ក្រុងប្រេស៊ីលីយ៉ា: ក្នុងខែឧសភានេះ អំឡុងពេលព្រឹត្ដិការណ៍ប្រកួតប្រចាំឆ្នាំ Fiesta de los Patios ទីធ្លាផ្ទះសំបែងអ្នកក្រុងខូរដូបា របស់អេស្ប៉ាញ បានអន្ទងចិត្ដភ្ញៀវទេសចរគ្រប់ទិសទី។ រយៈពេល ២ សប្ដាហ៍ ពលរដ្ឋបាននាំគ្នាបើកទ្វាររបងផ្ទះ ដែលធ្លាប់តែបិទបាំងពីក្រសែភ្នែកមហាជន លាតត្រដាងនូវសួនបុប្ផាចម្រុះពណ៌ព្រៃផ្លែឈើហូបផ្លែ និងជួរភ្នំប្រពៃណី។
អ្នកអាចស្រង់ក្លិនឈ្ងុយឈ្ងប់ចោលភាយពីសួនច្បារក្នុងផ្ទះ មុនពេលបានឃើញសម្រស់ដ៏ស្រស់បំព្រង។ ក្លិនឈ្ងុយនៃផ្កាម្លិះ និងសម្រស់ផ្ការីកពណ៌ទឹកក្រូចភាយចេញពីក្រោយជញ្ជាំងពណ៌ស ដែលឈរជារបាំងនៅតាមដងផ្លូវ។
នៅក្នុងទីធ្លាផ្ទះសល់តាំងពីសតវត្សរ៍ទី ១៦ ផ្កាក្រដាសរំលេចពណ៌ស្គុសស្គាយពីលើដំបូលខ្លោងទ្វារ រីឯស្រទាប់ផ្កាហោះហើរមកអណ្ដែតលើផ្ទៃទឹកក្នុងសួនមីរដេរដាស។
ចាប់ពីទីនោះ លាតសន្ធឹងរហូតដល់ក្រុងសាន់បាស៊ីលីយ៉ូ ជាកន្លែងដែលភ្ញៀវនឹងបានឃើញទីធ្លាផ្ទះដ៏ស្រស់ស្អាតបំផុតនៅខូរដូបា។
នៅក្នុងផ្ទះសំបែងរបស់អ្នកស្រី អារ៉ាសេលី ឡូប៉េស និងកូនស្រី អារ៉ា និងមេរីតសេលបានដាំផ្កាជាង ៦០ ប្រភេទ ដូចជា ផ្កាភេននីក្រេស ពណ៌ស្វាយ ផ្កាអ៊ីត្រាហ្គៀ ពណ៌ទឹកដោះគោ និងសេឡា លីលី រាងត្រំប៉ែត។ ផ្កាបេហ្គោនី ពណ៌ក្រហមឆ្អិនឆ្អៅ និងហ្វុកសៀ ពណ៌ផ្កាឈូក ដិតរំលេចនូវសម្រស់ផុសចេញពីរុក្ខជាតិ ៥០០ ប្រភេទទៀតដែលដុះរណេងរណោងតាមជញ្ជាំង។
អ្នកស្រី អារ៉ាសេលី បានថ្លែងជាភាសាអេស្ប៉ាញថា៖ «សួនផ្កាទាំងនេះ បានរំឭកប្រាប់យើងពីប្រភពកំណើតរបស់យើង។ ដូនតារបស់យើងប្រាប់ពីរបៀបរបបរស់នៅរបស់ពួកគេ និងឫសគល់របស់ពួកគេ»។
ការប្រកួតសួនផ្កា ក្នុងផ្ទះស្អាត Fiesta de los Patios ដំបូងត្រូវបានរៀបចំឡើងក្នុងឆ្នាំ ១៩១៨។
ក្នុងរូបភាពខិត្តប័ណ្ណរចនាយ៉ាងស្រស់ស្អាតកាលពីពេលនោះ រំលេចរូបភាពនារីសិចស៊ី ២ នាក់ ដែលម្នាក់គ្រងកន្សែងស្បៃពណ៌ខ្មៅ និងម្នាក់ទៀត គ្រងរ៉ូបផ្កាភ្ញី បក់ដៃស្វាគមន៍ភ្ញៀវមកលេងក្រុងខូរដូបា។ ប៉ុន្ដែសួនច្បារផ្ទះអាចមានប្រវត្ដិតាំងពីសម័យ Al-Andalus ពីឆ្នាំ ៧១១ ដល់ឆ្នាំ ១២៣៦។
ដំណើរកម្សាន្ដទៅកាន់ទីប្រវត្ដិសាស្ដ្រនេះ ភ្ញៀវអាចស្នាក់នៅសណ្ឋាគារហ៊ុមព័ទ្ធដោយបុប្ផាតោងជញ្ជាំង មានតម្លៃ ១៦៨ ដុល្លារ ហើយបើអ្នកគ្រោងមកលេងនៅក្នុងខែមេសា និងឧសភា ចូរកក់ទុកមុនយ៉ាងតិច ៥ ខែ៕HR