ភ្នំពេញ៖ មុនពេលឡើងរថយន្ដក្រុង លោក បេង ហាប់ បានឱ្យដឹងថា លោកស្រឡាញ់កសិកម្មតាំងពីតូច និងចង់ឃើញដំណាំបន្លែបង្ការ ដែលបង្កបង្កើនផលទៅតាមវិធីធម្មជាតិ។
លោកបាននាំភរិយា និងកូនស្រីអាយុ ៣ ឆ្នាំ មកចូលរួមកម្មវិធីទេសចរណ៍បែបកសិកម្ម ជាមួយភ្ញៀវដែលខ្លះជាបុគ្គលិកក្រុមហ៊ុនឯកជន ខ្លះមន្ដ្រីរាជការ និងខ្លះទៀតជាបុគ្គលិកអង្គការ ហើយសុទ្ធសឹងតែមានចំណូលចិត្តរួមដូចគ្នា គឺការដាំដុះ និងចិញ្ចឹមសត្វ។
បុរសអាយុ ៣២ ឆ្នាំជាអតីតពេទ្យសត្វរូបនេះបាននិយាយថា៖ «យើងចង់ឃើញចម្ការ យើងចង់ឃើញគេដាំដុះបន្លែផ្ទាល់ភ្នែក តែមិនដឹងថា ត្រូវធ្វើដូចម្ដេច ដើម្បីបានឃើញទេ ពីព្រោះយើងមិនហ៊ានចូលមើលចម្ការគេដោយគ្មានការអនុញ្ញាត ហើយពេលដើរលេងលក្ខណៈធម្មតាៗ យើងអត់ស្គាល់»។
រថយន្ដក្រុងពិសេស ដែលដឹកភ្ញៀវចេញពីរាជធានីភ្នំពេញ ផ្ដើមបោះពួយតាមផ្លូវជាតិលេខ ៥ ឆ្ពោះទៅកាន់ស្រុកសាមគ្គីមានជ័យ ជាចំណតដែលពួកគេទស្សនាសិក្សាផ្នែកស្វែងយល់ពីការធ្វើកសិកម្មក៏ដូចជាទទួលទានអាហារចម្អិនពីបន្លែ ត្រី និងសាច់ពីកសិកម្មក្នុងសហគមន៍សុទ្ធសាធ។
លោក ញឿន ចាន់រ៉េត ជាអ្នកដឹកនាំក្រុមដំណើរកម្សាន្ដបានធ្វើការណែនាំអំពីការកកើតកសិធួរ ការណែនាំឱ្យស្គាល់នូវមិត្ដភក្ដិថ្មីៗ និងការជជែកសួរនាំ ជុំវិញបញ្ហាកសិកម្ម។
ក្នុងចំណោមសមាជិក ៣ នាក់រៀនផ្នែកកសិកម្ម លោកបន្តថា៖ «សមាជិកម្នាក់ទៀត គាត់ជាអ្នកមានជំនាញផ្នែកទេសចរណ៍ ដែលកំពុងសិក្សានៅប្រទេសថៃ។ យើងក៏បានចងក្រងគ្នាបង្កើតជាកសិធួរនេះឡើង»។
សំណើចក្អាកក្អាយលាយឡំនឹងការជជែកអំពីប្រធានបទកសិកម្មជាហូរហែបានកន្លងផុតទៅយ៉ាងឆាប់រហ័ស ខណៈពេលរថយន្ដក្រុងបានបត់ក្បាលចូលបរិវេណដីដ៏ធំមួយ ដែលមានដំឡើងឧបករណ៍វាស់កម្ដៅ និងបាញ់សម្លាប់មេរោគ។
ទឹកឪឡឹកកិនស្រស់ៗត្រូវបានដាក់ទទួលស្វាគមន៍ភ្ញៀវ ដើម្បីបន្ធូរបន្ថយភាពនឿយហត់ និងបំបាត់ការស្រេកទឹក មុនពេលពួកគេដើរទស្សនារីសតបាងហ្គាឡូរចនាប័ទ្មខ្មែរ ដែលត្រូវបានសង់ឡើងក្នុងបរិស្ថានសួនបន្លែ និងម្លប់ឈើធំៗ។
លោក ញឹប ភារ៉ា អ្នកគ្រប់គ្រងបាងហ្គាឡូ ផ្ទះកសិដ្ឋាន (Farmhouse) ដែលបាននាំភ្ញៀវទស្សនារីសតផ្ទះឈើបានប្រាប់ថា៖ «ចំពោះការស្នាក់នៅបាងហ្គាឡូទាំងនេះ ដែលមានតម្លៃចាប់ពីជាង ៤០ ទៅជិត ២០០ ដុល្លារ ក្នុង ១ យប់ ភ្ញៀវទទួលបាននូវអាហារពេលព្រឹក farm tour កង់ជិះ អាងទឹក កន្លែងហាត់យោគៈ ដោយឥតគិតថ្លៃ។
ក្រោយពីទស្សនាទីឋានបដិសណ្ឋារកិច្ចរបស់ផ្ទះកសិដ្ឋាន ទេសចរត្រូវបានទទួលស្វាគមន៍ជាមួយអាហារថ្ងៃត្រង់ ដែលរៀបចំឡើងយ៉ាងពិសេសជាមួយអាហារបន្លែ ត្រី និងសាច់មាន់យកពីកសិដ្ឋានផ្ទាល់ មុនពេលពួកគេបន្ដមើលសួនបន្លែ ស្រះត្រី និងទ្រុងមាន់។
លោក ចេង វុទ្ធី សហស្ថានិកកសិធួរ (Kase Tour) ជាអ្នកគ្រប់គ្រងដំណើរកម្សាន្ដបាននិយាយថា៖ «ការបង្កើតកសិធួរ គឺដើម្បីផ្សារភ្ជាប់កសិកម្ម និងទេសចរណ៍។ យើងឃើញថា វាពិតជាល្អសម្រាប់ការបណ្ដុះគំនិតឱ្យប្រជាជនខ្មែរស្រឡាញ់ និងលើកស្ទួយកសិកម្មក៏ដូចជាទេសចរណ៍»។
កសិធួរ ត្រូវបានបង្កើតឡើង ៣-៤ ខែចុងក្រោយនេះ ហើយដំណើរកម្សាន្ដទៅកាន់សួនបន្លែផ្ទះកសិដ្ឋាន ក្នុងខេត្ដកំពង់ឆ្នាំង គឺជាបទពិសោធលើកដំបូងរបស់ក្រុម។
សម្រាកបាយថ្ងៃត្រង់បន្ដិច ភ្ញៀវចាប់ផ្ដើមដើរទស្សនាផ្ទះសហគមន៍ រចនាប័ទ្មផ្ទះឈើប្រក់ក្បឿងខ្ពស់ផុតដី ហ៊ុមព័ទ្ធដោយសួនបន្លែចម្រុះ និងបន្ដទៅទ្រុងចិញ្ចឹមមាន់ រួចឆ្ពោះទៅកាន់សួនបន្លែធំៗ ស្រះត្រី និងរោងជាង។
លោកថា៖ «ដំណើរកម្សាន្ដនេះ យើងផ្ដោតសំខាន់លើការដើរទស្សនា និងស្វែងយល់អំពីកសិកម្ម រហូតដល់ ៧០ ភាគរយ និង ៣០ ភាគរយទៀតយើងផ្ដោតលើការកម្សាន្ដទូទៅ»។
ភ្ញៀវទេសចរទទួលបាននូវការធ្វើបទបង្ហាញនៅតាមទីតាំងផ្ទាល់ជាច្រើន ក៏ដូចជាការបង្ហើបប្រាប់អំពីគន្លឹះដាំដុះស្នូលមួយចំនួនពីអ្នកជំនាញ។
កញ្ញា ផល គីមសាន បាននិយាយពេលរថយន្ដក្រុងវិលត្រឡប់ទៅរាជធានីវិញនៅម៉ោង ៥ ល្ងាចថា៖ «ខ្ញុំចាប់អារម្មណ៍ខ្លាំងចំពោះដំណើរកម្សាន្ដនេះ គឺដំណាំបន្លែដែលមានសម្បូរបែបតាំងពីដំណាំស្លឹក ដើម មើម និងផ្លែ»។
ចំណែកឯលោក បេង ហាប់ ដែលបច្ចុប្បន្នជាបុគ្គលិកនៅក្រុមហ៊ុនស្រាបៀរក្នុងស្រុកមួយ ឆ្លៀតសរសេរលើហ្វេសប៊ុកក្រោយបញ្ចប់ដំណើរកម្សាន្ដថា៖ «ស្រូបខ្យល់បរិសុទ្ធ សួនបន្លែធម្មជាតិ ស្រះចិញ្ចឹមត្រី ដំណាំស្លឹកសម្រាប់ធ្វើជាចំណីឱ្យមាន់ស្រែ។ ពិតជាស្រស់ស្រាយ!»។
កសិធួរមានទំព័រហ្វេសប៊ុក @camkasetour ឬទាក់ទងលេខទូរស័ព្ទ ០៧៧ ៩៥៨ ៧៩៧៕