សមុទ្របៃតង ខ្នងភ្នំបាយឆៅ ខេត្ដមណ្ឌលគិរី
ឈរគន់ពីរានហាលលើខ្នងភ្នំខ្ពស់ផុតចុងឈើ យើងអាចមើលឃើញសម្រស់ជ្រលងភ្នំខ្ពស់គ្របដោយព្រៃព្រឹក្សា បីដូចជាទឹករលកបោកបក់រលេញ រំលេចជាពណ៌បៃតង ឆ្លុះនឹងពពកសក្យុសលើមេឃា។
ស្ថិតនៅជាប់នឹងផ្លូវជាតិលេខ ៧៦ ពីមណ្ឌលគិរីទៅកាន់ខេត្ដរតនគិរី ស្រុកកោះញែក មានចម្ងាយប្រមាណ ១០ គីឡូម៉ែត្រពីក្រុងសែនមនោរម្យ និង ៣ គីឡូម៉ែត្រពីផ្លូវបំបែកកោះញែក និងប៊ូស្រា ទីឋានគន់សមុទ្រឈើលើភ្នំបាយឆៅ ទើបដំណើរការ ៦ ខែ មានក្យូសលម្ហែ បង់អង្គុយលេង អមដោយសួនច្បារផ្កាភ្ញី ត្រៀមស្វាគមន៍អ្នកនិយមសម្រស់ធម្មជាតិ និងថតរូបសែលហ្វ៊ីដ៏ស្រស់ត្រកាល ។
រមណីយដ្ឋានធម្មជាតិអូរផ្លាយ មិនឆ្ងាយពីប៊ូស្រា
ស្ថិតក្នុងភូមិពុំទាន់មានឈ្មោះ ឃុំស្រែអំពូម ស្រុកពេជ្រាដា ខេត្ដមណ្ឌលគិរី រមណីយដ្ឋានធម្មជាតិអូរផ្លាយ រំលេចជាចរន្ដទឹកសម្បុរស្ករត្នោតហូរកាត់កម្រាលថ្ម ដែលស្ថិតនៅមិនឆ្ងាយពីកំណាត់ផ្លូវឆ្ពោះទៅកាន់រមណីយដ្ឋានទឹកជ្រោះប៊ូស្រា។
ដោយត្រូវបានអភិវឌ្ឍជារីសតឯកជន អូរផ្លាយផ្ដល់សកម្មភាពកម្សាន្ដជាច្រើន លើសពីការងូតទឹកលើដងអូរ ដូចជា ការថតរូបសែលហ្វ៊ីដោយគ្រងឈុតប្រពៃណីជនជាតិភាគតិច ក្នុងផ្ទះជនជាតិ ក្យូសលម្ហែ និងផ្ទះស្នាក់រហូតដល់ ១០០ ខ្នងថែមទៀត។
គន់វិថីអន្ទង់អាំងលើភ្នំ ១០០៥
វិថីព័ទ្ធពេនតាមជម្រាលភ្នំ សម្រាប់សម្រួលដល់ចរាចរណ៍ធ្វើដំណើរគ្រប់យានយន្ដ បានប្រែក្លាយជាចំណុចសំចតរបស់អ្នកដំណើរឆ្លងកាត់ ភ្ញៀវទេសចរ និង អ្នកស្រុកទស្សនាខ្សែពណ៌ក្រមៅបត់បែនដូចអន្ទង់អាំង និងគយគន់ទេសភាពសមុទ្រឈើរលករលេញ ក្នុងតំបន់អភិរក្សជួរភ្នំសំកុស។ ភ្នំ ១០០៥ ដោយយកឈ្មោះយោងតាមកម្ពស់ភ្នំ ១០០៥ ម៉ែត្រ ដែលរំលេចនូវដងវិថីព័ទ្ធពេនរាងដូចអន្ទង់អាំង ស្ថិតក្នុងឃុំអន្លង់រាប ស្រុកវាលវែង ខេត្ដពោធិ៍សាត់ ចម្ងាយប្រមាណ ៣៣០ គីឡូម៉ែត្រពីរាជធានីភ្នំពេញ និងប្រមាណ ១៣០ គីឡូម៉ែត្រពីក្រុងពោធិ៍សាត់។
ទឹកធ្លាក់ថ្មដាតូច ហូរជាថ្នាក់ៗត្រជាក់ស្រេង នៅកៀកបង្កើយនឹងផ្លូវជាតិ
នៅមិនឆ្ងាយប៉ុន្មានពីផ្លូវជាតិលេខ ៥៥ ទឹកធ្លាក់ ថ្មដាតូច ឬអ្នកខ្លះនិយមហៅទឹកធ្លាក់ភ្នំ ១០០៥ កំពុងទទួលបានការចាប់អារម្មណ៍ពីភ្ញៀវទេសចរ ដែលធ្វើដំណើរឆ្លងកាត់តំបន់ព្រៃភ្នំនៃទឹកដីខេត្តពោធិ៍សាត់ ឆ្ពោះទៅកាន់ច្រកថ្មដា នាព្រំប្រទល់ជាមួយខេត្ដត្រាត របស់ប្រទេសថៃ។
ធ្វើដំណើរលើវិថីព័ទ្ធពេន តាមជម្រាលភ្នំខ្ពស់ៗ ប្រមាណ ៥០ គីឡូម៉ែត្រពីទីរួមស្រុកវាលវែង ឬ ១៥៣ គីឡូម៉ែត្រពីទីរួមខេត្តពោធិ៍សាត់ ទឹកធ្លាក់ មិនទាន់ក្លាយជារមណីយដ្ឋាននេះ ស្ថិតនៅក្នុងភូមិឯកភាព ឃុំថ្មដា ស្រុកវាលវែង។ ភ្ញៀវទេសចរដែលប្រាថ្នាទៅលេង ចាំបាច់ត្រូវចុះសួរអ្នកភូមិតាមផ្លូវ។
ទំនប់ឈើតោក បើករដូវកាលស្វាគមន៍បុណ្យភ្ជុំបិណ្ឌ
ស្របពេលកម្ពស់ទឹកស្ទឹងគួបនឹងសម្រស់ព្រៃភ្នំរំលេចជាទិដ្ឋភាពស្រស់បំព្រង ១ ឆ្នាំម្ដង ទំនប់ឈើតោក ស្ថិតក្នុងភូមិស្រែពពាយ ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ តែងមានមនុស្សទៅលេងកម្សាន្តភ្លូកទឹកភ្លូកដីនារដូវបុណ្យភ្ជុំបិណ្ឌ។
ភ្លៀងធ្លាក់ដើមឆ្នាំបានរុញច្រានទឹកពីប្រភពភ្នំឱរ៉ាល់ក្នុងទឹកដីខេត្ដកំពង់ស្ពឺ មកដល់តំបន់ទំនប់ឈើតោក នៃខេត្ដផ្ដិលគជ់នេះលោកអ្នកអាចចូលតាមវត្ដកែវឧត្ដម ហៅវត្ដកណ្ដាល ចម្ងាយ ៣ គីឡូម៉ែត្រ ទំនប់ឈើតោក មានទឹកហូររឹមៗជ្រែកទីទួលដីដុះលើកម្រាលបាតស្ទឹង បង្កើតបានជាទស្សនីយភាពស្រដៀងនឹងប្រជុំកោះលើដងទន្លេសេសានដូច្នោះដែរ។
ទស្សនាពុទ្ធបដិមា ៨៤០០០ អង្គ នៅវត្ដពុទ្ធគិរីកម្ពុជា
ព្រះពុទ្ធរូបសមាធិចំនួន ៨៤ ០០០ អង្គ និងព្រះពុទ្ធបដិមាកម្ពស់ជាង ១០ ម៉ែត្រ ស្ថិតនៅលើកំពូលភ្នំ ជាគោលដៅមហិច្ឆតាក្នុងការកសាងពុទ្ធឋានសម្រាប់ពុទ្ធសាសនិកបានគោរពបូជា និងសម្រាប់ជាទីឋានទេសចរណ៍។
វត្តពុទ្ធគិរីកម្ពុជា ដែលសព្វថ្ងៃមានព្រះពុទ្ធបដិមាទ្រង់បាត្រ ២០០០ អង្គ តាំងនៅស្របតាមជើងជណ្ដើរ ១៩៩ កាំនៃច្រកទ្វារទាំង ៤ ស្ថិតក្នុងភូមិអន្លង់ភ្ញៀវ ឃុំត្រពាំងគ្រញូង ស្រុកត្រាំកក់ ខេត្ដតាកែវ កកើតក្នុងខែសីហា ឆ្នាំ ២០១៧ ជាមួយព្រះសង្ឃ ៤ អង្គ ក្រោមគំនិតផ្ដួចផ្ដើមពីភិក្ខុបញ្ញោសិរី កែវ កក្កដា ដែលសព្វថ្ងៃមានតែសាលាឆាន់ខ្នងប៉ុណ្ណោះ។
រមណីយដ្ឋានកំពូលពេជ្រ ឬអន្លង់ភ្ញៀវ ខេត្តតាកែវ
ធ្វើដំណើរតាមផ្លូវជាតិ ៤១ បត់ស្ដាំតាមផ្សារត្រពាំងអណ្ដើក (បើបត់ឆ្វេងទៅផ្សារអង្គតាសោម) ចម្ងាយប្រមាណ ១០ គីឡូម៉ែត្រ ផុតផ្លូវជាតិចូលផ្លូវលំ រមណីយដ្ឋានកំពូលពេជ្រ ស្ថិតក្នុងភូមិអន្លង់ភ្ញៀវ ឃុំត្រពាំងគ្រញូង ស្រុក ត្រាំកក់ ខេត្ដតាកែវ រង់ចាំស្វាគមន៍ភ្ញៀវជាមួយតម្លៃសំបុត្ររថយន្ដ ២ ម៉ឺនរៀលក្នុង ១ គ្រឿង។
បើភ្ញៀវមិនចង់កុម្ម៉ង់ម្ហូបអាហារពីរមណីយដ្ឋានពួកគេអាចជួលក្យូសសម្រាប់អង្គុយទទួលទានចំណីអាហារផ្ទាល់ខ្លួនក្នុងតម្លៃពី ៤០ ០០០ ទៅ ៦០ ០០០ រៀលទៅតាមទំហំក្យូសនីមួយ ៗ។
ជិះទូកទស្សនា ដែនជម្រកសត្វស្លាបទឹកដ៏កម្រ នៅអាងទឹកត្រពាំងថ្ម
ទេសចរទីជិតឆ្ងាយ អាចសាកល្បងប្តូរចំណាប់អារម្មណ៍ការកម្សាន្ត ដែលដើមឡើយធ្លាប់តែពេញនិយមសម្រាប់ភ្ញៀវបរទេស។ នោះគឺទៅជិះទូកលេងទស្សនាសត្វស្លាបទឹក ពពួកសត្វជីវៈចម្រុះច្រើនប្រភេទ និងបណ្តុំទេសភាពធម្មជាតិ ដ៏ស្រស់ស្អាត នៃរមណីយដ្ឋានអាងទឹកត្រពាំងថ្ម ទឹកដីខេត្តបន្ទាយមានជ័យ។
រមណីយដ្ឋាន អាងទឹកត្រពាំងថ្ម លាតសន្ធឹងនៅលើផ្ទៃដីទំហំ ១២ ៦៥០ ហិកតា មានភូមិចំណុះជាច្រើនស្ថិតនៅឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ដោយចេញពីចំណុចផ្លូវបំបែកស្រុកព្រះនេត្រព្រះ។
ជិះកង់លើអាកាស និង ខ្សែរ៉ក ស៊ូភើមេន នៅត្រាវកុដិ
ទិដ្ឋភាពកង់ហោះប៉ប្រះចុងជើង លើក្យូសលម្ហែ ដែលភ្ញៀវអាចគយគន់ទេសភាពភ្នំ ជាពិសេស បឹងត្រាវកុដិទំហំ ៦០ ហិកតាដ៏៏ធំល្វឹងល្វើយ ធ្វើឲ្យកើតជាអារម្មណ៍ស្រស់ស្រាយផង និងភ័យបុកពោះផង។
ទីកម្សាន្ដកង់ហោះ រួមទាំង សកម្មភាពជិះខ្សែរ៉ក និងស៊ូភើមេនហោះឆ្លងកាត់បឹងនេះ ស្ថិតក្នុងរមណីយដ្ឋានម្លប់ឈើ ត្រាវកុដិ ភូមិក្រពើ ឃុំបល្ល័ង្ក ស្រុកប្រាសាទបាគង ខេត្ដសៀមរាប ២៣ គីឡូម៉ែត្រ ខាងជើងឆៀងខាងកើតក្រុងសៀមរាប។
ប្រាសាទបន្ទាយទ័ព បន្សល់ពុទ្ធរូបអង្គធំដ៏ស័ក្ដិសិទ្ធិ
ភ្ញៀវទេសចរ ជាពិសេសពុទ្ធបរិស័ទ ទាំងជិតទាំងឆ្ងាយ ដែលធ្វើដំណើរឆ្លងកាត់ស្រុកថ្មពួក ខេត្ត បន្ទាយមានជ័យ តែង តែឆ្លៀតឆៀងចូល ទៅកាន់ទីអារាមដោយល្បីរន្ទឺថា ទីនោះមានបារមីព្រះអង្គធំ ក្នុងវត្តដ៏ពូកែស័ក្តិសិទ្ធិ សម្រាប់រាល់ការបន់ស្រន់បានសមតាមបំណងប្រាថ្នា។
ស្ថិតនៅក្នុង ភូមិរលំជ្រៃ ឃុំស្រុក ថ្មពួក ខេត្តបន្ទាយមានជ័យ ចម្ងាយប្រមាណ ៣ ឬ ៤ គីឡូម៉ែត្រ ចេញពីផ្លូវជាតិលេខ ៥៦ (មុនដល់ទីរួមស្រុកថ្មពួកបន្តិច បើធ្វើដំណើរចេញពីក្រុងសិរីសោភ័ណ) វត្តប្រាសាទរលំជ្រៃ ដែលជាទីតម្កល់ពុទ្ធរូបព្រះអង្គធំទម្ងន់ជាង ២ តោន ធ្វើពីថ្មភក់លំដាប់លេខ ១ បានទាក់ទាញបរិស័ទគ្រប់ទិសទី៕