ក្រុងរ៉ូម: ភ្ញៀវទេសចរមកកម្សាន្ដនៅទីក្រុងមានផ្លូវទឹកខ្វាត់ខ្វែង វេនិក នឹងត្រូវបង់ប្រាក់ពន្ធបន្ថែមដើម្បីយកកម្រៃមកប៉ះប៉ូវតម្លៃសេវាកម្មសម្អាត និងរក្សាសុវត្ថិភាពទីឋានប្រវត្ដិសាស្ដ្រ។ នេះបើយោងតាមមន្ដ្រីក្រុងបានប្រកាសកាលពីថ្មីៗនេះ។
វិធានការ ដែលទើបបានអនុម័តជាផ្នែកមួយនៃការគ្រប់គ្រងថវិកាចំណាយ អនុវត្ដឲ្យអាជ្ញាធរក្រុងទេសចរណ៍នេះចាប់ពីខែកក្កដា យកថ្លៃចំណតពីភ្ញៀវចន្លោះ ២,៩ ទៅ ១១,៥ ដុល្លារ អាស្រ័យលើរដូវកាល។
ការគិតប្រាក់បន្ថែមត្រូវបានធ្វើឡើងគ្រប់ភ្ញៀវទាំងអស់ មិនថាពួកគេស្នាក់នៅពេលយប់ ឬក៏អត់នោះទេ។ នោះមានន័យថា វានឹងអនុវត្ដលើភ្ញៀវទាំងអស់ ដូចជា នាវាដឹកភ្ញៀវរាប់ពាន់គ្រឿង ដែលបច្ចុប្បន្នបានគេចពីការបង់ពន្ធចាស់ស្រាប់ពីសំណាក់សណ្ឋាគារ និងម្ចាស់អគារជួលសម្រាប់អ្នកស្នាក់នៅពេលយប់។
នាវាប្រមាណ ៦០០ គ្រឿងបានឈប់សំចតនៅទីក្រុងវេនិករៀងរាល់ឆ្នាំ ដោយបានបង្កើនការត្អូញត្អែរថា ទីក្រុងនេះកំពុងតែជោរជន់ដោយភ្ញៀវទេសចររាប់លាននាក់។
អាកាសចរណ៍ និងក្រុមហ៊ុនដឹកជញ្ជូនក៏ត្រូវជាប់កាតព្វកិច្ចពន្ធថ្មីនេះផងដែរ។ ក្រុមមន្ដ្រីក្រុងបានប៉ាន់ប្រមាណថា ពន្ធនេះអាចកៀរគរចំណូល ៥៥ លានដុល្លារបន្ថែមក្នុង ១ ឆ្នាំ។
អភិបាលក្រុងវេនិក ស្វីហ្គី ប្រ៊ូកញ៉ារ៉ូ បានប្រាប់កាសែត La Repubblica ថា៖ «ការចំណាយថ្លៃសម្អាតមជ្ឈមណ្ឌលប្រវត្ដិសាស្ដ្រ និងថែរក្សាសន្ដិសុខសណ្ដាប់ធ្នាប់អស់រយៈពេលជាច្រើនឆ្នាំ ជាបន្ទុករបស់ពលរដ្ឋក្នុងក្រុងទាំងមូល»។
លោកបន្ដថា៖ «អរគុណចំពោះភ្ញៀវទេសចរដែលនឹងជួយយើងរក្សាបរិស្ថានក្រុងវេនិក និងអនុញ្ញាតឲ្យពលរដ្ឋរស់នៅប្រកបដោយផាសុកភាព»៕