The Phnom Penh Post Search

Search form

Logo of Phnom Penh Post newspaper Phnom Penh Post - ទស្សនា​ចេតិយ​មាស​ឧទ្យាន​រាជព្រឹក្ស​ និង ទៅ​ញ៉ាំ​អាហារ​ហាង​ជីរ៉ាហ្វ​នៅ​ឈៀងម៉ៃ




ទស្សនា​ចេតិយ​មាស​ឧទ្យាន​រាជព្រឹក្ស​ និង ទៅ​ញ៉ាំ​អាហារ​ហាង​ជីរ៉ាហ្វ​នៅ​ឈៀងម៉ៃ

Content image - Phnom Penh Post
ឧទ្យាន​រាជព្រឹក្សមាន​រុក្ខជាតិ និង​ផ្កា​ជា​ច្រើនប្រភេទ។ ឈឹម ស្រីនាង

ទស្សនា​ចេតិយ​មាស​ឧទ្យាន​រាជព្រឹក្ស​ និង ទៅ​ញ៉ាំ​អាហារ​ហាង​ជីរ៉ាហ្វ​នៅ​ឈៀងម៉ៃ

ឈៀងម៉ៃ: ហ៊ុមព័ទ្ធ​ទៅ​ដោយ​ព្រៃព្រឹក្សា​លតាវល្លិ ​ភ្នំ​ខ្ពស់ៗ និង​អាកាសធាតុ​ត្រជាក់​ជាង​តំបន់​ដទៃទៀត​នៅ​ប្រទេស​ថៃ ខេត្ត​ឈៀងម៉ៃ​បាន​ទាក់ទាញ​ភ្ញៀវទេសចរ​មក​ទស្សនា​មិនថា​រដូវ​ប្រាំង ឬ​វស្សាធ្លាក់ភ្លៀង​ឡើយ។

ស្ថិត​នៅចម្ងាយ​ប្រមាណ ៧០០ គីឡូម៉ែត្រ​​ពី​ទីក្រុង​បាងកក ភាគខាង​ជើង​ប្រទេស​ថៃ​ ខេត្ត​ឈៀង​ម៉ៃ បន្សល់​នូវ​ដាន​ស្នាម​វប្បធម៌​បុរាណ​ដ៏​ចំណាស់ និង​សម្បូរ​ដោយ​អារាម​អាយុកាល​យូរ​អង្វែង​។

ដោយសារ​តែ​ចម្ងាយ​ផ្លូវ​ដ៏​វែង​ឆ្ងាយ ​ភ្ញៀវ​ទេសចរ​ដែល​ទៅ​ទស្សនាកម្សាន្ត​នៅ​ទឹកដី​ខេត្ត​ឈៀងម៉ៃ​ភាគច្រើន​តែង​តែ​ធ្វើដំណើរ​តាម​យន្តហោះ​ដែល​ចំណាយ​ពេល​តែ ១ ​ម៉ោង ខណៈ​ដែល​រថយន្ត​ក្រុង​ត្រូវ​ប្រើពេល​ ១០ ​ម៉ោង​ក្នុង​តម្លៃ ៣០ ដុល្លារ រីឯ​រថភ្លើង​មាន​គ្រែគេង​ និង​ម៉ាស៊ីនត្រជាក់​ត្រូវ​ជិះ ១២ ម៉ោង​ក្នុង​តម្លៃ ៣០ ដុល្លារ​ដូចគ្នា។

សម្រាប់​ខែវស្សា​នេះ ​អ្នក​ទៅលេង​ឈៀង​ម៉ៃ​លើកដំបូង​គួរតែ​ត្រៀម​នូវសម្ភារ​ខ្លះៗដូចជា​ស្បែកជើង​កីឡាស្បែកជើងផ្ទាត់ ខោជើងវែង អាវ​ដៃវែង អាវ​ភ្លៀង កាបូបស្ពាយ​ពីក្រោយ និង​មួក ជាដើម​ ទើប​​ងាយ​ស្រួល​ក្នុង​ការ​ដើរ​កម្សាន្ត​តាម​ភ្នំ​ និង​វត្ត​បុរាណ​នានា​នៅ​ឈៀង​ម៉ៃ។

ដោយឡែក​ចាប់ពី​ខែ​ កញ្ញា តុលា ធ្នូ​ និង​មករា ភ្ញៀវ​ទេសចរ​គួរ​តែ​នាំ​មក​ជាមួយ​នូវ​អាវ​រងា​ ព្រោះ​នៅ​តំបន់ភ្នំ​ព្រៃ​ក្រាស់​នេះ​មាន​អាកាសធាតុ​ត្រជាក់​បន្តិច​។ អ្នក​ដែល​មកលេង​ឈៀង​ម៉ៃ​ទាំង​អស់​​មិនគួរ​រំលងវត្ត Wat Phra That Doi Suthep ទេ។

ចេតិយមាស​ល្បីថា​ជា​កន្លែង​បួងសួង​ដ៏​ស័ក្ដិ​សិទ្ធិិនៅ​ឈៀង​ម៉ៃ។
ចេតិយមាស​ល្បីថា​ជា​កន្លែង​បួងសួង​ដ៏​ស័ក្ដិ​សិទ្ធិិនៅ​ឈៀង​ម៉ៃ។ ឈឹម ស្រីនាង

ដើម្បី​ឡើង​ទៅ​ដល់​ទី​សក្ការបូជា​ដែល​ល្បី​ថា​ស័ក្ដិសិទ្ធិ​នេះ ​ភ្ញៀវ​មាន​ជម្រើស​ពីរ​គឺ​ឡើង​តាម​កាំជណ្តើរ​ ៣០៩ ជាន់​ ឬក៏​តាម​ជណ្តើរយន្ត​ខ្សែ​ដែល​ត្រូវ​ចំណាយ​ត្រឹមតែ ៣០ បាត​ (ប្រមាណ​ ១ ដុល្លារ) ហើយ​ពេល​ឡើង​ទៅដល់​កំពូល​វត្ត​គឺ​ភ្ញៀវ​ទាំងអស់​ចាំបាច់​មានសម្លៀក​បំពាក់​​សមរម្យ ចៀស​វាងខោ​ ឬ​សំពត់​ខ្លី។

ប្រសិន​បើ​ភ្ញៀវ​ណា​ស្លៀក​បែប​ខើច​លើ​ខើច​ក្រោម នៅ​ទីនោះគឺមាន​សំពត់​ជួល​ឲ្យ​ភ្ញៀវស្លៀក​បាន។

បម្រាម​មួយ​ទៀត​គឺ​ពេល​ឡើងទៅ​ដល់​កំពូល​ភ្នំ​នៃ​វត្ត ភ្ញៀវ​ត្រូវតែ​ដោះ​ស្បែក​ជើងដាច់ខាត។ ទៅ​ដល់​កំពូល ​Wat Phra That Doi Suthep ​ភ្លាម យើងនឹង​ឃើញ​ចេតិយមាសយ៉ាង​ធំ​ស្កឹមស្កៃ បញ្ចេញ​ពន្លឺ​ចែងចាំង​។

​មនុស្សម្នា​ជាច្រើន​ដើរ​ជុំវិញ​ចេតិយ​នេះ ដោយសារតែ​ជន​ជាតិ​ថៃ​ និង​ជន​បរទេស​ខ្លះ​មានជំនឿថា ជា​ទី​​ស័ក្ដិសិទ្ធិ​ក្នុង​ការ​បួង​សួង​សុំ​សេចក្តីសុខ​សប្បាយ​និង​ប្រាថ្នា​អ្វី​បាន​ដូច​បំណង​ដោយ​គ្រាន់​តែដើរ​ជុំវិញ​ចេតិយមាស​បី​ជុំ។​ ​

នៅលើ​ភ្នំ​ Doi Suthep នេះ​ភ្ញៀវក៏​អាចគយគន់​ទេសភាព​ទាំងមូល​នៃ​ខេត្ត​ឈៀងម៉ៃ​ផងដែរ។

បន្ទាប់ពី​ដើរ​កម្សាន្ត​នៅ ​Wat Phra That Doi Suthep អស់រយៈពេល​កន្លះ​ម៉ោង យើង​អាច​បន្តដំណើរ​ទៅ​ទស្សនា​ព្រះរាជឧទ្យាន​រាជព្រឹក្ស​ Royal Park Ratchaphruek) ជា​សួនផ្កា​ដ៏​ធំ​សម្បើម ស្ថាបនា​ឡើង​ដើម្បី​រំព្ញក​ខួប​នៃ​ការឡើង​គ្រង​រាជ​ក៏ដូចជា​ការអបអរសាទរ​គម្រប់​ខួប​ ៨០ ឆ្នាំ​របស់​មហាក្សត្រ​ថៃ ភូមិបុល អាឌុល​យ៉ាដេត។

ព្រះរាជ​ឧទ្យាន​រាជព្រឹក្ស​គឺជា​សួន​ដែលមាន​ប្រជាប្រិយភាព​ជាងគេ​បំផុត​​នៅ​ឈៀង​ម៉ៃហើយទីនេះ​ក៏​ត្រូវបាន​រាប់បញ្ចូល​ជា​មជ្ឈមណ្ឌល​ស្រាវជ្រាវ​ផ្នែក​កសិកម្ម​ផងដែរ។

Content image - Phnom Penh Post
ភោជនីយដ្ឋាន​មាន​សត្វ​ជីរ៉ាហ្វ​​ឈរ​កំដរ​ស្វាគមន៍​ភ្ញៀវ​ទេសចរ។ ឈឹម ស្រីនាង

​ក្នុង​ព្រះរាជ​ឧទ្យាន​នេះ ​ក៏បាន​សង់​ប្រាសាទ ​ Royal Pavilion ដែលមាន​រចនាប័ទ្ម​តាម​អាណាចក្រ​ Lan Na ។​

ទន្ទឹម​នឹង​នោះដែរ​នៅក្នុង​ខែធ្នូ​ដល់​ខែ​កុម្ភៈ​ក៏មាន​ធ្វើ​ពិធី​បុណ្យផ្កា​ដ៏​ធំ​រៀបចំ​យ៉ាង​ប្លែក​ រំលេច​នូវ​​ប្រភេទ​បុប្ផា​ពូជ​កម្រ ​ដែល​ធ្វើ​ឲ្យ​មានការ​ទាក់ទាញ​ពី​ភ្ញៀវ​ទេសចរជាច្រើន​មកពី​បណ្តា​​ប្រទេសនានា។

សំបុត្រ​ចូល​ព្រះរាជ​ឧទ្យាន​​នេះ​គឺ​ភ្ញៀវបរទេស​​ មនុស្ស​ធំ​តម្លៃ ​៣​ ដុល្លារ និង​ ក្មេង ១,៥០ ដុល្លារ។

រយៈ​ពេល​មួយ​ម៉ោង​ដើរលេង​ក្នុង​ព្រះរាជឧទ្យាន​ចប់​គឺ​ដល់ពេល​ទទួលទាន​​អាហារ​ពេល​ល្ងាច​តែម្តង ដោយ​មគ្គុទេសក៍​នឹង​នាំអ្នក​ទៅ​ភ្លក្ស​រសជាតិ​ម្ហូប​ប្រចាំ​តំបន់​ភាគ​ខាងជើង​ក្នុង​ភោជនីយដ្ឋាន Night Safari (Giraffe Restaurant) ដែលមាន​សត្វ​ជីរ៉ាហ្វ ឬ​លា​កវែង​ បី​បួន​ក្បាល​ឈរ​ស្វាគមន៍​ភ្ញៀវ។

សត្វ​ជីរ៉ាហ្វ​ដ៏​ស្លូត​បូត​នេះ​ឈរ​នៅ​ក្បែរ​កន្លែង​ភ្ញៀវអង្គុយ​ទទួល​ទាន​តែ​ម្ដង ធ្វើ​ឲ្យ​យើង​ងាយ​ស្រួល​ហុច​ចំណី​ឲ្យវាស៊ី និង​ថតរូប​អនុស្សាវរីយ៍​លេង​ជាមួយពួកវា​។

សម្រាប់​ការ​ហោះហើរ​ពីភ្នំពេញ​ទៅ​ឈៀង​ម៉ៃ ភ្ញៀវ​ទេសចរអាច​ទិញ​កញ្ចប់​សំបុត្រ​ហោះហើរ​តាមបាងកក​អ៊ែរវេ ទៅមក​ ក្នុងម្នាក់តម្លៃ ២៩៨ ដុល្លារ បូករួម​បញ្ចូល​ពន្ធ​រួច (តម្លៃ​នេះសម្រាប់​តែភ្ញៀវ​ដែលកក់​សំបុត្រ​ក្នុង​ខែកក្កដា​ប៉ុណ្ណោះ តែសំបុត្រនេះ​អាច​មានសុពលភាព​ដល់ខែតុលា​បន្ទាប់​ពីកក់រួច) ៕

ឈឹម​ ស្រីនាង

អត្ថបទគួរចាប់អារម្មណ៍