The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនា​សត្វព្រៃ​រាប់រយ​ប្រភេទ​ ឯសួន​សត្វ​រាត្រី​ក្រុង ​ឈៀងម៉ៃ




ទស្សនា​សត្វព្រៃ​រាប់រយ​ប្រភេទ​ ឯសួន​សត្វ​រាត្រី​ក្រុង ​ឈៀងម៉ៃ

Content image - Phnom Penh Post
សត្វ​កវែងបង្ហាញ​ខ្លួន​ឲ្យ​ភ្ញៀវ​ទេសចរ​នៅ​លើ​រថយន្ដ​​អគ្គិសនី​បាន​ទស្សនានា​ពេល​រាត្រី​។ ហុង រស្មី

ទស្សនា​សត្វព្រៃ​រាប់រយ​ប្រភេទ​ ឯសួន​សត្វ​រាត្រី​ក្រុង ​ឈៀងម៉ៃ

ក្រុងឈៀងម៉ៃ: ទស្សនីយភាព​ទាក់ទាញ​មនុស្ស​គ្រប់វ័យ​គឺ​ដំណើរ​ទៅ​កាន់​សួនសត្វ​រាត្រី​នាក្រុង​ឈៀងម៉ៃ ដែល​ត្រូវបាន​ចាត់​ទុកជា​ឧទ្យាន​កម្សាន្ដ​ពេល​យប់​ស្រស់​ស្អាត​លំដាប់​ពិភពលោក។

វាមាន​ទំហំ​ធំ​ជាង​សួនសត្វ​រាត្រី​សិង្ហបុរី​ទ្វេដង វាលាត​សន្ធឹង​លើ​ផ្ទៃដី ១៣១ ហិកតា ដែល​មាន​ចម្ងាយ​ប្រមាណ ១០ គីឡូម៉ែត្រ​ពីទី​ប្រជុំជន​ក្រុង​ឈៀងម៉ៃ។

សម្រាប់​ភ្ញៀវទេសចរ​ខ្មែរ​ដែល​មាន​បំណង​ធ្វើ​ដំណើរ​កម្សាន្ដ​ទៅ​កាន់​ក្រុង​ឈៀង​ម៉ៃ តាមរយៈ​ជើង​ហោះ​ហើរ Thai Airways ពី​ភ្នំពេញ​ទៅ​ក្រុង​បាងកក រួច​បន្ដ​ទៅ​ឈៀង​ម៉ៃ អាច​ជិះ​រថយន្ដ​តាក់ស៊ី និង​ត្រឡប់​វិញ​ជាមួយ​សេវាកម្ម​ជូន​ដំណើរ​ដោយ​ឥត​គិតថ្លៃ​តាម​រថយន្ដ​ក្រុង​ធុន​តូច​ដែល​រត់​រៀងរាល់​ពេលយប់។

សួនសត្វ​ពេល​រាត្រី Night Safari ត្រូវ​បាន​រចនា​ឡើង​ជា​ឧទ្យាន​កម្សាន្ដ។ សម្រាប់​ការ​ទស្សនា​សត្វ វា​ត្រូវបាន​បែងចែក​ជា ៣ តំបន់​ធំ។

ដំណើរ​កម្សាន្ដ​ពេល​ថ្ងៃ មាន​ឈ្មោះ​ថា Jaguar Trail Zone និង​មាន​ទីដើរ​ថ្មើរ​ជើង ១,២ គីឡូម៉ែត្រ​ជុំវិញ​បឹង​ដ៏ស្រស់​ស្អាត មាន​ពូជ​សត្វ​ជាង ៤០០ ប្រភេទ រួមទាំង​ខ្លាស ខ្លារខិន​ខ្លាដំបង​ជ្រូក​ប្រមោយ​ដំរី​ស្វា អូដ្ឋ សេះ​តូចៗ ក្រៀល កូន​កង់គូរូ និង​ខ្លាឃ្មុំ​កូអាឡា​ជាដើម។

ការដើរ​មើល​សត្វ​នេះ​ចាប់​បើក​ពីម៉ោង ១១ ព្រឹក​ដល់​ម៉ោង ១០ យប់​រៀងរាល់​ថ្ងៃ​ហើយ​ភ្ញៀវ​ត្រូវ​ទិញ​សំបុត្រ ១០០ បាត (១២០០០ រៀល) ចំពោះ​មនុស្ស​ធំ និង​កូនក្មេង ៥០ បាត (៦ ពាន់​រៀល)។

Content image - Phnom Penh Post
ដំណើរ​កម្សាន្ដ​ពេល​ថ្ងៃ​មាន​ពូជ​សត្វ ៤០០ ប្រភេទ​​។ រូប សហការី

ដំណើរ​កម្សាន្ដ​ពេល​យប់​ត្រូវបាន​បែងចែក​ជាពីរ​តំបន់ គឺ Savanna Safari Zone និង Predator Prowl Zone។ ផ្នែក​ទាំងពីរ​នេះ​ចាប់​បើក​ពីម៉ោង ៦ ល្ងាច​ដល់​អធ្រាត្រ​រៀងរាល់​ថ្ងៃ។

ភ្ញៀវ​អាច​គយគន់​សត្វ​ពេល​រាត្រី​ដោយ​ជិះឡាន​អគ្គិសនី​លើ​ចម្ងាយ​ផ្លូវ ៥ គីឡូម៉ែត្រ រយៈពេល​មួយ​ម៉ោង​ជុំវិញ។ ថ្លៃ​សំបុត្រ​នេះ មាន​តម្លៃ ៨០០ បាត (៩៦ ០០០ រៀល) សម្រាប់​មនុស្ស​ធំ និង ក្មេង ៤០០ បាត (៤៨០០០ រៀល) អមដោយ​បទ​បង្ហាញ​ជា​ភាសា​ថៃ និង​អង់គ្លេស។

Savanna Safari Zone មាន​សត្វ​ជាង ៣០០ ប្រភេទ​រួមទាំង​រមាស​ពណ៌ស​ឆ្កែព្រៃ​ហៃ​យីណា តោ ខ្លា​ឈីតា គោព្រៃ អាហ្រ្វិក សត្វ​កវែង​អូទ្រីស សេះបង្កង់ ក្របី​ទឹក កង់​គូរូ ឆ្កែព្រៃ​អូស្ដ្រាលី និង​មាន់​តូស។ Predator Prowl Zone មាន​សត្វ​ជាង ២០០ ប្រភេទ រួមមាន ខ្លា តោ ត្មាត ឆ្កែ​ប្រមាញ់ អាហ្រ្វិក ឆ្កែ​ចចក ខ្លាស ឆ្កែព្រៃ​កាណាដា ខ្លាឃ្មុំ​ខ្មៅ និង​ក្រពើ​ជាដើម។

ប៉ុន្ដែ​មុន​ទស្សនា​ពពួក​សត្វ​ទាំង​នេះ​ភ្ញៀវទេសចរ​នឹង​បាន​ឃើញ​ការសម្ដែង​ពិសេស រួមមាន ក្បាច់គុន​បុរាណ​ថៃ របាំ​ក្រុម​ខ្ទើយ និង​សួន​ទឹករាំ​ភ្លើង​ភ្លឺ​ចម្រុះ​ពណ៌​ជាដើម៕

Content image - Phnom Penh Post
ក្រៅពី​ទស្សនា​សត្វ ភ្ញៀវ​ក៏អាច​មើលរបាំ​ក្រុម​ខ្ទើយ​។ ហុង រស្មី

អត្ថបទគួរចាប់អារម្មណ៍