The Phnom Penh Post Search

Search form




Logo of Phnom Penh Post newspaper Phnom Penh Post - ដំណើរ​ផ្សង​ព្រេង​កូន​កាត់ Ford Adventure លើក​ទី​៩នាំ​​ក្បូន​រថយន្ដ​ទៅខេត្ដ​ចន្ទ​បុរី​ប្រទេស​ថៃ




ដំណើរ​ផ្សង​ព្រេង​កូន​កាត់ Ford Adventure លើក​ទី​៩នាំ​​ក្បូន​រថយន្ដ​ទៅខេត្ដ​ចន្ទ​បុរី​ប្រទេស​ថៃ

Content image - Phnom Penh Post
ក្បួន​រថយន្ដ​បរ​កាត់​ខេត្ដ​ប៉ៃលិន។ ហុង រស្មី

ដំណើរ​ផ្សង​ព្រេង​កូន​កាត់ Ford Adventure លើក​ទី​៩នាំ​​ក្បូន​រថយន្ដ​ទៅខេត្ដ​ចន្ទ​បុរី​ប្រទេស​ថៃ

ប៉ៃលិន និង ចន្ទ​បុរី: ក្បួន​រថយន្ដ​ដំណើរ​ផ្សង​ព្រេងកូន​កាត់​​ Ford Adventure ​​​ពី​ភ្នំ​ពេញ ឆ្លង​កាត់​ខេត្ដ​បាត់​ដំបង និង​ទឹក​ដី​ត្បូង​ពេជ្រ​នៃ​ខេត្ដ​ប៉ៃលិន ឆ្ពោះ​ទៅកាន់​រមណីយដ្ឋាន​នានា​ក្នុង​ខេត្ដ​​ចន្ទបុរីប្រទេស​ថៃ​​ ​រយៈ​ពេល​ ៤ ថ្ងៃ ៣​ យប់ ចាប់​ពីថ្ងៃ​ទី​១០ ដល់​ទី​១៣ ខែ​ធ្នូ ឆ្នាំ​២០១៥​​​បាន​ប្រព្រឹត្ដិ​ទៅ​​ក្រោម​សំណើច​ក្អាក​ក្អាយ​​ប្រកប​ដោយ​ក្ដី​សប្បាយ​រីក​រាយ និង​សាមគ្គីភាពជា​មហាគ្រួសារ​ខ្មែរ​តែ​មួយ​ ​ជាមួយ​នឹង​វត្ដមាន​​​រថយន្ដ​Ford គ្រប់​ម៉ូដែល​ ​ចំនួន​ជាង ៥០ គ្រឿង​ ដែលមាន​អ្នក​ចូលរួម​​ប្រមាណ​ជា ៣០០ នាក់​។

Content image - Phnom Penh Post
ក្រុម​ការងារ​ Ford ជួយ​តម្លើង​តង់​ជូន​ភ្ញៀវ។ ហុង រស្មី

ពី​ព្រឹក​ព្រលឹម​ស្រាង​ៗ​ Ford Ranger, Ford Everest, Ford Explorer និង​ម៉ូដែល​ Ford មួយ​ចំនួន​បាន​មក​ប្រមូល​ផ្ដុំ​គ្នា​បង្កើត​ជា​ក្បួន​រថយន្ដ​ដ៏​ធំ​មួយ​ដោយ​បាន​ចេញ​ដំណើរ​បន្ដ​កន្ទុយ​គ្នា​យ៉ាង​វែង​អន្លាយ​ពី​ភ្នំ​ពេញ​ឆ្លង​កាត់​ខេត្ដ​កំពង់​ឆ្នាំង​ ពោធិសាត់​ បាត់​ដំបង និង​ខេត្ដ​ប៉ៃលិន​ នៅថ្ងៃ​ទី​១០ ខែ​ធ្នូ​ ឆ្នាំ​២០១៥ កន្លង​ទៅនេះ​។

នៅ​ក្នុង​ឱកាស​នៃ​ដំណើរ​កម្សាន្ដ​ដ៏​រីក​រាយ​នេះ អតិថិជន​ Ford និង​ក្រុម​ការងារ បាន​ចែក​អំណោយ​សប្បុរសធម៌​ដល់​ប្រជាពលរដ្ឋ​ក្រី​ក្រ​រស់​នៅ​ក្នុង​ខេត្ដ​ប៉ៃលិន​ ២០០ គ្រួសារ​ ដែល​រួម​មាន អង្ករ ទឹក​ត្រី មី មុង ភួយ​ជាដើម ក្រោម​អធិបតីយភាព​របស់​លោក កើត សុធា អភិបាល​នៃ​គណៈ​អភិបាល​ខេត្ដ​ប៉ៃលិន​ និង​លោក គុយ ណារ៉េត សមាជិក​ក្រុម​ប្រឹក្សា​ខេត្ដ​ប៉ៃលិន​ ក៏​ដូចជា​អភិបាល​ក្រុង​ប៉ៃលិន​ជាដើម​។

Content image - Phnom Penh Post
អ្នក​ចូលរួម​កំពុង​រៀបចំ​តង់​សម្រាប់​ស្នាក់​អាស្រ័យ​មួយ​រាត្រី​នៅ​ក្នុង​ខេត្ដ​ប៉ៃលិន។ ហុង រស្មី

ចំពោះ​ដំណើរ​កម្សាន្ដ​លើក​ទី​៩នេះ លោក ញ៉ែម រិទ្ធី ប្រធាន​គ្រប់​គ្រង​អភិវឌ្ឍ​ផ្នែក​អាជីវកម្ម​និង​ជា​តំណាង​ក្រុមហ៊ុន RMA Cambodia បាន​ឲ្យ​ដឹង​ថា​៖ «​ជា​រៀងរាល់​ឆ្នាំ​ក្រុមហ៊ុន​តែងតែ​រៀបចំ​ដំណើរ​កម្សាន្ដ​សម្រាប់​អតិថិជន​ទៅកាន់​រមណីយដ្ឋាន​នានា​ទាំង​នៅ​ក្នុង និង​ក្រៅ​ប្រទេស​ ជាមួយ​នឹង​ក្បួន​រថយន្ដ​ Ford គ្រប់​ម៉ូដែល​ក្នុង​គោល​បំណង​រឹត​ចំណង​សាមគ្គី​ភាព​រវាង​ក្រុមហ៊ុន និង​អតិថិជន​ ក៏​ដូចជា​បង្កើត​នូវ​ការ​ប្រាស្រ័យ​ទាក់​ទង​ល្អ​រវាង​អតិថិជន និង​អតិថិជន​ទាំង​អស់​»។

Content image - Phnom Penh Post
ក្បួន​រថយន្ដ Ford ត្រៀម​ចេញ​ដំណើរ​កម្សាន្ដ​ក្នុង​ទឹក​ដី​ថៃ។ ហុង រស្មី

ប៉ៃលិន​ជា​ទី​សំចត​មួយ​រាត្រី​របស់​ក្រុម​ដំណើរ​កម្សាន្ដ​អតិថិជន​ Ford លើ​ទីវាល​ដ៏​ធំ​ល្វឹង​ល្វើយ​​ ក្រោម​ការ​ផ្ដល់ការ​ការពារ​​សន្ដិសុខ​ពី​អជ្ញាធរ​ខេត្ដ​យ៉ាង​កក់​ក្ដៅ​។ បន្ទាប់​ពី​បាន​រៀបចំ​តម្លើង​តង់​សម្រាក​រៀង​ៗ​ខ្លួន​ដោយ​មាន​ការ​ជួយ​យ៉ាង​យក​ចិត្ដ​ទុក​ដាក់​ពី​ក្រុម​ការងារ​ Ford អ្នក​ចូល​រួម​ទាំង​អស់​បាន​ទទួល​ទាន​អាហារ​ពេល​ល្ងាច​ក្រោម​ជំនោរ​ត្រសៀក​ៗ​បក់​ផាត់​ពី​ចម្ការ​មៀន​ប៉ៃលិន (តាង៉ែន​)​ ខណៈ​ក្រុម​តន្ដ្រី​ប៉ៃលិន​ប្រគំ​កំដរ​សម្រាប់​ឲ្យ​ភ្ញៀវ​រាំ​លេង​កម្សាន្ដ​។

ថ្ងៃ​ចាប់​ផ្ដើម​រះ​បញ្ចេញ​រស្មី​ជះ​លើ​កំពូល​ភ្នំ​នា​ទិស​ខាង​កើត តង់​ទាំង​អស់​ត្រូវបាន​ប្រមូល​បត់​ទុក​ដាក់​រួច​ស្រេច​ ហើយ​ភ្ញៀវ​ផ្ដើម​រូត​រះ​ចេញ​ដំណើរ​ទៅកាន់​ព្រំ​ដែន​កម្ពុជា​-​ថៃ​ត្រង់​ច្រក​ភូមិ​ផ្សារ​ព្រំ​។ ឆ្លង​ទៅ​ដល់​ទឹក​ដី​ថៃ ក្បួន​រថយន្ដ​ប៉ូលិស​ថៃ​បាន​ត្រៀម​ចាំ​ជា​ស្រេច​ដើម្បី​ដឹក​នាំ​ក្រុម​ Ford Adventure ទៅ​កាន់​គោល​ប្រកប​ដោយ​សុវត្ថិភាព​។

សម្រាប់​ដំណើរ​កម្សាន្ដ​ថ្ងៃ​ទីពីរ ក្បួន​រថយន្ដ​ Ford បាន​ទៅកម្សាន្ដ​ឧទ្យាន​បាត​សមុទ្រ​ និង​មជ្ឈមណ្ឌល​ស្រាវជ្រាវ​ព្រៃ​កោង​កាង Kung Krabean Bay ក្នុង​ខេត្ដ​ចន្ទ​បុរី​ចម្ងាយ​ប្រមាណ​ជាង ១០០ គីឡូម៉ែត្រ​ពី​ព្រំ​ដែន​។ ​​ពេល​ថ្ងៃ​បាក់​រសៀល ក្បួន​រថយន្ដ​បាន​មក​កាន់​រមណីយដ្ឋាន​ Beautiful The Sea ក្បែរ​ឆ្នេរ​សមុទ្រ​ Chaolao ​ដើម្បី​រៀបចំ​តម្លើង​តង់​សម្រាប់​សម្រាក​រយៈ​ពេល​ពីរ​ថ្ងៃ​។ នារាត្រី​ថ្ងៃ​ទី​១១ នេះ អ្នក​ចូលរួម​ទាំង​អស់​ស្រស់​ស្រូប​អាហារពេល​ល្ងាច​ជុំ​គ្នា​ និង​រាំ​លេង​កម្សាន្ដ​ជាមួយ​វង់​ភ្លេង​ពី​ប៉ៃលិន​។

Content image - Phnom Penh Post
តង់​សម្រាប់​នៅ​ក្បែរ​ឆ្នេរ​ Chaolao ប្រទេស​ថៃ។ ហុង រស្មី

ដម​ដំណើរ​ដោយ​ក្បួន​រថយន្ដ​ប៉ូលិស​ថ្ងៃ និង​ក្រុមការងារ​ Ford ជា​ច្រើន​នាក់ ក្បួន​រថយន្ដ Ford Adventure បាន​បន្ដ​ដំណើរ​របស់​ខ្លួន​នា​ថ្ងៃ​ទី​៣ ឆ្ពោះ​ទៅកាន់​ទឹក​ធ្លាក់ ១៣ ជាន់ និង​ទទួល​ទាន​អាហារ​ថ្ងៃត្រង់​នៅ​ឧទ្យាន​ជាតិ​​ Khao Khitchahkut ក្នុង​ខេត្ដ​ចន្ទ​បុរី​ដដែល​។

នៅ​រសៀល​ថ្ងៃ​ទី​១២ នេះ ជា​ឱកាស​ដែល​ក្រុម​អ្នក​ចូលរួម​មិន​អាច​ខក​ខាន​បាន​នូវ​ការ​ដើរ​ផ្សារ​ទិញ​ទំនិញ​តម្លៃថោក​បោះ​ដុំ​ក្នុង​ផ្សារ​ម៉ាក្រូ​។ សកម្មភាព​វេច​ខ្ចប់​ទំនិញ​គ្រប់​មុខដើម្បី​ទុក​ដាក់​លើ​រថយន្ដ​រៀង​ៗ​ខ្លួន​​ ត្រូវ​បាន​ធ្វើ​ឡើង​នៅ​បរិវេណខាង​ក្រៅ​ផ្សារ​ ក្រោយ​ការ​ជួយ​ពី​ក្រុម​ការងារ និង​បុគ្គលិក​ផ្សារ​។ ក្នុង​ពេល​សប្បាយ​ដើរ​ផ្សារនេះ អ្នក​ចូលរួម​ខ្លះ​បាន​លើក​ឡើង​ថា សូម​ផ្ទៀង​ផ្ទាត់​ទំនិញ​ និង​វិក្ក័យបត្រផង​ ដោយ​សារតែ​មាន​ការ​វាយ​មុខ​ទំនិញ​លើស​ច្រើន​គួរ​ក្នុង​វិក្ក័យ​បត្រ​គិត​លុយ​។

Content image - Phnom Penh Post
ក្រុម​អ្នក​ចូលរួម​ថត​រូប​អនុស្សាវរីយ៍​ជុំ​គ្នា​នៅ​ឧទ្យាន​ទឹក​ធ្លាក់​ ១៣ ជាន់​នៃ​ខេត្ដ​ចន្ទបុរី។ ហុង រស្មី

នារាត្រី​ដ៏​សែន​មនោរម្យ តន្ដ្រី​ចាប់​ផ្ដើម​ប្រគំ​ជា​ចង្វាក់​ប្រពៃណី​ខ្មែរ​លើ​ទឹក​ដៅ​ប្រទេស​ថៃ អតិថិជន​ ​ទទួល​ទាន​​អាហារ​គ្រឿង​សមុទ្រ​អាំង​រសជាតិ​ឈ្ងុយ​ឆ្ងាញ់​បណ្ដើរ​ និង​រីករាយ​កម្មវិធី​កំប្លុក​កំប្លែង​ពី​បុគ្គលិក​ Ford ក្នុង​គោល​បំណង​ផ្ដល់​ស្នាម​ញញឹម​មិន​អាច​បំភ្លេច​បាន​។

ទោះបីជា​យ៉ាង​ក៏ដោយ ក៏​អតិថិជន​មួយ​ចំនួន​ដែល​មិន​ផ្សាំ​នឹង​ការ​សម្រាក​បែប​ពាក់​កណ្ដាល​ផ្សង​ព្រេង​នេះ មាន​ការ​ត្អូញ​ត្អែរ​លើ​បញ្ហា​បន្ទប់​ទឹក​​ជា​ចម្បង​៕

អត្ថបទគួរចាប់អារម្មណ៍