ក្រុងសៀមរាបៈ ក្មេងស្រី ១ ក្រុមអាយុប្រមាណ ១២ ឆ្នាំបាននាំគ្នាលេងរត់ប្រដេញកាត់ទឹករាក់ៗត្រឹមកំភួនជើងបែកសំពោង ខណៈកុមារី ១ ក្រុមទៀតលេងយោលអង្រឹងចងកាត់ទឹកអូរក្នុងទឹកមុខសើចក្អាកក្អាយយ៉ាងរីករាយ។ ចំណែកឯនៅចុងម្ខាងនៃអូរ ឪពុកម្ដាយដែលមានគ្នា ៥-៦ នាក់ ដំឡើងតុកណ្ដាលដងអូរ អង្គុយជុំគ្នាស្រស់ស្រូបអាហារថ្ងៃត្រង់ និងលើកកែវ កំប៉ុងភេសជ្ជៈជល់គ្នា លើផ្ទៃទឹកត្រជាក់ស្រេង និងក្រោមបរិយាកាសត្រជាក់ល្ហឹមនៃដើមឈើ។
ប្រភពទឹកពីស្រះដូនរីកដែលហូរជ្រាបពីតំបន់ភ្នំគូលែនក្នុងសម្បុរពណ៌ត្នោតប្រវែងជាង ១០០ ម៉ែត្រក្លាយជាគោលដៅទាក់ទាញភ្ញៀវមកពីគ្រប់ច្រកល្ហកជាពិសេសក្រុមគ្រួសារមានកូនចៅតូចៗ ដែលប្រាថ្នាងូតទឹកអូរធម្មជាតិក្រាលខ្សាច់ធម្មជាតិដោយមិនបាច់ខ្វល់ពីបញ្ហាសុវត្ថិភាពលង់ទឹក។
ដោយធ្វើដំណើរតាមផ្លូវជាតិ ៦៦ បំបែកបត់ស្ដាំទៅកាន់ប្រាសាទបន្ទាយស្រី ឬផ្លូវទៅកាន់អន្លង់វែង ត្រង់បង្គោលគីឡូម៉ែត្រ ១៨ បត់ស្ដាំប្រមាណ ៨ គីឡូម៉ែត្រ ផ្ទះស្នាក់បៃតងនិងស្រះដូនរីកចាប់ផ្ដើមទទួលភ្ញៀវតាំងពីព្រលឹមរហូតដល់រសៀលជ្រាលជ្រេជាមួយសេវាកម្មមុខម្ហូបជាច្រើនប្រភេទក្នុងក្យូសប្របមាត់អូរ។
លោក ជុំ តុលា អាយុ ២៦ ឆ្នាំជាអ្នកគ្រប់គ្រងរីសតផ្ទះស្នាក់បៃតងបាននិយាយថា៖ «យើងមានក្យូសទាំងអស់ចំនួន ២០ ស្ថិតនៅលើមាត់ទឹកអូរងាយស្រួលដល់ភ្ញៀវចុះងូតទឹក និងថតរូប និងអង្រឹងចង់កាត់ទទឹងអូរដើម្បីឲ្យភ្ញៀវគេងយោលលេងក្រោមម្ហប់ឈើត្រឈឹងត្រឈៃ»។
លោកបន្ដថា ផ្ទះស្នាក់បៃតងមានសេវាកម្មក្យូសឯកជន ក្យូសចំហ និងតង់សម្រាប់បោះជំរំចំពោះភ្ញៀវ ដែលមានបំណងស្នាក់នៅក្នុងបរិស្ថានធម្មជាតិលើផ្ទៃធំទូលាយ។
បើទោះបីជារីសតនេះមានឈ្មោះផ្ទះស្នាក់បៃតង ដែលទំនងជាមានបន្ទប់ស្នាក់បែបអ្នកស្រុកស្រែយ៉ាងណាក៏ដោយ ក៏ទីឋានធម្មជាតិមួយនេះផ្ដល់សេវាកម្មចម្បងជាក្យូសលម្ហែ និងម្ហូបអាហារទទួលទានក្បែរមាត់អូរទឹករាក់ៗដ៏ត្រជាក់ស្រេង។
អ្នកគ្រប់គ្រង តុលាបានលើកឡើងថា៖ «បច្ចុប្បន្នយើងមានក្យូសចំនួន ២០ សម្រាប់ទទួលភ្ញៀវហើយគោលបំណងរបស់យើង នាពេលអនាគតយើងក៏នឹងបន្ថែមផ្ទះស្នាក់បែបធម្មជាតិសម្រាប់ភ្ញៀវ»។
ដោយអះអាងពីការប្រើប្រាស់បន្លែបង្ការក្បែរផ្ទះបែបធម្មជាតិក្នុងការចម្អិនទឹកគ្រឿងរហូតដល់ស្ដេក និងមាន់ដុត។ មុខម្ហូបអាហារនៅផ្ទះស្នាក់បៃតងមានតម្លៃចាប់ពី ១៨ ០០០ រៀលក្នុង ១ ចានតូចរហូតដល់ ២៨ ០០០ រៀលសម្រាប់ ១ ចានធំ។
លើសពីសេវាកម្មក្យូស និងម្ហូបអាហាររីសត ដែលអូរមានទឹកហូរ ខួបប្រាំងខួបវស្សានេះក៏បានបន្ថែមសកម្មភាពកម្សាន្ដជាច្រើនទៀតរួមមានការនេសាទជិះទូក ជិះកង់ រទេះគោ និងមគ្គុទេ្ទសក៍នាំដើរលេងនៅបរិវេណបន្ទាយស្រី។
ស្ថិតនៅលើផ្ទៃសរុប ១៤ ហិកតារីសតផ្ទះស្នាក់បៃតង និងស្រះដូនរីក មានទីតាំងស្ថិតនៅក្នុងភូមិខ្វាវ ឃុំត្បែងស្រុកបន្ទាយស្រី ខេត្ដសៀមរាប។ សម្រាប់ការកក់កន្លែង និងព័ត៌មានផ្សេងៗ សូមទាក់ទងទូរស័ព្ទលេខ ០១០ ៣៥ ០០ ៤៥៕