ខេត្តក្រាប៊ីថៃៈ Phi Phiជាកោះដ៏ល្បីរន្ទឺមួយនៅក្នុងចំណោមកោះនានានៅប្រទេសថៃ។ ដើម្បីទៅកាន់កោះដ៏ស្រស់ស្អាតនេះ ប្រសិនបើធ្វើដំណើរចេញពីខេត្តក្រាប៊ីទៅតាមអូប័រ នោះគឺត្រូវចំណាយពេលមួយម៉ោង តែមុននឹងទៅដល់ទីនោះ ភ្ញៀវទេសចរនឹងភ្ញាក់ផ្អើលជាមួយនឹងទេសភាពប្លែកនៅតាមផ្លូវទឹកទៅកាន់កោះPhi Phiដោយសារតែដំណើរនោះត្រូវឆ្លងកាត់កោះចំនួន៤ដូចជាកោះtupកោះមាន់កោះPodaនិងកោះ Talay Waek។
គ្រាន់តែទៅដល់កោះនោះភ្លាមភ្ញៀវទេសចរម្នាក់ៗស្ទើរតែមិនជឿថានោះជាដែនដីកោះទេ ដោយសារតែទីនោះមានផ្ទះថ្មធំៗសណ្ឋារគារប្រណីតៗជាច្រើនដែលរចនាម៉ូដប្លែកៗពីគ្នាជាពិសេសទិដ្ឋភាពនៅទីនោះហាក់ដូចជាទិដ្ឋភាពនៅក្នុងទីក្រុងតូចមួយអ៊ីចឹង។
នៅទីនោះភ្ញៀវនឹងទទួលបានអារម្មណ៍ប្លែកទាំងអស់គ្នាជាមួយនឹងការដើរទស្សនាផ្សារតាមបណ្តោយផ្លូវ(street market)។ ផ្សារនៅទីនោះគឺមានលក្ខណៈជាផ្ទះតូចៗធ្វើជាប់គ្នាតាមដងផ្លូវហើយភាគច្រើនឃើញមានលក់វត្ថុអនុស្សាវរីយ៍ប្រចាំតំបន់ ដូចជាអាវយឺតបោះពុម្ពរូបប្លែកៗគួរឲ្យទាក់ទាញជាដើម។
រីឯផ្ទះខ្លះលក់ឈុតហែលទឹកកាបូបជ័រសម្រាប់ដាក់របស់របរសំខាន់មិនជ្រាបទឹក ហើយនៅទីនោះមានកន្លែងសាក់រូបហាងកក់សក់ក្រងសក់ដែលជាទីពេញនិយមរបស់ភ្ញៀវទេសចរ។ ដោយឡែកសម្រាប់ការក្រងសក់ភ្ញៀវភាគច្រើនពេញនិយមក្រងសក់បែបពួកអា្រហ្វិក។ ក្រៅពីនោះមានកន្លែងម៉ាស្សាបែបប្រពៃណីកន្លែងលក់សំបុត្រទូកសម្រាប់ជិះទៅកម្សាន្តនៅកោះនានាក្បែរនោះ។ អ្វីដែលពិសេសនោះគឺ កោះ Phi Phiមានកន្លែងប្តូរលុយដែលនេះជាចំណុចសំខាន់បំផុតសម្រាប់ភ្ញៀវទេសចរត្រូវការពីព្រោះគេអត់ប្រើលុយដុល្លារនោះទេ។
បន្ថែមពីលើនេះទៅទៀតគេឃើញមានហាង 7elevenនិងហាងដុតនំមួយចំនួននៅទីនោះផងដែរហើយក៏មានបារ៍កម្សាន្តជាច្រើនកន្លែង។ ភ្ញៀវទេសចរអាចទទួលបានទិដ្ឋភាពប្លែកៗនៅក្នុងទីកម្សាន្តមួយដែលមានឈ្មោះថា Pirate Island Adventures ដែលទីនោះជាកន្លែងសិប្បនិមិត្តសម្រាប់ភ្ញៀវចូលទៅមើលរូបភាពប្លែកៗជាលក្ខណៈXD theater 6D Motion Ride experience។ បើដើរហត់នឿយ ភ្ញៀវទេសចរក៏អាចជួលកង់ជិះលេងជុំវិញកោះនោះបានផងដែរក្នុងតម្លៃសមរម្យប្រមាណ ៧ ដុល្លារក្នុងមួយថ្ងៃ។
ដោយឡែកសម្រាប់កន្លែងស្នាក់នៅវិញ ដូចជាមានតម្លៃមិនថ្លៃណាស់ណាទេ។ បើសិនចង់ស្នាក់នៅសណ្ឋាគារលំដាប់ផ្កាយ៣ ដូចជា Phi Phi Banyan Villa Hotelដែលមានអាងហែលទឹកបន្ទប់បំពាក់ដោយឧបករណ៍ទំនើបៗកន្លែងហាត់ប្រាណនោះ គឺមានតម្លៃចាប់ពី១០០ដុល្លារដល់ទៅ៣០០ដុល្លារតាមលំដាប់បន្ទប់។
សម្រាប់ការស្នាក់នៅសណ្ឋាគារធម្មតាវិញគឺមានតម្លៃប្រមាណ ៦៥ ដុល្លារឡើងទៅ គឺគិតទៅតាមរដូវកាលហើយក៏មានកន្លែងមានតម្លៃសមរម្យជាច្រើនទៀតផងដែរ។ ភ្ញៀវទេសចរទាំងអស់ក៏អាចស្នាក់នៅបឹងកាឡូតូចៗដែលមានតម្លៃប្រមាណ ១៦ ដុល្លារផងដែរ។
ដោយឡែកនៅពេលយប់វិញ ភ្ញៀវទាំងអស់នឹងអាចទទួលបានភាពរីករាយជាមួយនឹងទិដ្ឋភាពនៃការសម្តែងព្រួសភ្លើងការសម្តែងរបស់ក្រុមភេទទីបីការប្រគំតន្រ្តីផ្សាររាត្រីលក់វត្ថុប្លែកនិងសកម្មភាពជាច្រើនទៀត។
ព័ត៌មានទាក់ទិនការហោះហើរទៅខេត្តក្រាប៊ីអាចទាក់ទងក្រុមហ៊ុនបាងកកអ៊ែរវេ ស្ថិតនៅអគារ៦១អា ផ្លូវ២១៤សង្កាត់បឹងរាំង ខណ្ឌដូនពេញ ឬទាក់ទងតាមទូរស័ព្ទ០២៣ ៩៦៦ ៥៥៦ និង ០៩៧ ៧៣៣ ៤៣០៩ ហើយអ្នកក៏អាចទាក់ទងតាមក្រុមហ៊ុនទេសចណ៍វើលផប (World PopTravel & Tour) ផងដែរតាមទូរស័ព្ទ ០២៣ ៩៩៤ ៧៨៩៕
