.jpg)
ទឹកធ្លាក់ជាដំណាក់ៗ ងាយឲ្យភ្ញៀវទេសចរអង្គុយងូតលេង។ ផា លីណា
ពោធិ៍សាត់: ជាទីកន្លែងកម្សាន្តថ្មីសន្លាងជាមួយនឹងសម្រស់ព្រៃភ្នំធម្មជាតិល្អប្លែកស្ថិតនៅមិនឆ្ងាយប៉ុន្មានពីផ្លូវជាតិលេខ ៥៥ ដែលទើបកសាងថ្មីនោះ ទឹកធ្លាក់ ថ្មដាតូច ឬអ្នកខ្លះនិយមហៅទឹកធ្លាក់ភ្នំ ១០០៥ កំពុងទទួលបានការចាប់អារម្មណ៍ពីភ្ញៀវទេសចរ ដែលធ្វើដំណើរឆ្លងកាត់តំបន់ព្រៃភ្នំនៃខេត្តពោធិ៍សាត់នេះ ឆ្ពោះទៅកាន់ច្រកថ្មដា នាព្រំប្រទល់ជាមួយខេត្ដត្រាតប្រទេសថៃ។
ធ្វើដំណើរលើវិថីពត់ពេន តាមជម្រាលភ្នំខ្ពស់ៗ ប្រមាណ ៥០ គីឡូម៉ែត្រពីទីរួមស្រុកវាលវែង ឬ ១៥៣ គីឡូម៉ែត្រពីទីរួមខេត្តពោធិ៍សាត់ ទឹកធ្លាក់នេះស្ថិតនៅក្នុងភូមិឯកភាព ឃុំថ្មដា ស្រុកវាលវែង។ ទីនេះ មិនទាន់ក្លាយជាងាររមណីយដ្ឋាននៅឡើយទេ និងពុំមានការលើកស្លាកសញ្ញាសម្គាល់ជាតម្រុយផ្ដល់ការងាយស្រួលដល់ភ្ញៀវអ្វីឡើយ។ ភ្ញៀវទេសចរដែលប្រាថ្នាទៅលេង ចាំបាច់ត្រូវចុះសួរអ្នកភូមិតាមផ្លូវ។
ចម្ងាយជាង ១០០ ម៉ែត្រ ប៉ុណ្ណោះ ដើរចុះពីផ្លូវជាតិលេខ ៥៥ ភ្ញៀវទេសចរនឹងបានឃើញ ទឹកហូរលើជម្រាលថ្មជាដំណាក់ ដូចកាំជណ្ដើរដែលត្រូវបានធម្មជាតិខិតខំឆ្លាក់រាប់សតវត្សរ៍ ផ្ដល់ភាពងាយស្រួលងូតកម្សាន្ដដល់ភ្ញៀវទេសចរអមដោយទេសភាពព្រៃព្រឹក្សា។
នៅពេលទៅដល់ភ្ញៀវនឹងបានឃើញទឹកហូររឹមៗ លើកម្រាលថ្មរាបស្មើ។ ប៉ុន្ដែពេលដើរចុះសសៀរទៅតាមខ្សែទឹកធ្លាក់ខាងក្រោមដែលកំពុងហូរជាថ្នាក់ៗនោះ លោកអ្នកនឹងទទួលបាននូវបទពិសោធដ៏សុខសាន្ត ជាពិសេស ជាមួយការសម្រាកលម្ហែនៅតាមបណ្តោយមាត់ទឹកដ៏ត្រជាក់ស្រេង។
អ្វីដែលវិសេសសម្រាប់ឱកាសងូតទឹកលេងកម្សាន្ដមិនអាចខកខាននោះ គឺផ្ទៃទឹកមានសភាពថ្លាឈ្វេង ទោះបីស្ថិតក្នុងរដូវវស្សាយ៉ាងណាក៏ដោយ។ វាពិតជាមានអារម្មណ៍ស្រស់ថា្ល និងរំភើបណាស់នៅពេលដែលបានគយគន់សម្លឹងមើលព្រៃព្រឹក្សា ឮសូរសំឡេងសត្វព្រៃយំខ្ញៀវខ្ញារផងដែរ។
ទឹកធ្លាក់ថ្មដាតូចនេះមាន ២ ថ្នាក់។ ថ្នាក់ខាងលើ ដែលលោកអ្នកដើរចុះមកដល់មុនគេ គឺជាទីឋានសម្រាប់ងូតទឹកលេងកម្សាន្ត ដោយសារដំណាក់នេះ មានទឹកធ្លាក់ហូរលើជម្រាលជាថ្នាក់ៗ ដូចកាំជណ្តើរ ខណៈថ្នាក់ខាងក្រោម គឺជាល្បាក់ទឹកធ្លាក់កម្ពស់ជិត ១០ ម៉ែត្រ។ ការមុជទឹកលេងនៅទីនោះ ពិតជាធ្វើឲ្យលោកអ្នកមានអារម្មណ៍ស្រស់ថ្លា បន្ទាប់ពីហត់នឿយពីដំណើរកម្សាន្តតាមតំបន់ព្រៃភ្នំ។
លោក បូរ ចយ ប្រធានក្រុមដើរល្បាតនៃក្រសួងបរិស្ថាន បានប្រាប់ក្រុមការងារ ភ្នំពេញ ប៉ុស្តិ៍ ថា ទឹកធ្លាក់នេះ មានទឹកហូរខួបប្រាំង ខួបវស្សា គ្រាន់តែនៅរដូវប្រាំងមានទឹកហូរតិចប៉ុណ្ណោះ។
លោកបន្ត បច្ចុប្បន្ន តាំងពីផ្លូវធ្វើស្រួលមក មានភ្ញៀវទេសចរមកកម្សាន្តលេងជារៀងរាល់ថ្ងៃមិនដាច់ ហើយក្រុមការងាររបស់លោកក៏គ្រោងនឹងលើកស្លាកសញ្ញាសម្គាល់ ចំណាំផ្លូវចូលទៅកាន់ទឹកធ្លាក់នេះផងដែរ។
រាប់ចាប់ពីតំបន់ជួរភ្នំក្រវាញ ភាគខាងលិច ទៅកាន់តំបន់ខ្ពង់រាបនៃខេត្តមណ្ឌលគិរី ភាគខាងកើតប្រទេសកម្ពុជាទីឋានដ៏ស្រស់ត្រកាលទាំងអស់នេះ នៅតែជាទីកន្លែងដ៏គួរឲ្យចាប់អារម្មណ៍ ជាកន្លែងផ្តល់នូវអ្វីជាច្រើនដល់អ្នកដែលចង់ធ្វើដំណើរកម្សាន្តបែបផ្សងព្រេងទៅតាមតំបន់ភ្នំ និងខ្ពង់រាបទាំងនោះ ដើម្បីទទួលបានភាពរីករាយជាមួយសម្បត្តិធម្មជាតិសេសសល់ចុងក្រោយរបស់ប្រទេសកម្ពុជា៕
ស្ថិតនៅជិតថ្នល់ជាតិ ទឹកធ្លាក់ ថ្មដាតូច ងាយស្រួលភ្ញៀវទៅលេង។ ផា លីណា
ទឹកធ្លាក់ដ៏ថ្លា និងត្រជាក់ អាចឲ្យអ្នកងូតមានអារម្មណ៍ស្រស់ថ្លា។ ផា លីណា
