.jpg)
គិតត្រឹមថ្ងៃពិសាខបូជា ពុទ្ធបដិមាពណ៌មាសប្រមាណ ២ ម៉ឺនអង្គ បានក្រាលតាមជម្រាលភ្នំកម្ពស់ ៣០ ម៉ែត្រ។ ហុង មិនា
ក្រុងដូនកែវ: ព្រះពុទ្ធទ្រង់បាត្រ ២០០០ អង្គតាំងនៅស្របតាមជើងជណ្ដើរនៃច្រកទ្វារទាំង ៤ ដែលច្រកនីមួយៗមានចំនួន ១៩៩ កាំព្រះពុទ្ធសមាធិចំនួន ៨៤០០០ អង្គ និងព្រះពុទ្ធបដិមាកម្ពស់ប្រមាណជាង ១០ ម៉ែត្រ ស្ថិតនៅលើកំពូលភ្នំ ជាគោលដៅមហិច្ចតាក្នុងការកសាងពុទ្ធឋានសម្រាប់ពុទ្ធសាសនិកបានគោរពបូជា និងសម្រាប់ជាទីឋានទេសចរណ៍ ដែលភ្ញៀវអាចទស្សនាទិដ្ឋភាពដ៏ស្រស់ត្រកាលនៃពុទ្ធបដិមារាប់ម៉ឺនអង្គគង់តាមជម្រាលភ្នំ ឆ្លុះនឹងទេសភាពព្រៃភ្នំបៃតងស្រស់។
ពុទ្ធគិរីកម្ពុជា ស្ថិតក្នុងភូមិអន្លង់ភ្ញៀវ ឃុំត្រពាំងគ្រញូង ស្រុកត្រាំកក់ ខេត្ដតាកែវកកើតក្នុងខែសីហា ឆ្នាំ ២០១៧ ជាមួយព្រះសង្ឃ ៤ អង្គ ក្រោមគំនិតផ្ដួចផ្ដើមពីភិក្ខុបញ្ញោសិរី កែវ កក្កដា ដោយសព្វថ្ងៃមានតែសាលាឆាន់មួយ។
ផ្ដើមពីការកសាងព្រះពុទ្ធរូបអង្គធំស្ថិតនៅលើកំពូលភ្នំ និងកសាងផ្លូវដោយមានការជួយឧបត្ថម្ភពីឯកឧត្ដម លោកឧកញ៉ា និងលោកជំទាវក្នុងស្រុក ទីអារាមបណ្ដោះអាសន្ន ពុទ្ធគិរីកម្ពុជាចាប់បដិសន្ធិ ជាមួយមហិច្ឆតាសាងសង់ព្រះពុទ្ធរូប ៨៤០០០ អង្គ ជុំវិញកូនភ្នំកម្ពស់ ៣០ ម៉ែត្រ។
បកស្រាយចម្ងល់កសាងពុទ្ធបដិមារាប់ម៉ឺនអង្គមកតម្កល់តាមជម្រាលភ្នំនេះ ព្រះតេជគុណ កែវ កក្កដា មានសង្ឃដីកាថា៖ «មូលហេតុសង់ព្រះពុទ្ធបដិមា ៨៤០០០ អង្គ យោងទៅតាមព្រះធម៌ព្រះសម្មាសម្ពុទ្ធនៅក្នុងគម្ពីរព្រះត្រៃបិដក ១១០ ក្បាល ជាព្រះធម៌ ទាំង ៨៤០០០ ព្រះធម្មក្ខន្ធ រួមមាន ព្រះសូត្រ វិន័យ និងអភិធម្ម។ ២១០០០ អភិធម្ម ហៅថា វិន័យ ២១០០០ អភិធម្ម ហៅថា ព្រះសូត្រ ៤២០០០ ហៅថា អភិធម្ម ដែលតំណាងឲ្យធម៌ព្រះសម្មាសម្ពុទ្ធរបស់យើង»។
ព្រះតេជគុណបានបន្ដថា៖ «បណ្ដាប្រទេសផ្សេងៗ គេមិនទាន់មានសង់ពុទ្ធបដិមាដល់ ៨៤០០០ អង្គទេ។ មានត្រឹម ៥០០០ នៅភូមា តែជាព្រះចេតិយទេ។ វាតំណាងឲ្យអាយុកាលរបស់ព្រះពុទ្ធសាសនា ពីព្រោះមុនព្រះអង្គបរិនិព្វាន លោកបានព្យាករ និងផ្ដាំពុទ្ធបរិស័ទទាំងអស់ថា សាសនាតថាគតមានអាយុកាលត្រឹម ៥០០០ ព្រះវស្សានោះទេ។ ប៉ុន្ដែឥឡូវ យើងបាន ២៥៦២ ឆ្នាំហើយ»។
ដោយមានពុទ្ធបរិស័ទ និងភ្ញៀវទេសចរនាំគ្នាទៅធ្វើបុណ្យធ្វើទាន និងចង់ដឹងចង់ឃើញព្រះពុទ្ធរូបរាប់ម៉ឺនអង្គគង់នៅដង្ហែតាមជម្រាលភ្នំ បីដូចជាកម្រាលបុប្ផាពណ៌លឿងទុំ រហូតដល់ពេលថ្ងៃបុណ្យពិសាខបូជា (២៩ ខែមេសា) នេះ វត្ដមានព្រះពុទ្ធរូបសមាធិបានកើនឡើងចំនួន ២ ម៉ឺនអង្គហើយ។
ទេសចរមកទស្សនាពុទ្ធបដិមា នៅវត្តពុទ្ធគិរីកម្ពុជា។ ហុង មិនា
ភ្ញៀវក្មេងចាស់ប្រុសស្រីគ្រប់វ័យ ខ្លះអុជធូបបួងសួងសុំសេចក្ដីសុខ ខ្លះចូលបច្ច័យទូកពុទ្ធបូជា និងខ្លះទៀតប្រគេនបច្ច័យសាងសង់ព្រះពុទ្ធរូបសមាធិ (តម្លៃ ៨ ម៉ឺនរៀល) សម្រាប់បន្ដគម្រោង ៨៤០០០ អង្គ មុននឹងចាប់ផ្ដើមទាញយកកាមេរ៉ាទូរស័ព្ទថតរូបបង្ហោះបង្អួតមិត្ដភក្ដិលើបណ្ដាញសង្គម។
ព្រះតេជគុណ កែវ កក្កដា សង្ឃឹមថា ដោយសារមានពុទ្ធបរិស័ទចូលរួមច្រើន គោលដៅព្រះពុទ្ធ ៨៤០០០ អង្គ នឹងអាចសម្រេចបាន។ ព្រះអង្គបន្ថែមថា៖ «តែបើសួរថា ពេលណាហើយ? សំណួរនេះ អាត្មាមិនអាចអះអាងថា ពេលណាឡើយ ពីព្រោះយើងពឹងអាស្រ័យលើពុទ្ធបរិស័ទទាំងអស់»។
ព្រះតេជគុណ ដែលអះអាងថា ទីឋានពុទ្ធគិរីកម្ពុជានេះមិនទាន់ក្លាយជាអារាមពេញលេញនោះ មានសង្ឃដីកាទៀតថា៖ «ផលចំណេញដែលទទួលបាន ពីការសាងសង់ព្រះពុទ្ធដ៏ច្រើនសន្ធឹក នោះគឺការរីកចម្រើនព្រះពុទ្ធសាសនាយើង ដើម្បីឲ្យក្មេងបានស្គាល់ព្រះពុទ្ធរូប ៨៤០០០ អង្គនៅខេត្ដតាកែវ ដោយមានបំណងចង់មកមើល។ មិនចាំបាច់ធ្វើអ្វីទេ ដោយគ្រាន់តែចង់មកមើល មានខួរក្បាលមួយគិតដល់ព្រះពុទ្ធសាសនាបាត់ទៅហើយ»។
បើទោះបីជាទីឋានពុទ្ធរូបនេះហាក់ទទួលបានការគាំទ្រជាមួយនឹងវត្ដមានពុទ្ធបរិស័ទ និងភ្ញៀវទេសចរជាហូរហែយ៉ាងណាក៏ដោយ ក៏សកម្មភាពដើរកាត់ព្រះពុទ្ធរូបសមាធិ ឬទយគូទចំតិតចំតូងថតរូប ក៏រងនូវការរិះគន់ពីសំណាក់អ្នកមើលឃើញទង្វើទាំងនោះផងដែរ៕
សកម្មភាពថតរូបឆ្គាំឆ្គងខ្លះក៏រងការរិះគន់ផងដែរ។ ហុង មិនា
ព្រះពុទ្ធរូបសមាធិមួយអង្គ មានតម្លៃជាវ ៨ ម៉ឺនរៀល។ ហុង មិនា
