.jpg)
ទឹកធ្លាក់យ៉ាងស្មើ មុខកាត់ជាង ១០ ម៉ែត្រ និងកម្ពស់ ៥ ម៉ែត្រ កើតឡើងពីការបិទទំនប់ទ្វារទឹកបឹងពាមល្វា។ ហុង មិនា
ក្រុងច្បារមន៖ ទំនប់ទឹកសម័យ ប៉ុល ពត ដែលត្រូវបានជួសជុលក្រោយរងនូវជំនន់ទឹកភ្លៀងខូចខាតយ៉ាងដំណំ នៅក្នុងស្រុកឱរ៉ាល់ចម្ងាយប្រមាណ ១៣០ គីឡូម៉ែត្រ ភាគនិរតីរាជធានីភ្នំពេញប្រែក្លាយជាទីឋានទេសចរណ៍ដ៏ទាក់ទាញខួបប្រាំងខួបវស្សា។
ផ្ទៃទឹកបឹងតម្កល់ទឹកសម្រាប់ជាប្រយោជន៍ស្រោចស្រពដំណាំ និងទឹកប្រើប្រាស់ទាំងប្រាំង និងវស្សា ក៏ដូចជាកាត់បន្ថយអានុភាពទឹកជំនន់។ វាបានបង្កើតជាផ្លូវទឹកពត់ពេនផុសត្រសងរុក្ខជាតិផ្កាស្មៅ ចាំងឆ្លុះជួរភ្នំឱរ៉ាល់រលករលីង ដែលស័ក្ដិសមជាផ្ទៃក្រោយក្នុងរូបភាពលើបណ្ដាញសង្គម។
យោងតាមវេបសាយក្រសួងធនធានទឹក និងឧតុនិយមបានឲ្យដឹងថា ប្រព័ន្ធធារាសាស្ដ្រទំនប់អាងទឹកពាមល្វា ត្រូវបានក្រសួងធនធានទឹក និងឧតុនិយមបើកការដ្ឋានដំណើរការសាងសង់ឡើងវិញ កាលពីឆ្នាំ ២០១៧ ដោយមានសំណង់តួទំនប់ប្រវែង ៣ ០០០ ម៉ែត្រ សំណង់សិល្បការតូចធំសរុបចំនួន ៤ កន្លែង និងផ្លូវចូលទំនប់ ១ ខ្សែប្រវែង ១ ០០០ ម៉ែត្រ។
វេបសាយដដែលបានបង្ហាញថា៖ «ក្រោយពេលសាងសង់រួច ប្រព័ន្ធធារាសាស្ដ្រទំនប់អាងទឹកពាមល្វា មានលទ្ធភាពស្រោចស្រពលើផ្ទៃស្រែវស្សាជាង ១ ពាន់ហិកតា និងស្រែប្រាំងជាង ១០ ហិកតា ក៏ដូចជាដំណាំរួមផ្សំប្រមាណ ២០ ហិកតាទៀត។ ក្រៅពីនេះ ប្រព័ន្ធធារាសាស្ដ្រក៏ដើរតួនាទីកាត់បន្ថយទឹកជំនន់ស្ទឹងព្រែកត្នោតដែរ»។
គន់ពីខ្នងទំនប់ពាមល្វាទៅកាន់ជួរភ្នំឱរ៉ាល់ រំលេចនូវទស្សនីយភាពដ៏ស្រស់ត្រកាលជាមួយនឹងរូបភាពចែវទូកតាមផ្ទៃបឹងពត់ពេនតាមព្រៃស្មៅខ្ពស់ៗ។
នៅបរិវេណទឹកធ្លាក់សិប្បនិម្មិត មានក្យូសសម្រាកទទួលទានអាហារ។ហុង មិនា
ទឹកធ្លាក់យ៉ាងស្មើមុខកាត់ជាង ១០ ម៉ែត្រ និងកម្ពស់ ៥ ម៉ែត្រ កកើតឡើងពីការបិទទំនប់ទ្វារទឹកបឹងពាមល្វា ដែលជារនាំងទប់ទឹកការពារភូមិឋានប្រជាពលរដ្ឋ និងដំណាំស្រូវរាប់រយហិកតា។
ប្រឡាយសម្រាប់អុំទូកលេងកម្សាន្ដ ទេសភាពជួរភ្នំឱរ៉ាល់បៃតងស្រស់ ឆ្លុះផ្ទៃមេឃពណ៌ខៀវខ្ចី រួមនឹងទិដ្ឋភាពទឹកធ្លាក់សិប្បនិម្មិតគ្រប់រដូវបានអន្ទងចិត្ដភ្ញៀវទេសចរជាតិមកលេងកម្សាន្ដ ដែលពួកគេភាគច្រើនចូលចិត្ដទទួលទានអាហារកុម្ម៉ង់ភ្លាមៗ ក៏ដូចជាការងូតទឹក និងថតរូបសែលហ្វ៊ីយ៉ាងសប្បាយ។
រមណីយដ្ឋានទឹកធ្លាក់ពាមល្វា ជារីសតតែមួយគត់ស្ថិតនៅជាប់នឹងទឹកធ្លាក់សិប្បនិម្មិត ដែលបានផ្ដល់សេវាកម្មម្ហូបអាហារតម្លៃចាប់ពី ២ ម៉ឺនរៀល និងភេសជ្ជៈក្នុងក្យូសលម្ហែសម្រាប់ភ្ញៀវមកពីគ្រប់ទិសទី។
ឈរញញឹមពព្រាយនៅមាត់ផ្លូវ ជាសញ្ញាស្វាគមន៍ភ្ញៀវ អ្នកស្រី អាន ណារិន ជាម្ចាស់រីសតទឹកធ្លាក់ពាមល្វា បានប្រាប់ភ្នំពេញ ប៉ុស្ដិ៍ ថា៖ «យើងមានលក់ម្ហូបកុម្ម៉ង់ភ្លាមៗ ដែលប្រើប្រាស់សាច់សត្វចិញ្ចឹមរបស់អ្នកភូមិនៅបរិវេណភ្នំឱរ៉ាល់នេះ។ ម្ហូបធម្មតា ១ ចាន ២ ម៉ឺនរៀល តែបើភ្ញៀវចង់បានចានធំមានតម្លៃ ៤ ម៉ឺនរៀល។ ចំពោះត្រី យើងលក់តាមទំហំត្រីអ៊ីចឹងទៅ។ ចំណែកឯមាន់ដុត ដែលពេញនិយមចំពោះភ្ញៀវក្នុងស្រុក មានតម្លៃ ៥ ម៉ឺនរៀល ហើយធំវាមានតម្លៃខ្ពស់ជាងនេះបន្ដិចទៀត។
ក្យូសប្រក់ស្បូវជាង ១០ ដែលសង់ប្របក្រោមខ្សែទឹកធ្លាក់ ជាកន្លែងដែលភ្ញៀវអាចគន់ និងថតរូបទឹកធ្លាក់សិប្បនិម្មិត ចាប់ផ្ដើមទទួលភ្ញៀវតាំងពីព្រឹករហូតដល់យប់ ក្រោមបរិយាកាសភ្លើងអំពូលម៉ែត្របំពាក់ថាមពលសូឡា។
អ្នកស្រី ណារិន ដែលជឿថា ទំនប់ពាមល្វានេះជាអតីតទំនប់កសាងឡើងក្នុងសម័យ ប៉ុល ពត បានឲ្យដឹងថា៖ «យើងចាប់បើកទទួលភ្ញៀវពីម៉ោង ៩ ព្រឹក រហូតដល់ម៉ោង ៧ និង ៩ យប់ តែជាទូទៅ ត្រឹមម៉ោង ៦ ល្ងាចប៉ុណ្ណោះ។
ភ្ញៀវអាចអុំទូកលេងកម្សាន្ត ទស្សនាទេសភាពជួរភ្នំឱរ៉ាល់។ហុង មិនា
ភ្ញៀវភាគច្រើនចូលមកសម្រាកលម្ហែក្បែរមាត់ទឹក និងងូតទឹកលេងកម្សាន្ដ។ គ្មាននរណាមានអារម្មណ៍ខ្លាចពេលយប់ព្រលប់នោះទេ ទោះទីនេះរាងនៅដាច់ស្រយាលពីភូមិបន្ដិច ព្រោះយើងមានភ្លើងបំភ្លឺដោយប្រើសូឡា»។
ម្ចាស់រមណីយដ្ឋានទឹកធ្លាក់ពាមល្វាបាននិយាយថា ថ្ងៃធម្មតាមានភ្ញៀវ ៤ ទៅ ៥ ក្យូស ហើយបើថ្ងៃចុងសប្ដាហ៍ រីសតក្បែរទំនប់ទឹកនេះទទួលភ្ញៀវប្រហែល ១០ ក្យូស។ ចំណែកឯថ្ងៃបុណ្យទានមានភ្ញៀវបានពេញៗ។
ម៉ៅ សារ៉ន មកពីភ្នំពេញជាមួយមិត្ដភក្ដិមួយក្រុម អង្គុយក្នុងក្យូសកំពុងទទួលទានអាហារថ្ងៃត្រង់បាននិយាយថា៖ «ពេលទំនេរ ខ្ញុំ និងមិត្ដភក្ដិចូលចិត្ដដើរលេងតាមកន្លែងណាប្លែកៗ។ ទីនេះ យើងអាចជិះទូកលេងលើបឹង និងថតរូបទឹកធ្លាក់ពីខ្នងទំនប់។ សំខាន់បំផុត យើងចង់បង្កើតបរិយាកាសជួបជុំគ្នាញ៉ាំអី»។
ភ្ញៀវទេសចរពីភ្នំពេញអាចចេញដំណើរតាមផ្លូវជាតិលេខ ៥ បត់ទៅកាន់ផ្លូវ ១៣៦ ត្រង់ម្ដុំផ្សារឧដុង្គឆ្ពោះទៅកាន់អមលាំង រួចបត់ស្ដាំពេលដល់ផ្លូវបំបែកអតីតស្ពានដែកចម្ងាយប្រមាណ ១២០ គីឡូម៉ែត្រ។ អ្នកដំណើរអាចបន្ដបររថយន្ដលើផ្លូវលំឆ្លងកាត់ភូមិពោធិ៍មាស និងតំបន់ព្រៃអភិរក្សមេត្ដាធម្មជាតិ ជាទីដែលតារាចម្រៀង មាស សុខសោភា ដាក់គម្រោងដាំកូនឈើ ១ ម៉ឺនដើម មុននឹងដល់ទំនប់ពាមល្វា។
ទឹកធ្លាក់ពាមល្វា ស្ថិតក្នុងភូមិពាមល្វា ឃុំត្រពាំងជោរ ស្រុកឱរ៉ាល់ ខេត្ដកំពង់ស្ពឺ។ ទេសចរអាចទាក់ទងម្ចាស់រមណីយដ្ឋានទឹកធ្លាក់ពាមល្វា តាមទូរស័ព្ទ ០៨៨ ៥៨ ៥៨ ៣៣២៕
វីដេអូ៖
