.jpg)
អាងហែលទឹកបំពាក់ម៉ាស៊ីនបង្កើតរលកសិប្បនិម្មិត ជម្រៅជ្រៅបំផុត ១,៨ ម៉ែត្រ។ សហការី
ក្រុងបាត់ដំបង: ពីអាងហែលទឹកមនុស្សធំ សួនផ្កាដ៏ស្រស់បំព្រងសម្រាប់ជាផ្ទៃក្រោយផ្គាប់ចិត្ដអ្នកនិយមថតរូបសែលហ្វ៊ី អាងហែលទឹកសម្រាប់កុមារ ភោជនីយដ្ឋាន និងអាងរំអិលសម្រាប់ក្មេងតូចៗ រហូតដល់ប្រាសាទអង្គរវត្ដសង់ពីសម្ភារបោះចោលចាស់ៗ និងអាងរលកសមុទ្រសិប្បនិម្មិតបើកសម្ពោធកាលពីរដូវបុណ្យភ្ជុំឆ្នាំមុន សួនទឹកក្នុងមជ្ឈមណ្ឌលសុភមង្គល ក្រុងបាត់ដំបង បើកទ្វារស្វាគមន៍ភ្ញៀវប្រាថ្នាបញ្ចុះកម្ដៅខ្លួនភ្លូកទឹកភ្លូកដី។
រលកសមុទ្របោករលេញយ៉ាងថ្លាឈ្វេងលើជម្រាលកម្រាលការ៉ូក្រហម លឿង ស ដែលស័ក្ដិសមសម្រាប់កុមារប្រឡែងលេងជាមួយរលកផលិតចេញពីម៉ាស៊ីន មានជម្រៅជ្រៅបំផុតត្រឹម ១,៨០ ម៉ែត្រ។ សម្រាប់ឪពុកម្ដាយ និងអាណាព្យាបាលអត់មានពេលវេលានាំបុត្រធីតាទៅលេងសមុទ្រផ្ទាល់ សួនទឹកក្នុងក្រុងបាត់ដំបងនេះផ្ដល់នូវសកម្មភាពកម្សាន្ដសម្បូរបែប។
កញ្ញា ស៊ន សុខកញ្ញា អាយុ ២៤ ឆ្នាំ ជាអ្នកគ្រប់គ្រងទូទៅ នៅសួនទឹក ក្នុងមជ្ឈមណ្ឌលសុភមង្គល បានប្រាប់ថា៖ «នៅកន្លែងយើងមានច្រើន ទាំងអាងហែលទឹកសម្រាប់កុមារ និងមនុស្សធំ សួនថតរូប ក្យូសធំចំនួន ២ វែង ភ្នំសិប្បនិម្មិតព្រៃធម្មជាតិ ប្រាសាទអង្គរវត្ដ»។
ក្រៅពីអាងទឹកចំនួន ៤ សួនផ្កា ភោជនីយដ្ឋាន និងស្រះត្រី សួនទឹកកម្សាន្ដនេះកែច្នៃសម្ភារចាស់ៗផលិតជាគ្រឿងលម្អតុបតែងសួនឲ្យកាន់តែទាក់ទាញ និងស្ទួយបរិស្ថានថែមទៀត។
អ្នកគ្រប់គ្រងទូទៅ ដែលមានជំនាញគណនេយ្យរូបនេះបានបន្ដថា៖ «សម្បកដប យើងយកវាធ្វើរបង សម្បកកង់ឡាន និងពោះវៀនកង់ឡានរៀបធ្វើជារូបសត្វ ម៉ូតូ រួមទាំង ប្រាសាទអង្គរវត្ដ ពីព្រោះបើយើងដុតវាចោល វាបំផ្លាញបរិស្ថាន។ នៅទីនេះ មានកន្លែងញ៉ាំការ ហើយភ្ញៀវប្រើប្រាស់ភេសជ្ជៈច្រកដប ដែលមិនអាចលក់ចេញ យើងយកមករចនាជារបងដប»។
សម្រាប់ការចុះលេងទឹក តម្លៃពី ២ ដុល្លារ សម្រាប់ក្មេង និង ៤ ដុល្លារសម្រាប់មនុស្សធំ។ សហការី
ដោយបើកសម្ពោធតាំងពីជាង ២ ឆ្នាំមុន សួនទឹក សុភមង្គលផ្ដើមពីអាងទឹកតែមួយ រួចកសាងអាងទឹកសម្រាប់ក្មេង និងទីលានរំអិលសម្រាប់ក្មេង ហើយចុងក្រោយនេះកសាងអាងទឹករលកសមុទ្រសិប្បនិម្មិត ដែលបើកសម្ពោធមុនរដូវបុណ្យភ្ជុំឆ្នាំមុន។
កញ្ញា សុខកញ្ញា បានប្រាប់ពីតម្លៃថា៖ «សម្រាប់មនុស្សធំ យើងគិតចាប់ពីកម្ពស់ ១,៤០ ម៉ែត្រ តម្លៃ ៣ ដុល្លារ កូនក្មេង គិតចាប់ពី ១,៣៩ ម៉ែត្រចុះ ម្នាក់ ២ ដុល្លារ ដែលពួកគេអាចលេងបានទាំង ៤ អាង។ ចំពោះអ្នកចូលមកថតរូបលេង យើងគិតម្នាក់ ២ ពាន់រៀល និងរថយន្ដមួយគ្រឿង ៥ ពាន់រៀល»។
ជាមួយចំណង់ចំណូលចិត្ដលេងទឹករបស់ប្រជាជនខ្មែរ ជាពិសេស ស្ថិតក្នុងបរិយាកាសក្ដៅបែបនេះ កញ្ញា បានឲ្យដឹងថា ចាប់ពីថ្ងៃចន្ទដល់ថ្ងៃសុក្រ មានភ្ញៀវមកលេងជាហូរហែ។ ប៉ុន្ដែចំពោះថ្ងៃចុងសប្ដាហ៍ និងបុណ្យទានផ្សេងៗ សួនទឹកខេត្ដបាត់ដំបង ទទួលភ្ញៀវពី ៣០០ ទៅ ៤០០ នាក់ក្នុងមួយថ្ងៃ។ បើទោះបីជាភ្ញៀវមកកម្សាន្ដច្រើននៅសួនទឹកក្នុងក្រុងនេះយ៉ាងណាក៏ដោយ ក៏កញ្ញាប្រាប់ថា ភោជនីយដ្ឋានមិនលក់ម្ហូបអាហារឡើងថ្លៃហួសកំណត់ឡើយ។
អ្នកគ្រប់គ្រងទូទៅអះអាងថា៖ «កុំបារម្ភថា ភ្ញៀវនឹងស្រែកថា ម្ហូបនៅទីនេះថ្លៃ រួមទាំង ភេសជ្ជៈក៏ដោយ។ ជាក់ស្ដែង ទឹកសុទ្ធមួយដប យើងលក់តែ ១ ពាន់រៀលប៉ុណ្ណោះ»។
កញ្ញាបង្ហើបប្រាប់ថា ពេលខាងមុខ មជ្ឈមណ្ឌលនឹងសង់ប្រឡាយវែងសម្រាប់ឲ្យភ្ញៀវជិះទូកកម្សាន្ដ ហើយបានបញ្ជាក់ថា ភ្ញៀវមកតែមួយកន្លែង អាចលេងបានគ្រប់មុខ។
សួនទឹកសុភមង្គល ចាប់បើកទ្វារពីម៉ោង ១០ ព្រឹកដល់ម៉ោង ៧ យប់ រៀងរាល់ថ្ងៃ ដែលមានទីតាំងនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង (ខាងជើងរង្វង់មូលនាងរំសាយសក់ ៨០០ ម៉ែត្រ)៕
