.jpg)
អ្នកដំណើរចុះថតរូបអនុស្សាវរីយ៍ជាមួយទេសភាពភ្នំឱរ៉ាល់ ផ្កាចង្រ្កង់ស្វា និងចម្ការអំពៅ។ ផា លីណា
ក្រុងច្បារមន: ក្នុងគោលបំណងលើកកម្ពស់សោភណភាពតំបន់ទេសចរណ៍ធម្មជាតិឲ្យកាន់តែមានភាពទាក់ទាញជានិរន្ដរ៍ ភ្ញៀវទេសចរទាំងជាតិ និងអន្ដរជាតិត្រូវបានលើកទឹកចិត្ដឲ្យចូលរួមដំណើរកម្សាន្ដ និងសម្អាតបរិស្ថានចេញព្រឹកវិលវិញល្ងាចទៅកាន់តំបន់ទឹកធ្លាក់ជ្រាវជើងភ្នំឱរ៉ាល់នាឱកាសចុងសប្ដាហ៍នេះ។
ទឹកធ្លាក់ជ្រាវស្ថិតក្នុងតំបន់ទីឋានមនោរម្យដ៏មានសក្ដានុពលក្នុងការ ទាក់ទាញភ្ញៀវទេសចរមកលេងទឹកដីឃុំអមលាំង ខេត្ដកំពង់ស្ពឺ រួមជាមួយទេសភាពភ្នំឱរ៉ាល់ ផ្កាចង្ក្រង់ស្វា និងចម្ការអំពៅដែលទទួលស្វាគមន៍ភ្ញៀវទេសចររាប់រយនាក់ក្នុង ១ ថ្ងៃ។ ប៉ុន្ដែជាមួយនឹងចំនួនភ្ញៀវទេសចរដ៏ច្រើននេះ តំបន់ទឹកធ្លាក់ជ្រាវក៏កំពុងញាំញីដោយកាកសំណល់រាយប៉ាយពាសពេញដី ដែលកំពុងបាំងបិទសម្រស់ធម្មជាតិបន្ដិចម្ដង។
លោក ជា ថុង ជាម្ចាស់ក្រុមហ៊ុនទេសចរណ៍ Vana Adventure Travel ដែលបានរៀបចំដំណើរកម្សាន្ដ និងសម្អាតបរិស្ថាននេះបាននិយាយថា ការយកចិត្ដទុកដាក់ និងការថែរក្សាអត់មាន តំបន់ទឹកធ្លាក់ជ្រាវមានសំរាមរាយប៉ាយខ្លាំង ចាប់ពីច្រកចូលជើងដំណើររហូតដល់ទឹកធ្លាក់សុទ្ធតែសំរាម ដូចជា កំប៉ុងទឹក សម្បកកញ្ចប់ស្នោ និងថង់ប្លាស្ទិក។
លោកបន្ដថា៖ «យើងអត់ចង់ឲ្យតំបន់ធម្មជាតិនេះគ្រប់គ្រងដោយសំរាមនោះទេ។ យើងចង់ឲ្យពលរដ្ឋយើងចេះថែរក្សាសម្រស់ធម្មជាតិ។សូម្បីតែអ្នកលក់ដូរនៅតំបន់នោះ ក៏ពួកគាត់មិនបានសម្អាតសំរាមរបស់ខ្លួនឲ្យបានស្អាតបាតឡើយ»។
នៅលើការផ្សព្វផ្សាយរបស់ក្រុមហ៊ុនទេសចរណ៍ ដែលទទួលបានវិញ្ញាបនបត្រល្អប្រសើរពី TripAdvisor ក្នុងឆ្នាំ ២០១៧ បានបង្ហាញថា ភ្ញៀវទេសចរជាតិ ដែលចំណាយប្រាក់ ៧២ ០០០ រៀលម្នាក់ និងភ្ញៀវបរទេស ១០ ម៉ឺនរៀលម្នាក់ នឹងទទួលបានសេវាកម្មរថយន្ដធ្វើដំណើរទាំងទៅតំបន់រមណីយដ្ឋាន និងមកភ្នំពេញវិញ អ្នកសម្របសម្រួល និងក្រុមការងារ អាហារពេលព្រឹក ១ ពេល និងថ្ងៃត្រង់ ១ ពេល ស្រោមដៃពេទ្យ និងទឹកពិសា ដែលចេញដំណើរនៅថ្ងៃអាទិត្យ ទី ២២ ខែកក្កដា ខាងមុខនេះ។
ក្រុម Vana Aventure Travel និងភ្ញៀវចូលរួមសម្អាតបរិស្ថាន។ សហការី
ដំណើរកម្សាន្ដនេះគ្រោងទទួលភ្ញៀវពី ៣០ ទៅ ៣៥ នាក់ ក្រោមយុទ្ធនាការចូលរួមសម្អាតជាមួយគ្នា។ ជាមួយគោលបំណងនាំគ្នាសម្អាត និងបញ្ជ្រាបចំណេះដឹងបរិស្ថានស្អាតដល់អ្នករកចំណូលពីវិស័យទេសចរណ៍នៅតំបន់ជ្រាវ ម្ចាស់ក្រុមហ៊ុនទេសចរណ៍ ដែលមានបទពិសោធនាំភ្ញៀវជិះកង់ ដើរឡើងភ្នំ នាំសិស្សចុះកម្មសិក្សា និងទស្សនាបក្សីរូបនេះ បានប្រាប់ថា អ្នកចូលរួមត្រូវមានថង់ប្លាស្ទិកច្រកសំរាម និងតង្កៀបកៀបសំរាមខ្លួនឯង ព្រមទាំង ស្លៀកពាក់តាមចំណូលចិត្ដខ្លួនឯង។
ម្ចាស់ Vana Adventure Travel អាយុ ៣៧ ឆ្នាំរូបនេះ បានបញ្ជាក់ថា៖ «យើងចង់ឲ្យអ្នកចូលរួមទាំងអស់ចេះទទួលខុសត្រូវចំពោះកិច្ចការសម្អាតបរិស្ថានដោយផ្ដើមពីការរៀបចំសម្ភារសម្អាតខ្លួនឯង។ យើងក៏មិនប្រើឯកសណ្ឋានក្រុមរើសសំរាមដូចៗគ្នានោះទេ ដើម្បីឲ្យអ្នកដទៃយល់ថា ទាល់តែក្រុមការងារពិសេស ទើបជាអ្នកថែរក្សាបរិស្ថានពិតប្រាកដ។ តាមពិត មនុស្សគ្រប់រូបសុទ្ធតែអាចចូលរួមចំណែកថែរក្សាបរិស្ថានធម្មជាតិទាំងអស់គ្នា»។
តោះ!ចុះឈ្មោះចូលរួមដំណើរកម្សាន្ដ និងសម្អាតបរិស្ថាននៅតំបន់រមណីយដ្ឋានធម្មជាតិអមលាំងយើងនេះឯង។ ចំពោះព័ត៌មានលម្អិត សូមទាក់ទងលេខ ០១២ ៨៨៣ ៨៩៨៕
ភ្ញៀវទេសចរទៅលេងតំបន់ទឹកធ្លាក់ជ្រាវ ដែលញាំញីដោយសំរាម។ផា លីណា
