ក្រុងហាងហ្ស៊ូ: តើអ្នកចូលចិត្ដបើកបរលើមហាវិថីបារាំង សង់អេលីហ្សេ ដែលស្ងាត់ជ្រងំមែនទេ? ឬចង់សម្លឹងមើលទេសភាពសំណង់បុរាណ ទួអឺហ្វែល និមិត្តរូប ប៉ារីស ទីក្រុងស្នេហា តែមិនចង់ឃើញភ្ញៀវទេសចរច្រើនសន្ធឺកមែនទេ? មែនហើយ ក្ដីស្រមៃនឹងក្លាយជាការពិត។ អ្វីដែលអ្នកត្រូវធ្វើនោះគឺហោះទៅកាន់ក្រុងហាងហ្ស៊ូ ភាគអាគ្នេយ៍ប្រទេសចិន។
ហាងហ្ស៊ូ ជាក្រុងដ៏អភិវឌ្ឍន៍ឈ្មោះ «ទីក្រុងមេឃា»។ អ្វីដែលធ្វើឲ្យទីនេះពេញនិយមខ្លាំងនោះគឺ វាជាក្រុងចម្លងពីក្រុងប៉ារីស របស់បារាំង។ រំលេចខ្លួនខ្ពស់ត្រដែតលើទស្សនីយភាពទីឋានជនបទប្រទេសចិន ប៉ម ទួអេហ្វែល ស្ថិតនៅជ្រុងម្ខាងនៃទិសបូព៌ា។ ដោយសារគ្មាននរណាយកចិត្ដទុកដាក់ វាហាក់បីដូចជាទីក្រុងនៃក្ដីស្រឡាញ់ ត្រូវបានបោះបង់ចោលអ៊ីចឹង។
តាមការពិត វាជាប៉មចម្លងពីគំរូដើមដែលមានកម្ពស់ ១០៦ ម៉ែត្រ ហើយអ្វីដែលជាចំណុចលេចធ្លោចំពោះសំណង់ដ៏ស្កឹមស្កៃនោះគឺថា វាស្ថិតនៅចំកណ្ដាលវាលស្មៅក្នុងបរិវេណសំណើម អមដោយរូបភាពស្ដ្រីកសិករពាក់មួកចំបើង ទំនងជាកំពុងបង្កបង្កើនផលនៅក្រោមថែមទៀត។
សំណង់ចម្លងដ៏ល្បីល្បាញឈរយ៉ាងត្រដែតត្រដឹមលើដងវិថីស្រដៀងនឹងមហាវិថី សង់អេលីហ្សេ របស់ចិន។
ដំណើរកម្សាន្ដទៅតាមទីក្រុងបារាំងលើដែនដីចិននេះ វាទាក់ចិត្ដភ្ញៀវ មិនមែនដោយសារទេសភាពទូទៅនោះទេ តែជាភាពស្ងប់ស្ងាត់ ខុសដាច់ពីប៉ារីស។
មនុស្សប្រមាណ ២០០០ នាក់បានមករស់នៅទីនេះ ដោយមិនចង់ចំណាយប្រាក់លើការជួលផ្ទះក្បែរទីក្រុងហាងហ្ស៊ូ ហើយមនុស្សជាច្រើនធ្វើការក្នុងឧទ្យានកម្សាន្ដរចនាប័ទ្មបារាំងនេះ។
ឧទ្យានកម្សាន្ដនៅមានទិដ្ឋភាពស្រុកបារាំងជាច្រើនទៀត ដូចជា សំណង់ស្ថាបត្យកម្ម Haussmann ដ៏ល្បីល្បាញ មហាវិថីធំល្វឹងល្វើយ សួនទឹក និងជាពិសេស នំប៉័ង ព្រមទាំង កាហ្វេបារាំងដ៏ជាប់ចិត្ដ។
ប៉ុន្ដែ ទីក្រុងដ៏ស្ងាត់នេះអាចទាញអារម្មណ៍លោកអ្នកឲ្យឃើញនូវពិភពមួយផ្សេងទៀតពីទីក្រុងដ៏អ៊ូអររបស់បារាំង។
ទេសភាពជួរភ្នំលឹមៗនៅផ្ទៃក្រោយ បង្កើតជាបានផ្ទាំងគំនូរមួយថ្មីទៀតដ៏គួរឲ្យទាក់ភ្នែក។ ចូរគយគន់វត្ថុតំណាងប្រទេសបារាំង និងស្រូបយកខ្យល់អាកាសបែបចិនធ្វើឲ្យអារម្មណ៍អ្នកច្របូកច្របល់។
អ្នកចង់ទៅលេងក្រុងប៉ារីសនៅចិន អាចហោះពីឧទ្យានបុរីធៀនឌូឈិងបាន៕HR