The Phnom Penh Post Search

Search form




Logo of Phnom Penh Post newspaper Phnom Penh Post - តោះ! ជិះទូក​ញ៉ាំ អាហារ​បែប​ទំនើប​ គយគន់​ទេសភាព​ទន្លេ​ចតុមុខ​យើង




តោះ! ជិះទូក​ញ៉ាំ អាហារ​បែប​ទំនើប​ គយគន់​ទេសភាព​ទន្លេ​ចតុមុខ​យើង

Content image - Phnom Penh Post
ភ្ញៀវ​អាច​ទទួល​ទាន​អាហារ និង​ស្រា បែប​ភោជនីយដ្ឋាន​លំដាប់​ខ្ពស់​ និង​គយគន់​ទេសភាព​ដង​ទន្លេ​។ ប៉ាន់ រចនា

តោះ! ជិះទូក​ញ៉ាំ អាហារ​បែប​ទំនើប​ គយគន់​ទេសភាព​ទន្លេ​ចតុមុខ​យើង

ភ្នំពេញ: សម្រាប់​អ្នក​ដែល​ចង់​ស្វែងរក​បទពិសោធ​ថ្មី​ប្លែក​ពីការ​កម្សាន្ត​លើ​គោក ប្រឈម​នឹងការ​ស្ទះ​ចរាចរណ៍​នោះ នាវា​លម្ហែកាយ NOIR & BLANC អាច​នាំ​អ្នក​បណ្ដែត​ខ្លួន​លើផ្ទៃ​ទឹក​ទន្លេ ស្រូប​ខ្យល់​អាកាស​ស្រស់​ថ្លា និង​ទទួលទាន​អាហារ​បែប​ហាង​លំដាប់​ខ្ពស់​ទៀត​ផង។

ខណៈដំណើរ​កម្សាន្ត​ជិះទូក​ទេសចរណ៍​ទទួល​បានការ​ពេញ​និយម មិន​ថា​ពី​ភ្ញៀវ​ខ្មែរ ឬ​ភ្ញៀវ​បរទេស​នោះ ក្នុង​ចំណោម​នាវា​ដឹក​ភ្ញៀវ​លម្ហែកាយ​ទាំង​នេះ NOIR & BLANC មានការ​រចនា​តុបតែង សេវាកម្ម និងការ​បម្រើ​ម្ហូបអាហារ​ខុសប្លែក​ពីទូក​ដទៃ​ទៀត។

កំពុង​រៀបចំ​តុ​កៅអី​ស្វាគមន៍​ភ្ញៀវ​បណ្ដើរ កញ្ញា​ចាន់ វិច្ឆិកា ជំនួយការ​អ្នកគ្រប់គ្រង​ប្រចាំ NOIR & BLANC និយាយ​ទាំង​ទឹកមុខ​រីករាយ​បណ្តើរ​ដែរ​ថា៖ «ដោយសារ​តែ​ខាង​យើង​សង្កេត​ឃើញ​ថា បច្ចុប្បន្ន​នេះ ពុំទាន់​សូវ​មាន​ទូក​បែប​ស្តង់ដារ​ដូចជា​មាន​បម្រើ​ម្ហូប​ជា​លក្ខណៈ Fine Dining ដោយ​មានការ​រៀបចំ​ម្ហូប​ទៅ​តាម​ដំណាក់ មាន​អ្នកបម្រើ​ចាំឈរ​លើក​ម្ហូប​ជូន ជាដើម និយាយ​រួម​គឺ​យើង​ធ្វើឲ្យ​ភ្ញៀវ​មាន​អារម្មណ៍​ថា​កំពុងតែ​អង្គុយ​ញ៉ាំ​អាហារ​ក្នុង​ហាង​ទំនើប​តែម្តង»។

សេវាកម្ម​ទទួល​ទាន​អាហារ​ដូច​ភោជនីយដ្ឋាន​ប្រណីត​នៅ​លើ​ទូក​បែប​នេះ ពុំទាន់​រីក​ដុះដាល​នៅ​ប្រទេស​កម្ពុជា ទើប NOIR & BLANC បាន​រចនា​តុបតែង បំពាក់​បរិក្ខារ​ក្នុង​ទូក​ស្អាត​ទាន់សម័យ ដោយ​នៅ​ខាងក្នុង មានការ​រៀបចំ​តុជ្រុងៗ​កម្រាល​ពណ៌​ស លម្អ​ដោយ​ថូ​រំលេច​ផ្កា​កុលាប តាម​ស្តង់ដារ​ភោជនីយដ្ឋាន​លំដាប់​ខ្ពស់។ ផ្ទៃ​ទូក​ពណ៌​សលាយ​ខ្មៅ​បន្តិច មិន​ឃ្លាត​ចាក​ពី​ឈ្មោះ​នាវា​ថា NOIR & BLANC នោះ​ឡើយ។

កញ្ញា ចាន់ វិច្ឆិកា បាន​បន្ត​ទៀត​ថា៖ «យើង​បើក​ដំណើរការ​ទូក​នេះ​ឡើង​រយៈពេល​ជាង​មួយ​ឆ្នាំ​ហើយ ដោយ​មានការ​ពេញនិយម​ជិះ​ពី​ភ្ញៀវ​ជនជាតិ​កូរ៉េ​ច្រើន​ជាងគេ។ សម្រាប់​ភ្ញៀវ​ខ្មែរ​វិញ​ក៏មាន​ខ្លះ​ដែរ ក៏ប៉ុន្តែ​ភាគច្រើន​គឺ​គាត់​មក​តាម​ធួរ​វិញ»។

យោងតាម​ជំនួយការ​អ្នកគ្រប់គ្រង​ប្រចាំ​នៅ​ទូក​នេះ ចំពោះ​អាហារ​បម្រើ​នៅ​លើ​ទូក គឺ​អាស្រ័យ​ទៅ​តាម​ការ​កុម្ម៉ង់​ពី​ភ្ញៀវ ដែល​មាន​ជម្រើស​ជា ប្រភេទ​ប៊ូហ្វេ ឬ អាហារ​ឈុត។

កញ្ញា ចាន់ វិច្ឆិកា បាន​ឲ្យដឹង​ដែរ​ថា៖ «ភ្ញៀវ​ដែរ​គាត់​មាន​គ្នា​ចាប់​ពី ១០ នាក់​ឡើង​ទៅ បើ​គាត់​ចង់​ញ៉ាំ​អាហារ​ប៊ូហ្វេ​នៅ​លើ​ទូក គឺ​យើង​គិត​ម្នាក់​ត្រឹម​តែ ១០ ដុល្លារ ក៏ប៉ុន្តែ​ប្រសិន​ជាគ្នា​តិច​វិញ គឺ​តម្លៃ​វារាង​ថ្លៃ​ជាង​នេះ​បន្តិច។ ក៏ប៉ុន្តែ​សម្រាប់​ភ្ញៀវ​ចង់​កុម្ម៉ង់​អាហារ​ឈុត ត្រឹម​គ្នា ៤ នាក់​គឺ​យើង​គិត​ក្នុង​ម្នាក់​ប្រហែល​ជា ២០ ដុល្លារ ដោយ​បូករួម​ជាមួយ​ស្រា​មួយ​កែវ ឬមួយ​ដប​សម្រាប់​គាត់»។

Content image - Phnom Penh Post
ការ​រៀបចំ​ម្ហូបអាហារ​ និ​ងសេវា​កម្មបែប​ហាង​លំដាប់​ខ្ពស់​។ ប៉ាន់ រចនា

កញ្ញា​បន្ត​ទៀត​ថា៖ «ជម្រើស​មួយ​ទៀត ភ្ញៀវ​ក៏អាច​ជួល​ត្រឹមតែ​ទូក និង​យក​ម្ហូប​ខ្លួនឯង តម្លៃ​ត្រូវ​បាន​គិត​ក្នុង​ម្នាក់ ៧ ដុល្លារ។ ក៏ប៉ុន្តែ​ប្រសិន​ជា​ភ្ញៀវ​ចង់​ជួល​ទូក​ដាច់​សម្រាប់​គ្នា​គាត់​ពី ៥០ ទៅ ៦០ នាក់ យើង​គិត​ជា​ម៉ោង​គឺ ១ ម៉ោង​ដំបូង ៥០ ដុល្លារ តែ​ម៉ោង​ទី ២ គឺ​យើង​គិត​តែ ៤០ ដុល្លារ​ជូន​គាត់»។

ក្រៅ​ពីការ​ញ៉ាំ​អាហារ​ទទួល​ទាន​ជួបជុំ​ក្រុម​គ្រួសារ ឬ​មិត្តភក្ដិ​នោះ នាវា NOIR & BLANC ក៏ទទួល​ធ្វើ​កម្មវិធី​នានា រួមទាំង​ការរៀបចំ​បរិយាកាស​សុំ​ម្ចាស់​ស្នេហ៍​រៀបការ​ផងដែរ។

ដំណើរ​កម្សាន្ត​ដែល​ផ្ដើម​ចេញ​ពី​កំពង់ផែ​ក្បែរ​វត្តភ្នំ រសាត់​សន្សឹម​កាត់​ព្រះបរមរាជវាំង ទីក្រុង​កោះពេជ្រ ទន្លេមេគង្គ​ក្រោម និង​ទន្លេ​បាសាក់​នេះ អាច​ទំនាក់​ទំនង​នាវា NOIR & BLANC តាមរយៈ​លេខ​ទូរស័ព្ទ ០១០ ៤០៣ ២០៣៕

Content image - Phnom Penh Post
នាវា​ចេញ​ដំណើរ​ពី​កំពង់ផែ​ក្បែរ​វត្តភ្នំ ឆ្លង​កាត់​មុខវាំង និង​កោះពេជ្រ​។ រូប សហការី

Content image - Phnom Penh Post
ក្នុង​នាវា មាន​តុជ្រុង ជាជួរៗ​ដោយ​ក្រាល​កម្រាល​តុពណ៌​ស និង​លម្អ​ថូផ្កា​កុលាប​​។ ប៉ាន់ រចនា

អត្ថបទគួរចាប់អារម្មណ៍