.jpg)
ទេសភាពនៅតំបន់អេកូទេសចរណ៍ភូមិជ្រាវ សង្កាត់ជ្រាវ ទឹកដីខេត្តសៀមរាប។ សហការី
ក្រុងសៀមរាប: បើលោកអ្នកមានបំណងធ្វើដំណើរទៅកម្សាន្ដនៅរមណីយដ្ឋាននានា ប្រាង្គប្រាសាទបុរាណ និងរីករាយជាមួយភ្លើងពណ៌ពេលរាត្រីក្នុងទីក្រុងសៀមរាបក្នុងឱកាសឆ្លងឆ្នាំនេះ កុំភ្លេចចូលរួមកម្មវិធីបុណ្យដារលាន ដែលស្វាគមន៍ភ្ញៀវគ្រប់ជាតិសាសន៍មកពីជុំវិញពិភពលោក និងនាំគ្នារាប់ថយក្រោយ អបអរឆ្នាំ សកល ២០១៩។
ភូមិជ្រាវក្នុងសង្កាត់ជ្រាវ ដែលជាតំបន់អេកូទេសចរណ៍កំពុងពេញនិយមនាពេលបច្ចុប្បន្ន ត្រូវបានជ្រើសរើសជាទីតាំងប្រារឰបុណ្យដារលាន ឬបុណ្យភូមិ ដើម្បីអរគុណដល់ទឹកដី អាកាសធាតុចំពោះការប្រមូលផលស្រូវ និងស្វាគមន៍ឆ្នាំថ្មីឆ្នាំសកលខាងមុខ។
ក្រោយពីផ្ដោតគោលដៅចម្បងលើភ្ញៀវទេសចរបរទេស ដែលបានធ្វើដំណើរមកកម្សាន្ដទឹកដីអង្គរ បុណ្យដារលានក្នុងភូមិជ្រាវ ជាការប្រារឰលើកទី ១២ របស់ក្រុមហ៊ុន Jaya Catering & Events ក៏នឹងផ្ដួចផ្ដើមកម្មវិធីសប្បាយសម្រាប់បងប្អូនភ្ញៀវជាតិផងដែរ។
លោក ច្រឹក គីមផូ ជាអគ្គនាយកក្រុមហ៊ុន Jaya Catering& Events បានលើកឡើងថា៖ «នេះជាលើកទី ១២ ហើយ ដែលក្រុមការងារបានរៀបចំពិធីបុណ្យ ដារលាន ឬបុណ្យភូមិនេះឡើង ហើយលើកមុនៗគឺរៀបចំទទួលស្វាគមន៍តែភ្ញៀវបរទេសតែប៉ុណ្ណោះ។ តែលើកនេះគឺរៀបចំជាលក្ខណពិសេសដែលនឹងទទួលស្វាគមន៍ភ្ញៀវជាតិ និងអន្តរជាតិព្រមគ្នា»។
លោក ច្រឹក គីមផូ បានលើកហេតុផលថា រៀងរាល់ឆ្នាំ ភ្ញៀវជាតិ និងអន្ដរជាតិជាច្រើនបានធ្វើដំណើរកម្សាន្ដទៅកាន់ក្រុងសៀមរាបដើម្បីប្រារឰពិធីបុណ្យឆ្លងឆ្នាំ ដូចជាដើរលេងតាមប្រាសាទ រមណីយដ្ឋាននានាចូលផ្សាររាត្រី ផាប់ស្ទ្រីត មើលកាំជ្រួច និងរាំក្នុងក្លិប។
បុណ្យភូមិនឹងមានការរាំកម្សាន្ត អបអរឆ្នាំថ្មី។ សហការី
សម្រាប់ឱកាសឆ្នាំនេះ លោក គីមផូ ចង់ទាក់ទាញទាំងភ្ញៀវជាតិ និងអន្ដរជាតិមកចូលរួមបុណ្យដារលាន នៅភូមិជ្រាវ សង្កាត់ជ្រាវ ដោយមានការរៀបចំកម្មវិធីប្រពៃណីខ្មែរជាច្រើន ការរាំកម្សាន្ដ និងរីករាយអាហារ បាប៊ីឃ្យូ ប៊ូហ្វេ ស្រាក្រឡុក ស្រាក្រហម និងស្រាសំប៉ាញ ដើម្បីអបអរឆ្នាំថ្មីក្រោមពន្លឺកាំជ្រួចដ៏អស្ចារ្យ។
ចំពោះអ្នកចាប់អារម្មណ៍ចង់ចូលរួមកម្មវិធីបុណ្យដារលាន ឬបុណ្យភូមិក្នុងភូមិជ្រាវ អាចទាក់ទងតាមអ៊ីមែល sales@jayacateringevents.com ឬទូរស័ព្ទ ០៨៩ ៩៩៨ ៣៣៨ / ០៦៩ ៨៨៨ ០៣៤ ឬចូលទៅកាន់វេបសាយ Jaya Catering & Events៕
ភ្ញៀវនឹងរីករាយជាមួយអាហារប៊ូហ្វេ និងបាប៊ីឃ្យូ។ សហការី
