The Phnom Penh Post Search

Search form




Logo of Phnom Penh Post newspaper Phnom Penh Post - ទេស​ភាព​ថ្មដុះ​នៅ ភ្នំ​ពើង​តា​នាន់ នាំ​ទេសចរ​ពុះពារ​ទៅ​កម្សាន្ត

ទេស​ភាព​ថ្មដុះ​នៅ ភ្នំ​ពើង​តា​នាន់ នាំ​ទេសចរ​ពុះពារ​ទៅ​កម្សាន្ត

Content image - Phnom Penh Post
ទេសភាព​ថ្មដុះ​នៅ​​រមណីយ​ដ្ឋាន​ធម្មជាតិ ភ្នំ​ពើង​តានាន់​ ទាក់ទាញ​ភ្ញៀវ​ទេសចរ​ជាតិ និង​អន្ដរជាតិ​​។ ធិក កល្បាណ

ទេស​ភាព​ថ្មដុះ​នៅ ភ្នំ​ពើង​តា​នាន់ នាំ​ទេសចរ​ពុះពារ​ទៅ​កម្សាន្ត

សៀមរាប: ផ្ទាំងថ្ម​ដុះមូល​ធំៗ​ដេញ​ពន្លឺ​ភ្លឺ​ផ្លេកៗ​ត្រួត​លើគ្នា​រប៉ាត់​រប៉ាយ​រាប់ពាន់​ដុំ ទឹកអូរ​ហូរ​រិញៗ​កាត់ថ្ម ដើមឈើ​បៃតង​ស្រស់អម​ជាមួយ​វាល​ចម្ការ​នៅតាម​ជើង​ភ្នំ ផ្កាព្រៃ​ភ្នំ​ពណ៌ស ក្រហម ​រួមទាំង​ពន្លកផ្កា​ចាហួយ​ចេញ​ត្រួយខ្ចី​ដ៏ស្រស់​បំព្រង​ជាមួយ​ឱកាស​អាច​មើល​ឃើញ​ទិដ្ឋភាព​ប្រជាជន​រស់នៅ​បាន​ស្ទើរតែ ១៨០ ដឺក្រេ រមណីយដ្ឋាន​ធម្មជាតិ​ «ភ្នំ​ពើងតា​នាន់» នៅ​ទឹកដី​ខេត្ត​សៀមរាប កំពុង​តែ​ទាក់ទាញ​ភ្ញៀវ​ជាតិ និង​អន្តរជាតិ​ពុះពារ​គ្រប់​ឧបសគ្គ​ដើម្បី​ទៅ​ផ្តិតយក​រូបភាព​ដ៏ប្លែក​ភ្នែក​ក្រោម​មេឃ​មួយ​នេះ។

នៅតាម​ដងផ្លូវ​ដែល​អម​សងខាង​ទៅ​ដោយ​សំណាប​ពណ៌​បៃតង​ខ្ចី​ចំពេល​មេឃ​រលឹម។

ទោះជា​ផ្លូវមាន​សភាព​លំបាក​បន្តិច​ព្រោះរង​ការដាច់​ច្រោះ​ដោយ​ទឹកភ្លៀង និង​ទឹកហូរ​​ពីភ្នំក្តី​ តែ​លោកអ្នក​នៅតែ​អាច​ធ្វើដំណើរ​ដោយ​ម៉ូតូ និងដោយ​រថយន្ត​បាន​ក្នុងចម្ងាយ​ប្រមាណ​ជាជាង ៦០ គីឡូម៉ែត​ពីទី​រួមខេត្ត​ស្ថិតនៅ​ក្នុងភូមិ​គោកព្នៅ​ ឃុំ​គោកដូង ស្រុក​អង្គរជុំ។

ថ្វីបើ​ផ្លូវមិន​មាន​សភាព​ស្មុគស្មាញ​ តែលោក​អ្នក​គប្បីមាន​អ្នកនាំ​ផ្លូវ​ម្នាក់ និង​ចាំបាច់​បំផុត​ត្រូវ​វេចខ្ចប់​បាយ​ទឹក​ទៅបរិភោគ​ផង ព្រោះ​នៅ​ទីនោះ​ពុំទាន់​មាន​កន្លែង​លក់ចំណី​អាហារ​នៅ​ឡើយ​ទេ។

លោក កែវ គាន ជាមន្ត្រី​មកពី​អង្គភាព​ការពារ​បរិស្ថាន និង​អភិវឌ្ឍន៍​បានថ្លែង​ក្នុង​ពេលលោក​កំពុង​តែដើរ​ល្បាតនៅ​លើ​ភ្នំនេះ​ថា​ លោក​ទើប​តែមក​ល្បាត​នៅទី​នេះ​បន្ទាប់ពី​មនុស្សម្នា​ចាប់ផ្តើម​មកកម្សាន្ត​យ៉ាង​ច្រើន​កាលពី​ពីរបី​សប្តាហ៍​មុន។

លោក​បានថ្លែង​ថា៖ ​«ថ្វីដ្បិត​តែ​ទីនេះ​ឆ្ងាយ​ពីទីរួម​ខេត្ត​ហើយ​ផ្លូវ​លំបាក​ខ្លាំងតែ​មនុស្ស​ចាប់ផ្តើម​មក​លេង​ទីនេះ​ច្រើន​មែន​ទែន​ មិនថា​ខ្មែរ​មិនថា​ជនបរទេស​ ថ្ងៃ​ខ្លះ​មនុស្ស​មក​ដល់ទៅ ៤០០ ឬ ៥០០ នាក់​ឯ​ណោះ»។

Content image - Phnom Penh Post
តំបន់​ថ្ម​ដុះ​ក្លាយជា​ទី​ថត​រូប​ដ៏​ពេញ​និយម​។ ធិក កល្បាណ

ប្រវត្តិ​នៃទី​នេះហាក់​នូវ​ស្រពេច​ស្រពិល ហើយ​អ្នកភូមិ​មិន​ដឹងពី​មូលហេតុ​ដែល​នាំ​ឲ្យមាន​ឈ្មោះ​ «ពើងតានាន់» បែប​នេះទេ។ ​អ្វី​ដែល​អ្នកភូមិ​នៅ​ទីនេះ​ដឹង​ច្បាស់​គឺពួកគេ​ថា​ទីនេះ​គឺជា​សមុទ្រ​កាលពី​អតីតកាល​រាប់​ម៉ឺន​ឆ្នាំមុន។

លោកបាន​រៀបរាប់​ថា៖ «បើ​តាម​អ្នកភូមិ​គេ​ថាភ្នំ​ពើងតានាន់​នេះ​គឺជា​ច្រាំង​សមុទ្រ។ បើ​អ្នក​មិនជឿ​លោក​អ្នកអាច​ឈរ​ពី​លើ​ដុំថ្ម​ដុះណា​មួយ​ដែល​នៅ​ក្បែរ​ចំណោត​ភ្នំពើង​នេះ​ហើយ​សម្លឹង​ទៅ​ទិស​ខាងកើត លោក​អ្នកអាច​នឹងមាន​អារម្មណ៏​ថា​លោក​អ្នក​កំពុងឈរ​លើច្រាំង​សមុទ្រ​មួយ​ដែល​សមុទ្រ​នេះព័ទ្ធ​ជុំវិញ​ទៅ​ដោយ​ជួរភ្នំ​ដងរែក ភ្នំគូលែន និង​ភ្នំដទៃ​ទៀត​មីរដេរដាស»។

លោក កែវ គាន បាន​រៀបរាប់​បន្ត​ទៀត​ថា៖ «ហើយ​បើស​ង្កេត​ទៅ​លើថ្ម​ដុះ​ទាំងនោះ​ទំនង​ជា​កើត​ចេញ​បណ្ដុំ​ដីខ្សាច់​ស និង​ពពុះ​ទឹកសមុទ្រ​ដែល​ជាប់គ្នា​រាប់​ម៉ឺនឆ្នាំ​ដែល​អាចដេញ​ពន្លឺនៅ​ពេល​ដែលត្រូវ​ពន្លឺ​ព្រះអាទិត្យ​ហើយថ្ម​ទាំងនេះ​មិន​ធ្វើឲ្យ​អ្នក​រអិល​នោះ​ទេ​បើទោះ​ជាអ្នក​ដើរឡើង​នៅ​ពេល​ដែល​មាន​ភ្លៀង​ធ្លាក់»។

យោង​តាម​មន្ត្រី​មកពី​អង្គភាព​ការពារ​បរិស្ថាន និង​អភិវឌ្ឍន៍​ខាងលើ​ តំបន់នេះ​ក៏មាន​ទឹកជ្រោះ​ដែល​ធ្លាក់ពី​ភ្នំផង​ដែរតែ​ដោយសារ​លោក​ទើប​តែមក​បំពេញ​ការងារ លោក​មិន​ទាន់​ហ៊ាន​ចូលទៅ​ត្រួសត្រាយ​នៅឡើយ​រង់ចាំ​ទាល់តែ​លោក​ស្គាល់​តំបន់​ច្បាស់​លាស់​សិន។

Content image - Phnom Penh Post
ទី​ថ្ម​ដុះ​ត្រូវ​បាន​គេ​ជឿ​ថា​ជា​អតីត​សមុទ្រ។ ធិក កល្បាណ

លោក​ថ្លែង​ថា៖ «ក្រុម​ការងារ​របស់​ខ្ញុំបាន​ដាំ​ដើមឈើ​បន្ថែម​ចំនួន ៥០ ដើម​នឹងមាន​គម្រោង​បង្កើន​សេដ្ឋកិច្ច​អ្នកភូមិ​ទីនោះ​ដោយ​នឹងបង្កើត​កន្លែង​លក់ចំណី​អាហារ​សម្រាប់​អ្នកមក​កម្សាន្ត​ទៅភ្នំ​ពើងតា​នាន់​នេះ»។

ទាំង​ក្មេង​ទាំងចាស់​ច្រើន​ព្រលយ​ពាក្យថា​ហត់ព្រោះ​ត្រូវធ្វើ​ដំណើរ​ថ្មើរ​ជើង​ប្រមាណ​ជា ៧០០ ម៉ែត្រ​ តែ​ភាពនឿយ​ហត់​ទាំងនោះ​នឹងរលាយ​បាត់​សល់​តែស្នាម​ញញឹម និង​ពាក្យលាន់​មាត់​សរសើរ​អំពី​ទេសភាព​លើភ្នំ។

កំពុង​ឡើងលើ​ថ្មដុះ​ដើម្បីថត​រូប ​ប្អូនស្រី សារឿន ជាអ្នក​ស្រុក​ វ៉ារិន អាយុ ១៨ ឆ្នាំ​ ដែល​បាន​ជិះម៉ូតូ​ជាមួយ​មិត្តភក្ដិ​ មក​កាន់ភ្នំ​នេះ​ទាំង​ជាប់ផុង​ម៉ូតូ​ផង ទាំងភ្លៀង​ផង ផ្លូវ​រអិលផង នោះ​ បាន​និយាយ​ថា៖ «គេថា​ស្អាត​គ្រប់គ្នា​ខ្ញុំក៏​មក​មើល​ផ្ទាល់ដូច​ពាក្យ​គេថា ឮគេ​ថាមួយ​រយ​ដង​មិនស្មើ​បាន​ឃើញម្តង។ ស្អាត​ណាស់​បងអើយ ទេសភាព​បែប​ហ្នឹង​ខ្ញុំស្មាន​តែស្រុក​យើងអត់​មាន​ទេមាន​តែប្រទេស​គេទេ តាម​ពិត​ស្អាត ស្ទើរតែ​ស្អាត​ជាង​ស្រុកគេ​ផង»។

នៅពី​ក្រោម ភ្នំពើង​តានាន់ មាន​អាស្រម​បុរាណ​មួយ​ដែល​មាន​ព្រះសង្ឈ​តែពីរ​ព្រះអង្គ​គង់​នៅ​តែ​ប៉ុណ្ណោះ។

អាស្រម​នោះ​មាន​ឈ្មោះ អាស្រម​មនោរម្យ​ភ្នំ​ពើងតា​នាន់ ដែល​ពីមុន​មានតែ​អ្នកភូមិ​ប្រមាណ​ជា ៣០ គ្រួសារ​អាស្រ័យ​នៅប៉ុណ្ណោះ។

ព្រះតេ​ជគុណ​ តោ ញិល មាន​សង្ឃដីកា​ប្រាប់​ ភ្នំពេញ ប៉ុស្តិ៍ ថា៖ «បើមាន​មនុស្ស​មកច្រើន​បែប​នេះ​ហើយ អាត្មាសូម​ស្នើសុំ​អាជ្ញាធរ​ឲ្យ​ជួយធ្វើ​ផ្លូវ​ទៅមក ដើម្បី​ឲ្យញាតិ​ញោម​ធ្វើ​ដំណើរ​មក​ទីនេះ​បាន​ស្រួល​ផង ហើយ​បើអាច​ អាត្មាក៏​ស្នើសុំ​សាលារៀន​មួយ​សម្រាប់​ក្មេងនៅ​ក្បែរ​ភ្នំនេះ​ផងដែរ ពីព្រោះ​រាល់​ថ្ងៃនេះ​ ពួកគេ​រៀននៅ​ក្រោម​ដើមឈើ​ក្នុង​បរិវេណ​អាស្រម​នេះទេ»៕

អត្ថបទគួរចាប់អារម្មណ៍