The Phnom Penh Post Search

Search form




Logo of Phnom Penh Post newspaper Phnom Penh Post - ទីឋាន​ទឹក​ហូរ​ប៉ប្រះ​ថ្ម ​ធ្នស់​តាព្រហ្ម​ ជ្រក​ម្លប់​ឈើ​សម្ងំរង់ចាំ​ភ្ញៀវ​ទេសចរ​




ទីឋាន​ទឹក​ហូរ​ប៉ប្រះ​ថ្ម ​ធ្នស់​តាព្រហ្ម​ ជ្រក​ម្លប់​ឈើ​សម្ងំរង់ចាំ​ភ្ញៀវ​ទេសចរ​

Content image - Phnom Penh Post
ទិដ្ឋ​ភាព​តំបន់​រមណីយ​ដ្ឋាន​ទឹកហូរ​ធ្នស់​តាព្រហ្ម នារដូវ​ប្រាំង​នៅតែ​មានទឹក​ហូរ​ដ៏​ត្រជាក់ និង​មាន​ម្លប់​ឈើ​អម​សងខាង​​។ ហុង មិនា

ទីឋាន​ទឹក​ហូរ​ប៉ប្រះ​ថ្ម ​ធ្នស់​តាព្រហ្ម​ ជ្រក​ម្លប់​ឈើ​សម្ងំរង់ចាំ​ភ្ញៀវ​ទេសចរ​

កំពង់ធំៈ បើទោះ​ជា​ផ្លូវ​ចូលរាង​ឆ្ងាយ​បន្តិច និង​សល់​ចម្ងាយ​ជិត ២ គីឡូម៉ែត្រ ត្រូវ​ដើរ​ថ្មើរ​ជើង​ក្តី តែពេល​ទៅ​ដល់​យើងពិត​ជា​បានធូរ​ស្បើយ​អារម្មណ៍​មិនខាន​ជាមួយ​នឹង​ម្លប់​ដើម​ឈើ​ដុះស្រោង នៅ​អមសង​ខាងនៃ​ទី​កម្សាន្ត​រមណីយ​ដ្ឋាន​ទឹកហូរ​ធ្នស់​តាព្រហ្ម​ ខណៈ​ភ្ញៀវទេសចរ​ភាគច្រើន​នៅ​មិនទាន់​បាន​ស្គាល់​នៅ​ឡើយ​ទេ។​

រមណីយ​ដ្ឋាន​ទឹកហូរ​ធ្នស់​តាព្រហ្ម​ មានទី​តាំង​ស្ថិតនៅ​ក្នុង​ភូមិ​ស្វាយ ឃុំ​ស្រើង ស្រុក​ប្រាសាទ​សំបូរ ខេត្ត​កំពង់ធំ ដោយ​លោកអ្នក​ធ្វើដំណើរ​ចេញត្រង់​ចំណុច​នៃទីតាំង​សាលា​ស្រុក​ប្រាសាទ​សំបូរ ចម្ងាយ ៣០ គីឡូម៉ែត្រ តាមផ្លូវ​លំក្រាល​ក្រួសក្រហម។

នៅ​ចម្ងាយ​ប្រហែល ២ គីឡូម៉ែត្រ ជិត​ទៅដល់​គោលដៅ សម្រាប់​ដំណើរ​កម្សាន្ដដោយ​រថយន្ត​នៅមាន​ឧបសគ្គ​ខ្លះព្រោះ​ផ្លូវចូល​ស្ថិតនៅ​ក្នុងសភាព​លំបាក​បន្តិច​គឺ​តម្រូវ​ឲ្យភ្ញៀវ​ដើរ​ថ្មើរជើង​ទើប​ទៅដល់ តែសម្រាប់​ភ្ញៀវប្រើ​មធ្យោបាយ​ម៉ូតូ ឬ​កង់វិញ​គឺថា​គ្មាន​បញ្ហា​ចោទ​នោះឡើយ ហើយ​កាន់តែ​ពិសេស​សម្រាប់​ក្រុម​ភ្ញៀវជាតិ និង​បរទេស ដែល​ចូលចិត្ត​ដំណើរ​កម្សាន្ត​តាមបែប​ផ្សង​ព្រេង​តែម្តង។

Content image - Phnom Penh Post
ផ្ទាំង​ថ្ម​ធំៗ​នា​រដូវ​ប្រាំង​អាច​ឲ្យ​ភ្ញៀវដើរ​ឆ្លង​ពី​ម្ខាង​ទៅ​ម្ខាង​ទៀត។ ហុង មិនា

ទីនេះ​មានទឹកហូរ​ខួបប្រាំង​វស្សា​ ពិតជា​មិនឲ្យ​ភ្ញៀវ​ទេសចរ​ទាំងឡាយ​មកពី​ទីជិត​ទីឆ្ងាយ​ ខកបំណង​ឡើយ ជាមួយ​នឹង​ចរន្ត​ទឹកដ៏​ត្រជាក់​ហូរ​ជ្រែកផ្ទាំង​ថ្ម​ និងមាន​ដើមឈើ​ចោល​ម្លប់​ត្រឈឹង​ត្រឈៃ​ ហើយ​ក៏មាន​ទីតាំង​នៅ​ចន្លោះព្រំ​ប្រទល់​ស្រុក​ពីរទៀត​របស់​ខេត្ត​កំពង់ធំ​ផងដែរ។

លោក ហ៊ុត រ៉ាវុធ វ័យ ៥១ ឆ្នាំ​ ប្រធាន​ភូមិ​ស្វាយ បាន​បង្ហើបឲ្យ​ដឹងពី​ប្រភព និង​ទីតាំង​ភូមិ​សាស្រ្តនៃ​រមណីយដ្ឋាន​ទឹកហូរ​ធ្នស់តាព្រហ្ម​នេះថា៖ «ផ្នែក​ខាងលើ​នៃ​តំបន់​នេះ​ស្ថិតនៅ​ក្នុង​ស្រុកសណ្តាន់ និង​ផ្នែក​ខាងក្រោម​ចម្ងាយ​ប្រមាណ ១៥០០ ម៉ែត្រ​ ជាប់​នឹងភូមិ​អភិវឌ្ឍ​ន៍ថ្មី​ នៅក្នុង​ស្រុក​សន្ទុក ដោយ​ទឹកហូរ​ចាក់ទៅ​កាន់ឯ​ស្ទឹងតាំង​ក្រសាំង ​នោះឯង។ ចំណែក​ប្រភព​ទឹកវិញ​គឺហូរ​មកពីភ្នំជី មាន​ទឹកហូរ​ជាប់​ខួប​ប្រាំង​វស្សា​តែម្តង។ ខណៈ​ថ្មីៗ​នេះ​ ក៏ឃើញ​មាន​ភ្ញៀវ​ទេសចរ​បរទេស​មួយ​ក្រុមធ្លាប់​បាន​មកដល់​ដែរ តែដោយសារ​ផ្លូវចូល​ទៅ​លំបាក​ធ្វើដំណើរ​បន្តិច​ជាពិសេស​ខែ​វស្សា​ព្រោះ​ថា​ស្ថិត​នៅ​ជាផ្លូវ​ដីខ្សាច់»។

លោក ណែត សារី អភិបាល​រងស្រុក​ប្រាសាទ​សំបូរ បង្ហាញ​គំនិត​សុទិដ្ឋិ​និយម​ចំពោះ​វត្តមាន​រមណីយដ្ឋាន​ទឹក​ហូរធ្នស់​តាព្រហ្ម​នេះដែរ​ថា៖ «ទោះបី​ពេលនេះ​ រមណីយដ្ឋាន នៅពុំទាន់​មាន​ទេសចរ​ក្នុង​ស្រុក និង​ក្រៅស្រុក​បាន​ស្គាល់​ច្រើនក្តី តែនៅ​ថ្ងៃមុខ​ ពិតជា​មានគេ​បាន​ស្គាល់ និងមក​ទស្សនា​ច្រើន​មិនខាន​ព្រោះថា​វាជា​ទេសភាព​បែប​ធម្ម​ជាតិ​ពិតៗ»។

Content image - Phnom Penh Post
សត្វ​ទា និង​ក្ងាន កំពុង​ហែល​ទឹក​ក្បែរ​ស្ពាន​ឆ្លង​។ ហុង មិនា

ដោយ​សង្កេត​ឃើញថា​ទីនេះ​ពុំទាន់​មាន​ការរៀបរយ​ឲ្យ​ស័ក្តិសម​ជាតំបន់​រមណីយដ្ឋាន​កម្សាន្តនៅ​ឡើយទេ គឺនៅ​ខ្វះខាត​ច្រើន​ដូចជា​បណ្តាញ​ផ្លូវចូល​ទៅ​មិនទាន់​ស្រួល​ គ្មាន​កន្លែង​សេវាកម្ម​ម្ហូបអាហារ ឬ​ភេសជ្ជៈ ឬ​ក៏ម្លប់​ក្យូសដើម្បី​បម្រើ​ភ្ញៀវ​ទេសចរ ខណៈ​វិសាលភាព​កន្លែងលេង​ទឹកហូរ​នៅមាន​ប្រវែង​ខ្លី និង​ផ្លូវអម​សងខាង​នៅ​មិនទាន់​ត្រួសត្រាយ​បាន​ល្អ​សម្រាប់​ការ​ធ្វើដំណើរ​កម្សាន្ត​ទៅដល់​ទីនោះ។​

អភិបាល​រងស្រុក​ បង្ហើបឲ្យ​ដឹងទៀត​ថា៖ «ពេល​ខាងមុខ​ យើង​ក៏មាន​គម្រោង​ការ​រៀបចំ​រមណីយ​ដ្ឋាន​នេះ​ ឲ្យមាន​ភាពសម​សួនមួយ​ដើម្បី​ទាក់ទាញ​ភ្ញៀវ​ទេសចរ​មកកម្សាន្ត​ឲ្យបាន​ច្រើន​ និង​ប្រែក្លាយ​ឲ្យទៅ​ជា​តំបន់​លែង​មានភាព​ស្ងាត់​ជ្រងំ​ដូចមុន ឬ​ពេលនេះ​តទៅ​ទៀត​ឡើយ​។ ដំបូង​នោះយើង​ត្រូវ​រៀបចំ​បណ្តាញ​ផ្លូវ​នានា ដែល​ពាក់ព័ន្ធ​នឹង​រមណីយ​ដ្ឋាន​នេះ​ឲ្យមាន​ភាពងាយ​ស្រួលធ្វើ​ដំណើរ​ទៅ​មកសិន»៕

អត្ថបទគួរចាប់អារម្មណ៍