The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនា​ភូមិឋាន​យុន​ណាន ​វប្បធម៌​ចិន​ឯ​ភាគ​ខាងជើង​ថៃ




ទស្សនា​ភូមិឋាន​យុន​ណាន ​វប្បធម៌​ចិន​ឯ​ភាគ​ខាងជើង​ថៃ

Content image - Phnom Penh Post
ទិដ្ឋភាព​មហាកំពែង​ចម្លង​របស់​អ្នក​ស្រុក​យុនណាន រស់នៅ​ក្នុង​ស្រុក​ប៉ៃ ប្រទេស​ថៃ​។ ហុង រស្មី

ទស្សនា​ភូមិឋាន​យុន​ណាន ​វប្បធម៌​ចិន​ឯ​ភាគ​ខាងជើង​ថៃ

ក្រុងម៉េហុងសន: ភូមិ សានទីឆុន ជា​ភូមិឋាន​ដែល​ភ្ញៀវទេសចរ​អាច​ទទួល​បទពិសោធ​វប្បធម៌​ចិន ជាពិសេស ប្រពៃណី​អ្នកស្រុក​យុនណាន ទាំង​រចនាប័ទ្ម​ផ្ទះ​ដីឥដ្ឋ ទឹកតែ និង​អាហារ​ចិន​ហ៊ុមព័ទ្ធ​ដោយ​ព្រៃភ្នំ​នៃ​ស្រុក​ប៉ៃ ខេត្ដ​ម៉េហុងសន ភាគ​ខាងជើង​ប្រទេស​ថៃ។

ភូមិ សានទីឆុន ឬក៏​មជ្ឈមណ្ឌល​វប្បធម៌​ចិន​យុនណាន ត្រូវបាន​បង្កើត​ឡើង​ដោយ​ប្រជាជន​ចិន​ដែល​រត់​ភៀស​ខ្លួន​ពី​បដិវត្ដន៍ ម៉ៅ សេទុង។ ក្រោយ​មក កូន​ចិន​ជំនាន់​ក្រោយ​បាន​បន្ដ​រស់នៅ និង​ថែរក្សា​ប្រពៃណី​ដូនតា​ខ្លួន​រៀង​រហូតមក។

ភូមិឋាន​ចិន នេះ​មាន​ប្រជាជន​រស់នៅ ២០០០ នាក់ រួមទាំង អម្បូរ​ចិន​យុនណាន​កុលសម្ព័ន្ធ​ថៃ និង​អតីត​ទាហាន​ចិន។ ពេលឈរ​មុខ​ខ្លោងទ្វារ​គន់​ភូមិឋាន ភ្ញៀវ​ប្រាកដ​ជាមាន​អារម្មណ៍​ដែល​ហាក់បី​ដូចជា​បាន​ប្រើ​វិជ្ជា​បង្រួម​ដី​មក​ដល់​ទឹកដី​ចិន​ដូច្នោះ​ដែរ។ ផ្ទះ​តៀម​ដីឥដ្ឋ​ប្រក់ស្បូវ​សង់​តម្រៀប​គ្នា​ជុំវិញ​សួន​ស្មៅ​បៃតង​ខ្ចី។

ភ្ញៀវ​អាច​សាក​ជិះ​សត្វលា ឬ​សេះ​តូច និង​បាញ់​ស្នា ឬព្រួញ ហើយ​សកម្មភាព​កម្សាន្ដ​ដ៏​ពេញនិយម​ប្រចាំ​ភូមិ​ចិន គឺការ​ជិះ​ទោង​ឈើ​បង្វិល។ ចំណាយ​ប្រាក់​ត្រឹម ២០ បាត ភ្ញៀវ​អាចជិះ​ទោង​ឈើ​បង្វិល​គួរឲ្យ​ស្រៀវ​ឆ្អឹងខ្នង ដោយ​មាន ជំនួយពី​ក្រុម​ការងារ ៣ នាក់​ដែល​ប្រើ​កម្លាំង​ដៃ​បង្វិល។

បន្ដដំណើរ​ពីផ្ទះ​អ្នកស្រុក ភ្ញៀវទេសចរ​ត្រូវ​បង់ប្រាក់ ២០ បាត ទៅកាន់​ទីតាំង​គយគន់​ទេសភាព​ដែល​ហៅថា ប៉ុស្ដិ៍ យុនឡៃ ទស្សនា​ទេសភាព​បៃតង​ស្រស់​ជុំវិញ​ស្រុក​ប៉ៃ។

Content image - Phnom Penh Post
ភ្ញៀវ​ជិះ​ទោង​ឈើ​បង្វិល​ដោយ​កម្លាំង​មនុស្ស​។ ហុង រស្មី

អ្វីដែល​គួរឲ្យ​ចាប់អារម្មណ៍​ចំពោះ​ក្រសែ​ភ្នែក​ភ្ញៀវទេសចរ​នោះ គឺ​មហាកំពែង​ចិន​ដ៏ស្រស់​ស្អាត។ នៅមុខ​អគារ​តំណាង​មហាកំពែង គឺជា​ហាង​លក់​ផលិតផល​តែ​ជាច្រើន​ប្រភេទ​ដែល​ភ្ញៀវ​អាចមាន​ឱកាស​បាន​ភ្លក្ស​តាម​ចំណូល​ចិត្ដ។

ក្រោយ​បញ្ចប់​ដំណើរ​កម្សាន្ដ ភ្ញៀវ​មាន​ឱកាស​បាន​ភ្លក្ស​រសជាតិ​អាហារ​អ្នកស្រុក​យុនណាន ដូចជា ខ​ជើង​ជ្រូក នំប៉ាវ មាន់​ខ្មៅ​ចំហុយ​ចិន​សែ ឆា​ផ្សិត និង​ញាំ​ក្មេងស្រី​យុនណា។

ស្ថិត​នៅ​ក្រៅ​ទីប្រជុំជន​ស្រុក​ប៉ៃ ចម្ងាយ ៥ គីឡូម៉ែត្រ ភ្ញៀវទេសចរ​អាច​ចេញ​ពីតំបន់​ផ្សារ​ចិញ្ចើម​ផ្លូវ [Walking Street] តាមផ្លូវ​មន្ទីរពេទ្យ​ឆ្លង​ទួលភ្នំ​ដោយ​ឆ្លងកាត់​មជ្ឈមណ្ឌល​វប្បធម៌​ថៃ ១ គីឡូម៉ែត្រ។

ភូមិ សានទីឆុន ត្រូវបាន​ប្រកាស​បើក​ទទួល​ភ្ញៀវ​ទេសចរ​កាល​ពីថ្ងៃ​ទី ៩ ខែ​កុម្ភៈ ឆ្នាំ ២០០៥ ដោយ​អភិបាលរង​ខេត្ដ​ម៉េហុងសន លោក ប្រាសិត ប្រាសឺតស្រី៕

Content image - Phnom Penh Post
​ហាង​លក់​សម្ភារ​ប្រើ​ប្រាស់​បែប​ប្រពៃណី​ចិន​​​។ ហុង រស្មី

អត្ថបទគួរចាប់អារម្មណ៍