The Phnom Penh Post Search

Search form




Logo of Phnom Penh Post newspaper Phnom Penh Post - ទេសភាព​កំពង់ផែ​សមុទ្រ និង​ទន្លេ​ស្នេហ៍ នាំ​ទេសចរ​មក​ក្រុង​កៅស៊ុង

ទេសភាព​កំពង់ផែ​សមុទ្រ និង​ទន្លេ​ស្នេហ៍ នាំ​ទេសចរ​មក​ក្រុង​កៅស៊ុង

Content image - Phnom Penh Post
អគារ​កម្ពស់​ ៨៥ ជាន់​ខ្ពស់​ត្រដែត​ត្រដឹម នៅពេល​គយគន់​ពីលើ​នាវា​ដែន​សមុទ្រ។ ឈឹម ស្រីនាង

ទេសភាព​កំពង់ផែ​សមុទ្រ និង​ទន្លេ​ស្នេហ៍ នាំ​ទេសចរ​មក​ក្រុង​កៅស៊ុង

ក្រុងកៅស៊ុង: នាវា​បោះពួយ​លើផ្ទៃ​សាគរ​ខៀវ​ស្រងាត់​នាំភ្ញៀវ​គយគន់​ទេសភាព​នៃ​ទីក្រុង​កំពង់ផែ​ដ៏ជឿន​លឿន ពោរពេញ​ដោយ​អគារ​ខ្ពស់ៗ កប៉ាល់​តូចធំ មាន​ទាំង​នាវា​ចម្បាំង បាន​ធ្វើឲ្យ​ភ្ញៀវទេសចរ​ខ្មែរ​លាន់មាត់​ស្ងើច​សរសើរ​ទីក្រុង​កៅស៊ុង នៃ​ទឹកដី​កោះ​តៃវ៉ាន់។

ស្ថិត​នៅ​ភាគ​ខាងត្បូង​កោះ​តៃវ៉ាន់ ទីក្រុង​កៅស៊ុង ដែល​មាន​អាកាសធាតុ​ត្រូពិច​ដូច​ប្រទេស​កម្ពុជា​ដែរ​នោះ មាន​ទិដ្ឋភាព​ទាក់ទាញ ពិសេស​នៅពេល​ដែល​ទេសភាព​ទីក្រុង​ត្រូវបាន​គយគន់​សម្លឹង​មើល​ពីនាវា​បណ្ដែត​ខ្លួន​លើ​សមុទ្រ។

អគារ​កម្ពស់ ៨៥ ជាន់ ខ្ពស់​ជាងគេ​លំដាប់​ទី ២ នៅ​តៃវ៉ាន់ អគារ​មហោស្រព​រាងដូច​ភ្នែក នាវា​គ្រប់​សណ្ឋាន​ប្រភេទ និង​កំពង់ផែ​ទំនើប​ដ៏មមាញឹក បាន​ធ្វើឲ្យ​ភ្ញៀវ​នៅលើ​ទូក​ជក់ចិត្ត​ទស្សនា ព្រមទាំង​ផ្ដិត​យក​រូបភាព​ឥត​ជិនណាយ។

ក្រោយពី​ដំណើរ​លើទឹក​ប្រៃ ចុះ​ពីលើ​នាវា​នេះ ភ្ញៀវ​អាច​បន្ត​ទៅ​ជិះទូក​ដើរ​ដោយ​ថាមពល​ព្រះអាទិត្យ នៅ​ទន្លេ​ស្នេហ៍​ហូរចូល​សមុទ្រ​ជិត​បង្កើយ។

ទន្លេ​ស្នេហ៍ ដ៏ល្បី​នៅ​ទីក្រុង​កៅស៊ុង មាន​ប្រវែង ១២ ម៉ែត្រ​តភ្ជាប់​កំពង់ផែ​សមុទ្រ។ ក្រៅពី​មាន​នាទី​ជា​ឆ្អឹងខ្នង​នៃ​ពាណិជ្ជកម្ម ទន្លេ​ស្នេហ៍​ក៏ពោរពេញ​ទៅ​ដោយ​តំបន់​ទេសចរណ៍​វប្បធម៌ ដែល​មគ្គុទ្ទេសក៍​នឹង​ពិពណ៌នា​ឲ្យភ្ញៀវ​ស្ដាប់​យ៉ាង​ជក់ចិត្ត។

Content image - Phnom Penh Post
ទេសភាព​នៅ​ទន្លេ​ស្នេហ៍ ក្នុង​ទីក្រុង​កៅស៊ុង។ ឈឹម ស្រីនាង

ចម្លាក់​ក្បាល​នាគ​កន្ទុយ​ត្រី ព្រះវិហារ​រ៉ូម៉ាំង​កាតូលិក​រំលេច​ក្បូរ​ក្បាច់​រចនា ស្ពាន​កៅស៊ុង និង​អគារ​តុលាការ សុទ្ធតែ​ភ្ជាប់​នូវ​រឿងរ៉ាវ​គួរឲ្យ​ចង់ស្ដាប់។ ជារឿយៗ​នៅ​លើ​ទន្លេ​ស្នេហ៍​ក៏ឧស្សាហ៍​មាន​ទិដ្ឋភាព​ប្រគំ​តន្ត្រី ពិធី​តាំង​គោម និង​ប្រកួត​ទូក​នាគ​ផងដែរ។

កាន់តែ​ពិសេស​ទៅទៀត ទីក្រុង​កៅស៊ុង ដែល​ល្បី​ខាង​ស្នេហា​បរិស្ថាន​នោះ ក៏រឹង​តែធ្វើ​ឲ្យ​អ្នកទេសចរ​មាន​មោទនភាព​មួយ​កម្រិត​ថែម​ទៀត​ជាមួយ​ការធ្វើ​ដំណើរ​លើទូក​ដែល​ប្រើ​ថាមពល​ពន្លឺ​ព្រះអាទិត្យ។

នាវា​ដែល​ដឹក​ភ្ញៀវ​គយគន់​ទេសភាព​នៅ​ទន្លេ​ស្នេហ៍ មាន​បំពាក់​ដោយ​ដំបូល​បន្ទះ​ស្រូប​ពន្លឺ​ថ្ងៃ។ ក្រោយ​ពីដាក់​សម្ពោធ​ឲ្យ​ដំណើរការ​តាំង​ពីឆ្នាំ ២០១០ នាវា​ទេសចរណ៍​គ្រឿងៗ​តម្លៃ​ជាង ២៣ ម៉ឺនដុល្លារ​អាមេរិក ប្រើ​ពន្លឺព្រះអាទិត្យ​នេះ​ផ្ទាល់បាន​ក្លាយជា​ជលយាន​ដែល​ភ្ញៀវ​ប្រាថ្នា​ចង់ជិះ​តែម្ដង។

អតីត​អភិបាលក្រុង​កៅស៊ុង លោកស្រី ជិន ជូ ដែល​ប្រកាស​ឲ្យប្រើប្រាស់​ទូក​ទេសចរណ៍​ពន្លឺព្រះអាទិត្យ​នេះ​ធ្លាប់​បាន​និយាយថា៖ «ទូកនេះ​ផ្ដល់​បទពិសោធ​ដំណើរ​កម្សាន្ត​ដល់​ភ្ញៀវទេសចរ​ឲ្យកាន់​តែស្គាល់​ច្បាស់​ពី​ទីក្រុង​កៅស៊ុង ដែល​ពិតជា​ស្នេហា​បរិស្ថាន»៕

Content image - Phnom Penh Post
ទូក​ប្រើថាមពល​ព្រះអាទិត្យ​សម្រាប់​ដឹក​ទេសចរ។ ភ្នំពេញ ប៉ុស្តិ៍

អត្ថបទគួរចាប់អារម្មណ៍