The Phnom Penh Post Search

Search form




Logo of Phnom Penh Post newspaper Phnom Penh Post - ទឹក​ផុស​ភ្នំ​គូលែន ​រំលេច ៧ ពណ៌​នៅ​ខែ​សីហា

ទឹក​ផុស​ភ្នំ​គូលែន ​រំលេច ៧ ពណ៌​នៅ​ខែ​សីហា

Content image - Phnom Penh Post
ទឹក​ផុស ឬ​ទឹក​ប្រាំ​ពីរ​ពណ៌​ដែល​អ្នកស្រុក និង​ភ្ញៀវ​ទេសចរ​ដួស​យក​មក​លុប​លាងមុខ​ឲ្យ​ត្រជាក់​ត្រជុំ។ ហុង មិនា

ទឹក​ផុស​ភ្នំ​គូលែន ​រំលេច ៧ ពណ៌​នៅ​ខែ​សីហា

សៀមរាប: អាថ៌​កំបាំង និង​អបិយ​​ជំនឿ​ជាច្រើន​បន្ត​បង្កប់​ខ្លួន​នៅ​លើដង​ភ្នំ​គូលែន​ដែល​ជាកន្លែង​ស័ក្ដិ​សិទ្ធិ​ជាងគេ​ក្នុង​ខេត្ត​សៀមរាប ​អង្គរ​។

ព្រះអង្គ​ធំ លិង្គមួយ​ពាន់ តំបន់​ទឹក​ធ្លាក់ វាល​ស្ដេច​គម្លង់ វាល​ព្រះសព ព្រះ​ក្រាល សំពៅ​ធា្លយ ប្រាសាទ​តូចៗ ស្រះ​ដំរី អណ្តូង​ពាន់​ឆ្នាំ ល្អាងថ្ម​លម្អព្រៃ ផ្ទាំង​ថ្មធំ​ជាច្រើន​ហាក់​ដូចជា​ជញ្ជាំង​នៃ​នាវា​ដ៏​ធំមួយ​ ដែល​អ្នក​ទេសចរ​បែប​ផ្សងព្រេង​ត្រូវ​ចំណាយ​ពេល​វេលា​ច្រើន​គួរសម​ទើប​អាច​ទទួល​បទពិសោធ​ពេញ​លេញ​នៃ​ដំណើរ​កម្សាន្ត​បែប​ធម្មជាតិ។

ប៉ុន្តែ តើ​លោក​អ្នក​ធ្លាប់​ឃើញ «​ទឹកប្រាំ​ពីរ​ពណ៌ ឬ ទឹក​ផុស» ដែរ​ឬ​ទេ? ថ្វីបើ​ស្ថិតនៅ​ក្នុង​កណ្តាល​ព្រៃ​យ៉ាង​កណ្តោច​កណ្តែង​លើភ្នំ​កម្ពស់ ៤៩២ ម៉ែត្រ ជាមួយ​ធម្មជាតិ​ខៀវ​ស្រងាត់ ទឹក​ប្រាំពីរ​ពណ៌ ដែល​អ្នកស្រុក​គ្រប់គ្នា​មាន​ជំនឿ​យ៉ាង​មុតមាំ​ថា​ជាទី​កន្លែង​សក្ការៈ តែងតែ​បង្ហាញ​ខ្លួន ទាក់​ទាញ​ភ្ញៀវ​ទេសចរ​ក្នុង​ ​និង​ក្រៅស្រុក​យ៉ាង​ទៀងទាត់​ក្នុង​ខែ​សីហា ពេល​ដែល​មាន​ភ្លៀង​ធ្លាក់​បរិបូណ៌​លើ​ភ្នំ​។ នេះបើ​តាម​សម្ដី​លោក ខៀវ ខេង ជា​អ្នក​រស់នៅ​លើ​ភ្នំដ៏​ស័កិ្ដសិទ្ធិ​ផ្ទាល់​តែ​ម្តង។

អ្នក​ភូមិ​វ័យ​ ៤៥ ឆ្នាំ និយាយ​ថា៖ «ពួកខ្ញុំ​ចាត់​ទុក ទឹក​ប្រាំពីរ​ពណ៌ ឬ ទឹក​ផុស ជាទី​កន្លែង​សក្ការៈ​របស់​ពួកខ្ញុំ។ យើង​តែងតែ​មក​អុជ​ធូប ជា​រឿយៗ នៅ​ពេល​ដែល​យើង​ជួប​បញ្ហា ឬ​បួង​សួងសុំ​អ្វី​មួយ»។ទឹកប្រាំ​ពីរ​ពណ៌ មិនមាន​បរិមាត្រ​ធំនោះ​ទេ វាមាន​ជម្រៅ​ត្រឹម​តែ ២ ទៅ​ ២,៥០ ម៉ែត្រ​ និង​មាន​ទំហំ​ប្រមាណ​ជា ២ ម៉ែត្រ​បួន​ជ្រុង​ប៉ុណ្ណោះ​។

លោក ខេង បាន​ថ្លែង​ទាំង​ញញឹម​ពព្រាយ​ថា៖ «តាម​ពិត​ទៅ ទឹក​ប្រាំពីរ​ពណ៌ ឬ ទឹក​ផុស នេះ​នឹង​មាន​ក្នុងខែ​សីហា​ខាងមុខ​នេះ។ ទឹក​នេះ​ពិតជា​មាន​ប្រាំពីរ​ពណ៌​មែន ពេលខ្លះ​យើង​ឃើញ​ពណ៌​ខៀវ បៃតង លឿង មាស ពណ៌​ទឹក​សមុទ្រជាដើម។ ទឹកនេះ​មាន​ស្លែដុះ​ជុំវិញ ថ្លាឆ្លុះ​ដល់​បាត​ដោយ​យើង​អាច​ឃើញ​ខ្សាច់​ពណ៌ស​ក្បុស​នៅក្នុង​បាត​ទឹក​យ៉ាង​ច្បាស់ ហើយ​វារឹត​តែស្អាត​នៅ​ពេល​ដែល​ទឹកនេះ​ត្រូវពន្លឺ​ព្រះ​អាទិត្យ​ម្តងៗ ពណ៌​របស់វា​ប្រដេញ​គ្នា​ដូច​គ្រាប់​ពេជ្រ​អ៊ីចឹង វាពិត​ជា​ស្អាត​ណាស់»។

Content image - Phnom Penh Post
ភ្ញៀវ​ទេសចរ​ជាតិ និង​អន្ដរជាតិ​មក​ទស្សនា​ទឹក​ផុស​នៅ​ខែសីហា។ រូប សហការី

លោក​បន្ថែម​ទៀត​ថា៖ «អ្វីដែល​ពិសេស​បន្ទាប់​ពី​ពណ៌​របស់វា​នោះ គឺ​ទឹក​នោះ​មាន​ខ្យល់ផុល​ចេញ ពី​បាត​មក ធ្វើឲ្យ​យើង​ឃើញថា ទឹក​នេះ​មាន​សភាព​ដូចទឹក​ពុះ​អ៊ីចឹង វាអាច​ជា​ដង្ហើម​ទឹក​។ នេះជា​មូល​ហេតុ​ដែលគេ​និយមហៅ​ឈ្មោះ​វា​ថា ទឹកផុស​ ឬ​ទឹក​ប្រាំ​ពីរ​ពណ៌​បែប​ហ្នឹង»។

នៅ​ក្បែរទឹក​ប្រាំពីរ​ពណ៌ មានខ្ទម​អាស្រម​ចាស់ៗ​អមសង​ខាង ដែល​អ្នកភូមិ​លើភ្នំ​នេះ​តែងតែ​មក​បួងសួង​សុំសេចក្តី​សុខ អុជ​ធូប និង​យក​ទឹក​នេះទៅ​ព្យាបាល​ជំងឺ​​មិន​ដែល​ខាន។លោក ខេង ថ្លែង​ថា៖ «​ពេល​ខ្លះ មនុស្ស​មួយ​ចំនួន​មក​ទីនេះ ឃើញ​ទឹកនេះ​ជា​ទឹក​ធម្មតា តែ​មនុស្ស​មួយ​ចំនួន​ទៀត រួម​ទាំងរូប​ខ្ញុំ បែរ​ជា​ឃើញ​ទឹកនេះ​មាន​ពណ៌ នេះ​ជា​មូលហេតុ​ដែល​ធ្វើ​ឲ្យ​ពួកខ្ញុំ​កាន់​តែ​មាន​ជំនឿ»។

លោក ខេង បន្ត​ថា​៖ «​មិនថា​តែ​អ្នក​ភូមិទេ​ដែល​មក​ទីនេះ​បួងសួង​សុំ​សេចក្តី​សុខ ក៏មាន​ភ្ញៀវ​ទេសចរ​ដូចជា​ជនជាតិ​ឥណ្ឌា​ផងដែរ ដោយ​គេមាន​ជំនឿ​ថា​ពិត​ជា​ស័ក្ដិសិទ្ធិ ពួកគេ​ថែម​ទាំង​យកដី​ដែល​នៅ​ក្បែរ​មាត់​ទឹកនេះ​ទៅលាប​ខ្លួនប្រាណ​ ក្នុង​ជំនឿ​ថាអាច​បណ្តេញ​គ្រោះ​ចង្រៃ និងជំងឺ​ផ្សេង​ចេញ​ពី​ខ្លួន​របស់​ពួកគេ​ទៀត​ផង»។

អ្នកស្រី សុម៉ាលី ជា​អ្នក​ដែល​រស់នៅ​ក្នុងក្រុង​សៀមរាប​បាន​ថ្លែង​ថា ជានិច្ច​កាល​នៅ​ពេលខែ​សីហា​ចូល​មក​ដល់ ក្រុម​គ្រួសារ​អ្នកស្រី​តែងតែ​ទៅ​កម្សាន្ត​នៅ​តំបន់​ភ្នំ​គូលែន និងឆ្លៀត​ច្រកទឹក​ប្រាំពីរ​ពណ៌​មក​គេហដ្ឋាន​វិញ ដោយសារ​អ្នកស្រី​មាន​ជំនឿថា ទឹកនេះ​ ផ្តល់​ភាព​ត្រជាក់​ត្រជុំ និង​សេចក្តី​សុខ​ដល់​គ្រួសារ​។ ជា​ពិសេស​អ្នកស្រី​មាន​អារម្មណ៍​ថា ទឹកនេះ​ហាក់​ធ្វើឲ្យ​អារម្មណ៍​មនុស្ស​មាន​ភាព​ស្រស់​ស្រាយ​ដោយ​គ្រាន់តែ​យកវា​មក​លុបមុខ ឬលាប​លើ​ខ្លួន​ប្រាណ។​

អ្នក​ស្រី​និយាយ​ថា៖ «​ទឹក​ទីនោះ​មាន​ទំហំ​តូចទេ តែ​ស្អាត​ណាស់ និង​ទឹក​ត្រជាក់​ថែម​ទៀត»។

អ្នកស្រី​បន្ត​ថា៖ «មុន​ពេល​ដែល​ខ្ញុំទៅ​ទីនោះ ខ្ញុំ​ឈឺ​ក្បាល​ហើយ​ថែម​ទាំងអស់​កម្លាំង​ថែម​ទៀតផង ដោយ​ដើរ​ហត់​ពេក ខ្ញុំ​ក៏បាន​យក​ទឹកនោះ​មក​លុបមុខ​ និង​ស្រោច​លើក្បាល ស្រាប់​​តែខ្ញុំ​មាន​អារម្មណ៍​ថាមាន​កម្លាំង​ និង​បាត់​ឈឺក្បាល​ភ្លាមតែ​ម្តង។ បន្ទាប់​មក ខ្ញុំក៏បាន​គិត​ថា​ទឹក​នេះ​ពិតជា​ស័ក្តិ​សិទ្ធិ ខ្ញុំក៏​អុជធូប​បួងសួង​សុំ​សេចក្តី​សុខ និងច្រក​ទឹកនៅ​ទីនោះ​យកមក​ផ្ទះ​វិញ ហើយ​ពួកខ្ញុំ​ក៏​តែងតែ​មកទីនេះ​ជា​រៀងរាល់​រដូវ​ដែលទឹក​ប្រាំពីរ​ពណ៌ ឬទឹក​ផុស នេះមាន​»។​

នៅ​ពេល​ធ្វើ​ដំណើរ​ទៅ ទឹកផុស​ លោក​អ្នក​នឹងបាន​គយគន់​ទេសភាព​ពណ៌​បៃតង​នៃ​ព្រៃ​ព្រឹក្សា សំឡេង​ទឹកហូរ សំឡេង​សត្វ​យំ​ដែលជា​តន្ត្រី​ដ៏​លន្លង់​លន្លោច​កំដរ​បរិយា​កាស។ វាមាន​ចម្ងាយ​​ប្រមាណ​ជា ៥០០ ម៉ែត្រពី​ចំណត​ឡានភ្នំ​គូលែន​ ហើយ​លោក​អ្នកត្រូវ​ធ្វើ​ដំណើរ​ថ្មើរ​ជើង​ស្រប​តាម​បណ្តោយ​ស្ទឹង​លិង្គ​មួយ​ពាន់៕

អត្ថបទគួរចាប់អារម្មណ៍