.jpg)
ក្រុងពោធិ៍សាត់: នៅលើដងវិថីក្រាលកៅស៊ូដ៏ថ្មីសន្លាង ពីក្រុងពោធិ៍សាត់ ហាក់បីដូចជាខ្សែ ១ ចង្វាយបន្លាយកាត់ភូមិឋាន វាលដំណាំ ទីកម្សាន្ដ និងបន្ដព័ទ្ធពេនតាមជម្រាលព្រៃភ្នំប្រវែងជាង ១៨២ គីឡូម៉ែត្រ រហូតដល់ព្រំប្រទល់ដែន កម្ពុជា-ថៃ រថយន្ដតូចធំបន្ដអូសខ្លួនយ៉ាងរលូនទាំងទៅ និងមកតាមគោលដៅទីទៃគ្នា ដោយខ្លះសំចតនៅតាមគេហដ្ឋាន ផ្សារផ្សោ ចម្ការដំណាំ បត់បែនចូលរមណីយដ្ឋាននានា។
អ្នកខ្លះតែងតែលើកជាចម្ងល់ថា តើពោធិ៍សាត់មានអ្វីលេងខ្លះ? បើចង់ដឹងចម្លើយ លោកអ្នកត្រូវវេចបង្វេចគេងផ្លូវយ៉ាងតិច ២ យប់ ៣ ថ្ងៃ នោះលោកអ្នកនឹងដឹងហើយ ហើយថា តើដំណើរលើដងវិថីលេខ ៥៥ នោះភ្ញៀវទេសចរអាចទទួលស្គាល់ថា ពោធិ៍សាត់ជាទីឋានរមនា និងស្រស់ត្រកាលដល់កម្រិតណា?
ទឹកធ្លាក់អូរដា ទាមទារឲ្យភ្ញៀវតស៊ូខ្លាំងបន្ដិច
ទឹកធ្លាក់អូរដា ស្ថិតនៅក្នុងឃុំរកាត ស្រុកភ្នំក្រវាញ ចម្ងាយប្រមាណ ៥៥ គីឡូម៉ែត្រពីទីរួមខេត្តពោធិ៍សាត់។ ផា លីណា
តាមផ្លូវលេខ ១៤៦ ឆ្ពោះទៅទីរួមស្រុកភ្នំក្រវាញដោយឆ្លងកាត់ភូមិចម្លាក់ព្រះពុទ្ធបដិមាជាង ២០ គីឡូម៉ែត្រ ទឹក ធ្លាក់អូរដាស្ថិត ក្នុង ឃុំ រកាត ស្រុកភ្នំក្រវាញ ចម្ងាយ ៥៥ គីឡូម៉ែត្រពីទីរួម ខេត្ដ និងប្រមាណ ៣០ គីឡូម៉ែត្រពីខ្លោងទ្វារចូលវត្ដខ្លុង បានបែងចែកជា ៣ តំបន់កម្សាន្ដ គឺនៅផ្នែកខាងលើ ទឹកហូរជម្រាលលើកម្រាលថ្មធ្លាក់ចុះចូលអន្ទង់។
ផ្នែកកណ្ដាល ជាទីកន្លែងលេងដ៏ពេញនិយមសម្រាប់ភ្ញៀវទេសចរព្រោះវាហូរធ្លាក់លើផែនថ្មជាដំណាក់រាក់ៗ ដែលផ្ដល់អំណោយផលសម្រាប់ងូត និងគេងសំដិល។ ចំណែកនៅផ្នែកខាងក្រោម ជាតំបន់ទឹកហូរកួចខ្លាំងពេលទឹកជន់ឡើងពុះជ្រែកក្រហែងថ្មធំៗមុននឹងធ្លាក់ទៅក្នុងស្ទឹងដែលហ៊ុមព័ទ្ធដោយព្រៃប្រឹក្សាប្របមាត់ទឹក ដែលបង្កើតបានជាបរិយាកាសដ៏ត្រជាក់រហឹម។
ជាអកុសល ក្រោយត្រូវបានប្រកាសជាតំបន់រមណីយដ្ឋានធម្មជាតិនៅចុងទសវត្សរ៍ទី ៩០ ទឹកធ្លាក់ពីលើខ្នងភ្នំឱរ៉ាល់ធ្លាប់ទទួលស្វាគមន៍ភ្ញៀវយ៉ាងភ្លូកទឹកភ្លូកដីស្ទើរតែគ្មានសល់កន្លែងងូតទឹកកម្សាន្ដ ប្រែជាស្ងាត់ជ្រងំ គ្មានភ្ញៀវណាទៅអើតឈ្ងោក ដោយសារស្ថានភាពផ្លូវលំបាកខ្លាំង។ រមណីយដ្ឋានទឹកធ្លាក់អូរដា ស័ក្ដិសមសម្រាប់ទេសចរផ្សងព្រេង ដែលត្រូវជួលម៉ូតូអ្នកភូមិជិះ។
រមណីយដ្ឋានទំនប់ឈើតោក
ទំនប់ឈើគោក បើករដូវកាលស្វាគមន៍ភ្ញៀវភ្លូកទឹកភ្លូកដី នៅរដូវភ្ជុំបិណ្ឌខាងមុខនេះ។ផា លីណា
ទំនប់ឈើតោកស្ថិតក្នុងភូមិស្រែពពាយ ឃុំសន្ទ្រែ ស្រុកភ្នំក្រវាញ ចូលតាមវត្ដកែវឧត្ដម ហៅវត្ដកណ្ដាល ចម្ងាយប្រមាណ ៣ គីឡូម៉ែត្រក៏ ដូចជាទីឋានកម្សាន្ដជាច្រើនទៀតក្នុងខេត្ដពោធិ៍សាត់ បើករដូវកាលស្វាគមន៍ភ្ញៀវភ្លូកទឹកភ្លូកដីនៅរដូវបុណ្យភ្ជុំបិណ្ឌ ស្របពេលកម្ពស់ទឹកស្ទឹងគួបនឹងសម្រស់ព្រៃភ្នំ និងវត្ដមានភ្ញៀវរំលេចជាទិដ្ឋភាពស្រស់បំព្រង ១ ឆ្នាំម្ដង។
បើមិនចង់ធ្វើដំណើរឆ្លងកាត់ផ្លូវ ១៤៦ ដែលមានសភាពមិនសូវរលោងស្អាត លោកអ្នកអាចបង្ហួសទៅបត់ឆ្វេងត្រង់ចំណុចទីបូជនីយដ្ឋានអ្នកតាឃ្លាំងមឿងនៃផ្លូវលេខ ៥៥ តែម្ដង។
ដំណើរតាមដងវិថីនេះ វាឆ្លងផុតទីរួមស្រុក ខណៈភ្ញៀវខ្លះ ទំនងជាចង់រំលងរមណីយដ្ឋានអូរដា ដោយប្រញាប់ចង់ឃើញទេសភាពដ៏ត្រកាលជាច្រើនទៀត។
រមណីយដ្ឋានល្បាក់កំរោញ
ល្បាក់កំរោញ មានទឹកហូរកួច ស័ក្ដិសមសម្រាប់អ្នកចេះហែលទឹកចុះងូតលេង។ផា លីណា
បន្ដដំណើរពីទំនប់ឈើតោកមិនទាន់ក្ដៅគូទផង រថយន្ដរបស់លោកអ្នកនឹងទៅដល់រមណីយដ្ឋានទឹកមួយទៀតឈ្មោះល្បាក់កំរោញ ដែលមានសភាពស្ងប់ស្ងាត់ តែស្ថិត នៅក្នុងភូមិកៀកបង្កើយនេះឯង។
ភ្ញៀវទេសចរនឹងបានឃើញស្លាកសញ្ញាមួយនៅខាងឆ្វេង ដែលចង្អុលបង្ហាញពីគោលដៅរមណីយដ្ឋានល្បាក់កំរោញកំពុងរង់ចាំវត្ដមានរបស់ភ្ញៀវឆៀងចូលអើតឈ្ងោក។
សភាពទឹកល្អក់ ហូរកួចដ៏ខ្មួលខ្មាញ់បោកបក់ដើមឈើធំៗ និងផ្ទាំងថ្មនៅល្បាក់កំរោញ បង្កើតបានជាទិដ្ឋភាពគួរឲ្យស្រៀវឆ្អឹងខ្នង ដែលមិនស័ក្ដិសមចំពោះការងូតទឹក ឬហែលលេងកម្សាន្ដនារដូវវស្សាឡើយ។
ទឹកធ្លាក់ថ្មដាតូច
ទឹកធ្លាក់ថ្មដាតូច ឬអ្នកខ្លះនិយមហៅថា ទឹកធ្លាក់ភ្នំ ១០០៥ កំពុងទទួលបានការចាប់អារម្មណ៍ពីភ្ញៀវទេសចរឆ្លងកាត់ពោធិ៍សាត់។ ផា លីណា
ជាទីកន្លែងកម្សាន្តថ្មីសន្លាងជាមួយនឹងសម្រស់ព្រៃភ្នំធម្មជាតិល្អប្លែកស្ថិតនៅមិនឆ្ងាយប៉ុន្មានពីផ្លូវជាតិលេខ ៥៥ ដែលទើបកសាងថ្មីនោះ ទឹកធ្លាក់ ថ្មដាតូច ឬអ្នកខ្លះនិយមហៅទឹកធ្លាក់ភ្នំ ១០០៥ កំពុងទទួលបានការចាប់អារម្មណ៍ពីភ្ញៀវទេសចរ ដែលធ្វើដំណើរឆ្លងកាត់តំបន់ព្រៃភ្នំនៃខេត្តពោធិ៍សាត់នេះ ឆ្ពោះទៅកាន់ច្រកថ្មដា ព្រំប្រទល់ជាមួយខេត្ដត្រាតប្រទេសថៃ។
ធ្វើដំណើរលើវិថីព័ទ្ធពេន តាមជម្រាលភ្នំខ្ពស់ៗ ប្រមាណ ៥០ គីឡូម៉ែត្រពីទីរួមស្រុកវាលវែង ឬ ១៥៣ គីឡូម៉ែត្រពីទីរួមខេត្តពោធិ៍សាត់ ទឹកធ្លាក់នេះស្ថិតនៅក្នុងភូមិឯកភាព ឃុំថ្មដា ស្រុកវាលវែង។
ទីនេះ មិនទាន់ក្លាយជាងាររមណីយដ្ឋាននៅឡើយទេ និងពុំមានការលើកស្លាកសញ្ញាសម្គាល់ជាតម្រុយផ្ដល់ភាពងាយស្រួលដល់ភ្ញៀវអ្វីឡើយ។ ភ្ញៀវទេសចរដែលប្រាថ្នាទៅលេង ចាំបាច់ត្រូវចុះសួរអ្នកភូមិតាមផ្លូវ។
ភ្លក្សក្រូចពោធិ៍សាត់ជូរផ្អែមដល់ចម្ការ
ក្រូចពោធិ៍សាត់ ដែលមានប្រភពនៅខេត្តនេះផ្ទាល់ មានរសជាតិជូរផ្អែមមុត។ ផា លីណា
ប្រជាជនជាច្រើនស្គាល់ក្រូចពោធិ៍សាត់ ជាដំណាំរបស់អ្នកខេត្ដបាត់ដំបង តែមិនច្បាស់ថា ក្រូច ពោធិ៍សាត់ ដែលរសជាតិជូរផ្អែមមុត ឈ្ងុយឆ្ងាញ់ជាប់ចិត្ដ ដ៏ល្បីល្បាញមានប្រវត្ដិនៅក្នុងទឹកដីខេត្ដពោធិ៍សាត់នេះឯង។
លោក សំ ឃីម ប្រធានមន្ទីរទេសចរណ៍ខេត្ដពោធិ៍សាត់ បានប្រាប់ថា នៅតំបន់ជុំវិញរមណីយដ្ឋានល្បាក់កំរោញ ជាទីតាំងសម្បូរចម្ការក្រូចពោធិ៍សាត់។
ចម្ការក្រូចនៅតំបន់នេះលាតសន្ធឹងលើផ្ទៃដីមិនក្រោម ៣០០០ ហិកតានោះទេ។ ក្រូចពោធិ៍សាត់ សម្បូរជាងគេ ពីម្ដុំរមណីយដ្ឋានល្បាក់កំរោញ ក្នុងឃុំអង្គ្រង ឃុំសំរោង ស្រុកភ្នំក្រវាញ រហូតភ្នំចិនយំ។
គន់វិថីអន្ទង់អាំងលើភ្នំ ១០០៥
ទេសភាពវិថីអន្ទង់អាំង ភ្នំ ១០០៥ ស្អាតប្លែកភ្នែក ធ្វើឲ្យអ្នកដំណើរសំចតរថយន្តចុះថតរូប។ ផា លីណា
វិថីព័ទ្ធពេនតាមជម្រាលភ្នំ សម្រាប់សម្រួលដល់ចរាចរណ៍ធ្វើដំណើរគ្រប់យានយន្ដ ដែលកំពុងស្ថិតក្នុងដំណាក់កាលសាងសង់ស្ទើរតែរួចរាល់ បានប្រែក្លាយជាចំណុចសំចតរបស់អ្នកដំណើរឆ្លងកាត់ ភ្ញៀវទេសចរ និង អ្នកស្រុកទស្សនាខ្សែពណ៌ក្រមៅបត់បែនដូចអន្ទង់អាំង និងគយគន់ទេសភាពសមុទ្រឈើរលករលេញ ក្នុងតំបន់អភិរក្សជួរភ្នំសំកុស។
ភ្នំ ១០០៥ ដោយយកឈ្មោះយោងតាមកម្ពស់ភ្នំ ១០០៥ ម៉ែត្រ ដែលរំលេចនូវដងវិថីព័ទ្ធពេនរាងដូចអន្ទង់អាំង ស្ថិតក្នុងឃុំអន្លង់រាប ស្រុកវាលវែង ខេត្ដពោធិ៍សាត់ ចម្ងាយប្រមាណ ៣៣០ គីឡូម៉ែត្រពីរាជធានីភ្នំពេញ និងប្រមាណ ១៣០ គីឡូម៉ែត្រពីក្រុងពោធិ៍សាត់។
ទឹកធ្លាក់ឆាយដាច់ (ថ្មដាធំ)
ទឹកធ្លាក់ឆាយដាច់ ឬថ្មដាធំ មានមុខកាត់ ៣០ ម៉ែត្រ និងហូរធ្លាក់លើចំណោតថ្មកម្ពស់ប្រមាណ ៧ ម៉ែត្រ។ ផា លីណា
ស្នូរសន្ធឹកទឹកកំពុងពេញកម្លាំងនារដូវវស្សា ហូរធ្លាក់លើចំណោតថ្មកម្ពស់ប្រមាណ ៧ ម៉ែត្រ រមណីយ ដ្ឋានទឹកធ្លាក់ថ្មដាធំ ដែលរំលេចទាំងភាពស្រស់ស្អាត និង ស្ថិតនៅក្បែររថយន្ដកៀកបង្កើយ ហាក់មិនអំណោយផលដល់ភ្ញៀវទេសចរងូតទឹកបន្សាបកម្ដៅសុរិយាឡើយ។
ប៉ុន្ដែរមណីយដ្ឋាននៅមិនឆ្ងាយពីព្រំដែនពោធិ៍សាត់ត្រាតនេះ អាចផ្គាប់ចិត្ដទេសចរប្រាថ្នាថតរូបសែលហ្វ៊ី និងគន់ទេសភាពធម្មជាតិដ៏ត្រកាលនៃដងស្ទឹងឆាយដាច់ ស្រោបព្រៃព្រឹក្សាបៃតងខ្ចី។
ទឹកធ្លាក់ ឆាយដាច់ ជាឈ្មោះរមណីយដ្ឋានទឹកធ្លាក់ ដែលពលរដ្ឋរស់ក្នុងតំបន់ហៅតៗគ្នា។ ចំណែកឯឈ្មោះ ទឹកធ្លាក់ថ្មដាធំ ជាឈ្មោះ ដែលភ្ញៀវទេសចរស្គាល់ជាតំបន់ទឹកធ្លាក់ស្ថិតក្នុងភូមិសង្គមថ្មី ឃុំថ្មដា ស្រុកវាលវែង ខេត្ដពោធិ៍សាត់ ដោយបត់ឆ្វេងតាមផ្លូវបំបែកក្បែរកាស៊ីណូចាស់ចម្ងាយប្រមាណ ៣ គីឡូម៉ែត្រ រួចបត់ឆ្វេង ២ គីឡូម៉ែត្រទៀតតាមច្រក MDS Import Export Co របស់លោកឧកញ៉ា ទ្រី ភាព៕
