The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនា​ជីវិត​សត្វ​នា​ពេល​រាត្រី​នៅ​សិង្ហបុរី

ទស្សនា​ជីវិត​សត្វ​នា​ពេល​រាត្រី​នៅ​សិង្ហបុរី

ទស្សនា​ជីវិត​សត្វ​នា​ពេល​រាត្រី​នៅ​សិង្ហបុរី

121105_24
ភ្ញៀវទេសចរទស្សនាសួនសត្វរាត្រី នៅប្រទេសសិង្ហបុរី

សិង្ហបុរី : ដំណើរ​ទស្សនា​សត្វ​ពេល​រាត្រី​នៅ​ប្រទេស​សិង្ហបុរី​ គឺជា​សកម្មភាព​ទេសចរណ៍​ដែល​មាន​អាយុ​កាល​ជិត​២​ទសវត្សរ៍​ហើយ។ សម្ពោធ​នៅ​ខែ​ឧសភា ឆ្នាំ​១៩៩៤ Night Safari គឺ​ជា​សួន​សត្វ​រាត្រី​ដំបូង​គេ​បង្អស់​ក្នុង​លោក។ វា​ត្រូវ​បាន​ចំណាយ​ថវិកា​ស្ថាបនា​អស់​៥២​លាន​ដុល្លារ​អាមេរិក នៅ​លើ​ផ្ទៃ​ដីជិត​ព្រៃ​ត្រូពិក​ទំហំ​ជាង​៤០​ហិកតា។

មាន​ទីតាំង​ស្ថិត​នៅ សួន​សត្វ​សិង្ហបុរី (Singapore Zoo) និង​អាង​ស្តុក​ទឹក (Upper Seletar Reservoir) សួន​សត្វ​រាត្រី​នេះ​ជា​ជម្រក​នៃ​សត្វ​១២០​ប្រភេទ​ខុស​គ្នា ដែល​មាន​ចំនួន​សរុប​១០៤០​ក្បាល។ ក្នុង​នោះ​មាន​៣០​ភាគ​រយ​គឺជា​ពពួក​សត្វ​ខិត​ទៅ​រក​ការ​ផុត​ពូជ។

សួន សត្វ​រាត្រី​ទទួល​បាន​ភ្ញៀវ​ទេសចរ​ជាង​១​លាន​នាក់​ជា​រៀង​រាល់​ឆ្នាំ។ ភ្ញៀវ​ទេសចរ​ដែល​មក​ទីនេះ​និយម​គយ​គន់​សត្វ​ជា​ច្រើន​ប្រភេទ​រួម​មាន​សត្វ​ រមាស​ពូជ​ឥណ្ឌា សត្វ​កំប្រុក​ភ្នែក​លៀន​ពូជ​កម្រ សត្វ​រមាំង ក្ដាន់ និង​សត្វ​កំប្រុក​យក្ស​មាន​ស្លាប​ចេះហោះ​សំកាំង​ខ្លួន​ជា​ដើម។

ថ្វី ដ្បិត​តែ​ស្ថិត​ក្នុង​ពេល​រាត្រី​ក៏​ពិត​មែន ប៉ុន្តែ​បច្ចេកទេស​បំពាក់​ភ្លើង​ដ៏​ស្រទន់​ដូច​ពន្លឺ​ព្រះចន្ទ បាន​ធ្វើ​ឲ្យ​ភ្ញៀវ​ទេសចរ​ហាក់​មាន​អារម្មណ៍​ថា​កំពុង​ស្ថិត​នៅ​ក្នុង​ព្រៃ ពិតៗ ខណៈ​ដែល​ពពួក​សត្វ​ទាំង​នោះ​ក៏​មិន​ត្រូវ​បាន​រំខាន​ដោយ​ពន្លឺ​ចែង​ចាំង ដែរ។

ម៉្យាង​វិញ​ទៀត ពពួក​សត្វ​ទាំង​នោះ​ក៏​មិន​ត្រូវ​បាន​ជាប់​ចំណង​ឬ​ដាក់​ក្នុង​ទ្រុង​ឃុំ ឃាំង​ដែរ ពោល​គឺ​ភ្ញៀវ​អាច​ជិះ​ឡាន​បណ្ដើរ ទស្សនា​បណ្ដើរ​ជាមួយ​នឹង​រនាំង​ការពារ​បែប​ធម្មជាតិ។

ក្រៅពី​ការ​ផ្ដល់​ ទស្សនីយភាព​នៃ​ជីវិត​សត្វ​ អ្វី​ដែល​ពិសេស​ទៅ​ទៀត​នោះ​មាន​ការ​សម្ដែង​សិល្បៈ​វប្បធម៌​របស់​ក្រុម​ជនជាតិ ភាគ​តិច ការ​ផ្លុំ​ខ្លុយ​ជនជាតិ​ និង​ការ​សម្ដែង​ដុត​ភ្លើង​ក្នុង​មាត់​ផង​ដែរ។

សត្វ​មួយ​ចំនួន​ត្រូវ​បាន​គេ​យក​ទៅ​បង្វឹក និង​សម្ដែង​ជា​លក្ខណៈ​សៀក​ក្នុង​ពេល​រាត្រី។

ថ្វី ដ្បិត​តែ​កន្លង​មក សួន​សត្វ​រាត្រី​នេះ​ធ្លាប់​មាន​ឧប្បតិ្ដហេតុ​ខ្លា​រួច​ពី​ជម្រក ឬ​បុរស​ចិន​ត្រូវ​ឆ្មា​ក្រញៅ​មុខ​ពេល​ទស្សនា​ការ​សម្ដែង​ក្ដី ក៏​ប្រជាប្រិយភាព​របស់​សួន​នេះ​បាន​ធ្វើ​ឲ្យ​វា​ទទួល​បាន​ប័ណ្ណ​សរសើរ​ជាច្រើន​នៅ​លើ​ឆាក​អន្តរជាតិ។

សួន​សត្វ​រាត្រី​ចាប់​បើក​ពី​ម៉ោង​៧​កន្លះ​យប់ ដល់​ពាក់​កណ្ដាល​អធ្រាត្រ ជាមួយ​នឹង​តម្លៃ​សំបុត្រ​ប្រមាណ​២០​ដុល្លារ៕

អត្ថបទគួរចាប់អារម្មណ៍