The Phnom Penh Post Search

Search form




Logo of Phnom Penh Post newspaper Phnom Penh Post - ទេសចរ​ប្រថុយ​គ្រោះ​ព្រោះ​ចង់​ឃើញ​រូង​ទឹកកក​ស្អាត​អស្ចារ្យ

ទេសចរ​ប្រថុយ​គ្រោះ​ព្រោះ​ចង់​ឃើញ​រូង​ទឹកកក​ស្អាត​អស្ចារ្យ

រូង​ទឹកកក​ដ៏​ស្អាត​អស្ចារ្យ​ដែល​​​អាច​ចូលទៅ​កម្សាន្ត​បាន​តែ​រដូវ​រងា
រូង​ទឹកកក​ដ៏​ស្អាត​អស្ចារ្យ​ដែល​​​អាច​ចូលទៅ​កម្សាន្ត​បាន​តែ​រដូវ​រងា។

ទេសចរ​ប្រថុយ​គ្រោះ​ព្រោះ​ចង់​ឃើញ​រូង​ទឹកកក​ស្អាត​អស្ចារ្យ

ក្រុង​ម៉េឌីសិន: នៅ​លើ​ច្រាំង​នៃ​បឹង​ស៊ុបភើរៀរ​នៃ​ឧបទ្វីប​បេហ្វៀល ក្នុង​រដ្ឋ​វីសខន​ស៊ីន សហរដ្ឋ​អាមេរិក​គឺជា​ទិស​ដៅ​ទេសចរណ៍​ដ៏​ទាក់ទាញ​នៅ​រដូវ​រងា​មក​ទស្សនា​ ល្អាង​ទឹក​កក​បេហ្វៀល​។

ល្អាង​ទាំង​នេះ​ត្រូវ​បាន​បង្កើត​ឡើង​រាប់​លាន​ឆ្នាំ​មុន​ដោយ​ចលនា​ផែន​ទឹកកក​ និង​រលក​ដែល​បោក​បក់​មក​ជាប់​នឹង​ជញ្ជាំង​ថ្ម​បង្កើត​ចេញ​ជា​ចម្លាក់​ច្រូង​ច្រាង​ពី​លើ​ផ្ទៃ​បឹង​ស៊ុបភើរៀរ។

នៅ​រដូវ​ក្ដៅ តំបន់​នេះ​ជា​ទី​កម្សាន្ដ​សម្រាប់​អ្នក​ជិះ​ទូក​កាយៈ។ ប៉ុន្ដែ​ នៅ​ពេល​អាកាស​ធាតុ​ប្រែ​ត្រជាក់​ ហើយ​ទឹក​បឹង​ចាប់​ផ្ដើម​កក​បណ្ដើរ​ៗ ល្អាង​​ប្រែ​សម្រស់​មួយ​បែប​ទៀត។ ភ្ញៀវ​ទេសចរ​អាច​ដើរ​លើ​ផ្ទៃ​បឹង​ដែល​​កក​ និង​ទៅ​ទស្សនា​កំណក​ធម្មជាតិ​ដ៏​អស្ចារ្យ​មួយ​នៅ​ភាគ​ខាង​ជើង​រដ្ឋ​វីសខនស៊ីន។ ទឹក​ដែល​ហូរ​ស្រក់​ពី​​ពិតាន​ល្អាង​បាន​កក​ទៅ​ជា​កំណក​​ទឹកកក​​រាប់​ពាន់​ដើម​ ខណៈ​ច្រក​ចូល​ហ៊ុមព័ទ្ធ​ដោយ​ស៊ុម​ទឹក​​ធ្លាក់​ដែល​កក​។

កំណក​ទឹកកក​ទាំង​នេះ​ផ្ដុំ​បាន​ជា​រូប​រាង​ផ្សេង​ៗ​ដែល​ផ្លាស់​ប្ដូរ​ពី​កន្លែង​មួយ​ទៅ​កន្លែង​មួយ​ និងពី​មួយ​ថ្ងៃ​ទៅ​មួយ​ថ្ងៃ​។ នេះ​គឺជា​ហេតុ​ផល​ចម្បង​ដែល​មនុស្ស​ម្នា​ជា​ច្រើន​នាំ​គ្នា​មក​កម្សាន្ដ​ប្រចាំ​នៅ​ល្អាង​ទឹកកក​បេហ្វៀល​ដើម្បី​បាន​គយគន់​សម្រស់​កំណក​ទឹកកក​ថ្មី​ៗ​។

ថ្វីដ្បិត​តែ​រៀង​រាល់​ឆ្នាំ ភ្ញៀវ​រាប់​ពាន់​នាក់​បាន​មក​ទស្សនា​ល្អាង​ទាំង​នេះ​យ៉ាង​ណា​ក៏​ដោយ ក៏​តំបន់​ទឹកកក​នេះ​មាន​គ្រោះ​ថ្នាក់​ណាស់ ខណៈ​ទឹកកក​ងាយ​នឹង​រអិល​ធ្លាក់​ ដោយ​ការ​ប្រេះ​ស្រាំ ឬ​បែក​បាក់​នូវ​ស្រទាប់​រឹង​ជា​ដើម។

ម្យ៉ាង​វិញ​ទៀត ទឹក​បឹង​ក៏​មិន​កក​រៀង​រាល់​ឆ្នាំ​សម្រាប់​ភ្ញៀវ​ចូល​ទស្សនា​ដែរ។ កាល​ពី​ឆ្នាំ​មុន គឺជា​លើក​ទី​១​ក្នុង​រយៈ​ពេល​ ៥​ ឆ្នាំ​ដែល​ល្អាង​ត្រូវ​បាន​បើក​ឲ្យ​ភ្ញៀវ​ចូល​នៅ​រដូវ​រងា ហើយ​ឆ្នាំ​នេះ​ក៏​បាន​បើក​ទ្វារ​ដែរ​ដោយ​សារ​តែ​ទឹកកក​មាន​កម្រាស់​ស្ដើង​។

កាល​ពី​ឆ្នាំ​មុន រូង​ភ្នំ​ទឹកកក​មួយ​នេះ​បាន​ទាក់ទាញ​មនុស្ស​ប្រមាណ ​១៣៨ ០០០ ​នាក់​ឲ្យ​មក​ទស្សនា​។ ការ​ទស្សនា​ឧទ្យាន​នេះ​មាន​តម្លៃ​ ៥​ ដុល្លារ​សម្រាប់​មនុស្ស​ម្នាក់​ដែល​ចង់​ចូល​ទៅ​ក្នុង​ល្អាង​ ប៉ុន្ដែ​គ្រាន់​តែ​ចត​យាន​យន្ដ​ក៏​ត្រូវ​ចំណាយ​ប្រាក់ ៣​ ដុល្លារ​បន្ថែម​សម្រាប់​ទី​ចំណត​ក្បែរ​ល្អាង​៕ HR

អត្ថបទគួរចាប់អារម្មណ៍