The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនា​រូប​គំនូរ​លើ​ផ្ទាំង​ថ្ម ដ៏​ល្បី​នៅ​ជ្រ​លង​ភ្នំ​ហ៊ួ​សាន

ទស្សនា​រូប​គំនូរ​លើ​ផ្ទាំង​ថ្ម ដ៏​ល្បី​នៅ​ជ្រ​លង​ភ្នំ​ហ៊ួ​សាន

Content image - Phnom Penh Post
ភ្ញៀវ​ទេសចរ​ទស្សនា និង​ថត​រូប​គំនូរ​លើ​ថ្ម​ ដែល​ជា​ស្នាដៃ​របស់​កុល​សម្ព័ន្ធ​ជ័ង។ លាង ផាន់ណារ៉ា

ទស្សនា​រូប​គំនូរ​លើ​ផ្ទាំង​ថ្ម ដ៏​ល្បី​នៅ​ជ្រ​លង​ភ្នំ​ហ៊ួ​សាន

ឆុងជ័រ-គ័ងស៊ី: រូប​គំនូរ​លើថ្ម​ដ៏គួរ​ឲ្យ​ភ្ញាក់​ផ្អើល​ ត្រូវបាន​គូរ​ឡើង​នៅ​ជម្រាល​ភ្នំមួយ​ដែល​ស្ថិតនៅ​ច្រាំង​ខាងកើត​ទន្លេ មីង​ជាំង (Mingjiang) ជាដៃ​ទន្លេ ជូជាំង (Zuojiang) និង​ត្រូវ​បាន​គូរ​ឡើង​ដោយ​មនុស្ស​ក្នុងក្រុម​កុល​សម្ព័ន្ធ ជ័ង (Zhuang) សម័យ​បុរាណ។

ជញ្ជាំង​ច្រាំងថ្ម​ដែល​សំយុង​ចុះទៅ​ក្នុង​ទន្លេ​ស្ថិតនៅ​កម្ពស់​ ១២០ ម៉ែត្រ​ពីជើង​ភ្នំ ដែល​ផ្នែក​ខាង​ក្រោម​បំផុត​មានកម្ពស់ ១០ ម៉ែត្រ ទទឹង​ចន្លោះ​ពី ១៧២ ទៅ ២១០ ម៉ែត្រ និង​ក្រឡាផ្ទៃ ៨ ពាន់​ម៉ែត្រ​ការ៉េ គឺជា​តំបន់​ទេសចរ​ដ៏គួរ​ឲ្យ​ទាក់​ទាញ​របស់​ទីក្រុង​ជនបទ​ចុងជូ (Chongzuo) ស្ថិត​នៅ​តំបន់​ស្វយ័ត​ខេត្ត​គ័ងស៊ី (Guangxi) ប្រទេស​ចិន។

Content image - Phnom Penh Post
សាល​ពិព័រណ៍​ដាក់​បង្ហាញ​គំនូរ​លើ​ផ្ទាំង​ថ្ម​ភ្នំ​។ លាង ផាន់ណារ៉ា

យោងតាម​ឯកសារ​របស់ មន្ទីរ​ទេសចរណ៍​ក្រុង​ជុង​ជូ បាន​ឲ្យដឹង​ថា គំនូរ​នៅ​ទីនោះ​ត្រូវ​បាន​បែង​ចែក​ជា ១១១ ក្រុម​ដែល​មាន​រូបចំនួន ដល់​ទៅ​ ១ ៩០០ រូប​ រួមមាន រូប​មនុស្ស សត្វ ស្គរ​សំរឹទ្ធ កាំបិត ដាវ កណ្តឹង ទូក និងផ្លូវ។តំបន់​នេះ​ត្រូវបាន​ប្រទះ​ឃើញ ដោយ​កសិករ​ម្នាក់​នៅ​ស្រុក នីងមីង (Ningming) បាន​រកឃើញ​រូប​មនុស្ស​តូចៗ​នៅ​លើ​ផ្ទាំងថ្ម​ជម្រាល​ភ្នំដែល​ស្ថិត​នៅ​ជិត​ទន្លេ​ជូជាំង​នោះ។

រូបរាង​មនុស្ស​ទាំងនោះ​បាន​បញ្ចេញ​ចលនា​យ៉ាង​ច្បាស់ ដោយ​ខ្លះ​កំពុង​តែរាំ និង​ខ្លះ​ទៀត​កំពុង​តែ​រត់។ កសិករ​រូបនោះ​មាន​ការ​ភ្ញាក់ផ្អើល​ជាខ្លាំង​ជាមួយ​នឹង​ការរក​ឃើញ​នេះ។ រូប​មនុស្ស​ទាំងនោះ​មួយ​ចំនួន​ មើលទៅ​ស្រដៀង​នឹងក្រុម​អ្នក​ចម្បាំង ហើយ​ខ្លះទៀត​ដូចជា​ប្រធាន​កុលសម្ព័ន្ធ ឬ​ប្រជាជន​ទូទៅ ដែល​ពួកគេ​កំពុង​តែ​ហាត់​គុនដាវយ៉ាង​ស្វាហាប់ ជិះ​សេះ ឬ​កំពុង​រាំរែក។

Content image - Phnom Penh Post
ការ​ពិពណ៌នា​អំពី​គំនូរ​លើ​ផ្ទាំង​ថ្ម​ភ្នំ​ហួសាន។ លាង ផាន់ណារ៉ា

ចាប់​តាំងពី​ពេល​នោះមក ក្រុម​មនុស្ស​ក្នុង​កុល​សម្ព័ន្ធ ជ័ង​ បាន​ហៅ​រូបគំនូរ​លើ​ថ្ម​ជម្រាល​ភ្នំនេះ​ថា «Pay Laiz» ដែល​មាន​ន័យ​ថា «ថ្មចម្រុះ​ពណ៌» ក្នុង​ភាសាចិន។

គំនូរ​នៅ​លើថ្ម​នេះ​មាន​នៅ​ជាង ៧០ កន្លែង និង​ស្ថិតនៅ​ទឹកដី ៥ ស្រុក។ ​គំនូរ​ដែល​ធំជាង​គេ​បំផុត​មាន​កម្ពស់ ៤៤ ម៉ែត្រ បណ្តោយ​ប្រវែង ១៧០ ម៉ែត្រ ត្រូវ​បានគូរ​ឡើង​ដោយ​ពណ៌​ត្នោត​ភ្លឺជាង​រាង​បន្ទាត់​វៀច​ច្រងេង​ច្រងាង។

បច្ចុប្បន្ន រដ្ឋបាល​ទី​ក្រុង ចុងជូ (Chongzuo) បាន បង្កើត សាល​ពិព័រណ៍​មួយ​នៅ​កណ្តាល​ទីក្រុង សម្រាប់​ដាក់​បង្ហាញ​ពី​លក្ខណ​ពិសេស​ផ្សេងៗ​គ្នារបស់​រូបគំនូរ​នីមួយៗ​នេះ និងទុក​សម្រាប់​ការ​សិក្សា​វប្បធម៌​ក្នុង​ស្រុក​សម័យ​បុរាណ ពី​តំបន់នោះ៕

អត្ថបទគួរចាប់អារម្មណ៍