The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនា​ថ្ម​ផុស សួន​មច្ឆា និង​ប៉ម​ចំណាស់​នៅ​ឧទ្យាន​ជាតិ​ឃិនទីង

ទស្សនា​ថ្ម​ផុស សួន​មច្ឆា និង​ប៉ម​ចំណាស់​នៅ​ឧទ្យាន​ជាតិ​ឃិនទីង

Content image - Phnom Penh Post
ថ្មក្ដោង​សំពៅ ដែល​ជានិមិត្ដរូប​មួយ​នៃ​តំបន់​ឧទ្យានជាតិ​ឃិនទីង នៅ​កោះ​តៃវ៉ាន់​។ គាំ ច័ន្ទរស្មី

ទស្សនា​ថ្ម​ផុស សួន​មច្ឆា និង​ប៉ម​ចំណាស់​នៅ​ឧទ្យាន​ជាតិ​ឃិនទីង

ក្រុងកៅស៊ុង: ស្ថិត​នៅ​ភាគ​ខាងត្បូង​ចុងប៉ូច​នៃ​កោះ​តៃវ៉ាន់ ឧទ្យាន​ជាតិ​ឃិន​ទីង ល្បី​ឈ្មោះ​ជា​តំបន់​ទេសចរណ៍​ដែល​មាន​ឆ្នេរសមុទ្រ​ស្អាត សម្បូរ​ព្រៃព្រឹក្សា និង​ផ្កាថ្ម​វារី​រុក្ខជាតិ។

សម្រស់​តាក់តែង​ដោយ​ធម្មជាតិ ឧទ្យាន​ជាតិ​ឃិនទីង និង​តំបន់​ជិត​នោះ​ក៏មាន​សំណង់​ស្នាដៃ​មនុស្ស​ដែល​ទាក់ទាញ​ទេសចរ​ក្នុង​ស្រុក និង​បរទេស​មក​ទស្សនា​ផងដែរ។

ឧទ្យាន​ជាតិ ឃិន​ទីង ត្រូវ​ប្រើពេល​ប្រមាណ ៣ ម៉ោង​ពី​ទីក្រុង​កៅស៊ុង​នៃ​កោះ​តៃវ៉ាន់។ ជាមួយ​នឹងការ​តភ្ជាប់​ជើង​ហោះហើរ​ត្រង់ពី​រាជធានី​ភ្នំពេញ ទៅ​កាន់​ក្រុង​កៅស៊ុង នៃ​កោះ​តៃវ៉ាន់ តាម​អាកាសចរ ជេស៊ី (ខេមបូឌា) អ៊ីនធើណេសិនណល អ៊ែរ​ឡាញ) ដែល​ត្រឹមតែ ៣ ម៉ោង ភ្ញៀវទេសចរ​នឹង​អាច​ទៅដល់​ទីក្រុង​កៅស៊ុង​នោះ វាបាន​ទាញ​តំបន់​ឃិនទីង​ឲ្យ​កាន់តែ​ជិត​សម្រាប់​ភ្ញៀវទេសចរ​ពី​កម្ពុជា។

ធ្វើដំណើរ​ទៅដល់​ឧទ្យាន​ជាតិ​ឃិនទីង នៃ​ដែន​សមុទ្រ​ប៉ាស៊ីហ្វិក ទឹក​ខៀវ​ស្រងាត់​ជាប់​ជើង​មេឃ​ស្រឡះ​ក្រោម​អាកាសធាតុ​ត្រូពិក​នោះ អ្វីដែល​ភ្ញៀវទេសចរ​មិនគួរ​រំលង គឺការ​ទៅ​ទស្សនា ថ្មក្ដោង​សំពៅ ផុស​ពីផ្ទៃ​ទឹកសមុទ្រ។

ក្រឡេក​មើល​ពីចម្ងាយ ថ្ម​កម្ពស់ ១៨ ម៉ែត្រ ហាក់បី​ដូចជា​ក្ដោង​សំពៅ​ត្រៀម​ត្រាច់ចរ​ចូល​មហាសាគរ។ វា​គឺជា​និមិត្តរូប​ដ៏ល្បី​នៃ​ឧទ្យាន​ជាតិ​ឃិនទីង ដែល​ធ្វើឲ្យ​អ្នកទេសចរ​ចុច​កាមេរ៉ា និង​ទូរស័ព្ទ​ថតរូប​រាប់សិប​ប៉ុស្ដិ៍​មិន​ស្ដាយ​ថ្ម​ឡើយ។

ក្រៅពី​ទេសភាព​ដ៏ស្រស់​ត្រកាល​នេះ ភ្ញៀវទេសចរ​ក៏មិន​គួររំលង​ទៅ​ទស្សនា​ប៉ម​បំភ្លឺ (Eluanbi Lighthouse) ដែល​មាន​ប្រវត្តិ​រាប់រយ​ឆ្នាំទេ។

Content image - Phnom Penh Post
ភ្ញៀវទេសចរ​គន់មើល​មច្ឆាតូច​ធំ​នៅ​សារមន្ទីរ​ជាតិ​ជីវិត​សត្វ​​សមុទ្រ​​។

វាត្រូវ​បាន​សង់​ក្នុង​រាជវង្ស​ឆេង (១៨៨៣) ចន្លោះ​មហាសមុទ្រ​ប៉ាស៊ីហ្វិក និង​ឧបទ្វីប​តៃវ៉ាន់។ វាត្រូវ​បាន​ជួសជុល​នៅ​ឆ្នាំ ១៨៩៨ ក្រោយ​សង្គ្រាម​ចិន-ជប៉ុន និង​ត្រូវ​សង់​ឡើងវិញ​ក្នុង​ឆ្នាំ ១៩៦២ ដោយសារ​ការបំផ្លាញ​ពីសង្គ្រាម​លោក​លើក​ទីពីរ។ សព្វថ្ងៃ​ប៉ម​បំភ្លឺ​ដ៏មាន​អានុភាព​ខ្លាំង​បំផុត​នៅ​តៃវ៉ាន់​នេះ ត្រូវ​បានគេ​ដាក់ងារ​ថាជា​ប៉ម​បំភ្លឺ​អាស៊ី​បូព៌ា។

បន្ទាប់ពី​ដើរ​គយគន់​សំណង់​ប៉ម និង​ថតរូប​អនុស្សាវរីយ៍ ភ្ញៀវ​ក៏គួរ​តែ​ឆៀង​ទៅ​ទស្សនា​សារមន្ទីរ​ជាតិ​នៃ​ជីវិត​សត្វ​ក្រោម​បាត​សមុទ្រ​ដែរ។

សារមន្ទីរ​ដែល​ប្រើពេល​គូស​ប្លង់ និង​សង់​ជិត ១០ ឆ្នាំមាន​វិសាលភាព​ជិត ៩៧ ហិកតា។ ភ្ញៀវ​អាច​គន់មើល​មច្ឆា​តូចធំ ព្រមទាំង​បបែល​យក្ស​ហែល​ឆ្វែល​ឆ្វាត់។ សម្រាប់​ភ្ញៀវ​មកជា​លក្ខណៈ​គ្រួសារ ក៏មាន​កន្លែង​លេង​ទឹក​ជាមួយ​ចម្លាក់​បាឡែន​ថ្ម​យក្ស​ផងដែរ៕

Content image - Phnom Penh Post
ទេសចរ​ថត​រូបអនុស្សាវរីយ៍​នៅ​ប៉ម​បំភ្លឺ Eluanbi។ ឈឹម ស្រីនាង

អត្ថបទគួរចាប់អារម្មណ៍