេរិច អាឡេហ្រ្គេ បាននិយាយកាលពីថ្ងៃព្រហស្បតិ៍ថា ពួកគេក៏បានរិះរកវិធីជួយបុគ្គលិកប្រមាណ ១៧០០០ នាក់ ដែលរងផលប៉ះពាល់ពិតការបិទឆ្នេរនេះ។
ក្ដីកង្វល់ចំពោះការខូចខាត រដ្ឋាភិបាលសម្រេចបិទកោះទេសចរណ៍ បូរ៉ាខេយ។ វិធានការនេះ បានបង្កជាក្ដីបារម្ភចំពោះបញ្ហាបរិស្ថានលើកោះទាំងមូល។
ក្រុមមន្ដ្រី បានព្រមានថា ទីកន្លែងប្រកបរបររកស៊ីលើកោះបានបញ្ចេញកាកសំណល់តាមទឹកចូលសមុទ្រ។ កាលពីខែកុម្ភៈ លោក ឌូទើតេ បានស្ដីបន្ទោសដល់សណ្ឋាគារ ភោជនីយដ្ឋាន និងជំនួញទេសចរណ៍ដទៃទៀត ដោយចោទប្រកាន់ម្ចាស់ឧស្សាហកម្មទាំងនោះបង្ហូរកាកសំណល់ចូលទឹកសមុទ្រដោយផ្ទាល់។
លោក ឌូទើតេ បានថ្លែងនាពេលនោះថា៖ «ខ្ញុំនឹងដាក់ទោសទណ្ឌដល់អ្នកព្រងើយកន្ដើយមិនបំពេញភារកិច្ចដែលធ្វើឲ្យកោះ បូរ៉ាខេយ ជាត្រពាំងត្រី ឬអាងស្ដុកទឹកសម្អុយ»។
លោកប្រធានាធិបតី បានបន្ដថា៖ «ជ្រើសរើសទៅថា តើអស់លោកត្រូវសម្អាតវាឲ្យស្អាត ឬខ្ញុំត្រូវបិទវាជារៀងរហូត»៕HR