សៀមរាប៖ ម៉ោងជិត ៦ ល្ងាច ព្រះសុរិយាចាប់ផ្ដើមអស្ដង្គត រ៉ឺម៉កពណ៌ក្រហមភ្ជាប់កៅអីរាងអក្សរ «U» កំពុងរង់ចាំវត្ដមានភ្ញៀវមុនពេលធ្វើដំណើរទស្សនាសកម្មភាពនាពេលរាត្រីក្នុងតំបន់ផាប់ស្ទ្រីត។
រ៉ឺម៉កក្រហមមិនមែនជារទេះអាហារ និងការ៉េម តែជាបារ៍លើរ៉ឺម៉កដែលភ្ញៀវអាចរីករាយនឹងភេសជ្ជៈ ទស្សនាទេសភាពពេលរាត្រី ព្រមទាំងរាប់អានមិត្ដភក្ដិ និងហាត់ប្រាណបញ្ចេញញើសពីការរួមគ្នារវៃឈ្នាន់ជំរុញកង់រ៉ឺម៉កអូសទៅមុខ។
ពេលអូសខ្លួនលើដងវិថីចាប់ពីមុខកាហ្វេហាដរ៉ុក តាមដងស្ទឹងសៀមរាប ឡើងស្ពានឆ្ពោះតំបន់ផាប់ស្ទ្រីត និងផ្សាររាត្រី រ៉ឺម៉កបារ៍ បានទាក់ទាញចំណាប់អារម្មណ៍អ្នកដំណើរដែលរមែងចោលកន្ទុយភ្នែកមើលពីភាពសប្បាយរីករាយនេះ។
ទេសចរកូរ៉េខាងត្បូង Seon Gnam បានឲ្យដឹងថា៖ «យើងចូលចិត្ដបទពិសោធបែបនេះ។ នេះជាសកម្មភាពចំណូលចិត្ដយើងមួយក្នុងពេលរាត្រីនៅកម្ពុជា និងទំនងជាពេញមួយដំណើររបស់យើងមកកាន់តំបន់អាស៊ីអាគ្នេយ៍»។
Bar Cycle Cambodia គឺជាបារ៍រ៉ឺម៉កដំបូងបំផុតនៅកម្ពុជា និងទី ២ នៅតំបន់អាស៊ីអាគ្នេយ៍បន្ទាប់ពីកោះបាលី ប្រទេស ឥណ្ឌូនេស៊ី បាននិងកំពុងប្រតិបត្ដិការក្នុងទីក្រុងប្រវត្ដិសាស្ដ្រតាំងពីដើមឆ្នាំពីសំណាក់ស្ដ្រីអូស្ដ្រាលីម្នាក់។
កាលពីជាង ៦ ឆ្នាំមុន Miss Sonya Duck ហៅ Ducky បានមកដល់កម្ពុជាក្នុងនាមជាភ្ញៀវទេសចរម្នាក់ រួចក៏ជាប់ចិត្ដនឹងប្រទេសនេះ ព្រមទាំងបានបម្រើការងារជាគ្រូបង្រៀនភាសាអង់គ្លេសក្នុងក្រុងភ្នំពេញ។
គ្រាមួយ Ducky បានធ្វើដំណើរទេសចរណ៍តែឯងទៅកាន់កោះបាលី និងបានសាកបារ៍ចល័តនេះជាលើកដំបូង។ ពេលនោះ អ្នកនាងស្រាប់តែចង់បង្កើតបារ៍ប្រភេទនេះមួយនៅកម្ពុជា ជាពិសេសទីក្រុងសៀមរាបដែលសម្បូរមនុស្សចម្រុះជាតិសាសន៍។
Ducky បានប្រាប់ ភ្នំពេញប៉ុស្ដិ៍ ពេលកំពុងរង់ចាំភ្ញៀវថា៖ «មែន! ក្រោយពីខ្ញុំបានឃើញនៅបាលី វាបានទាក់ចិត្ដខ្ញុំឲ្យចាប់ផ្ដើមនៅកម្ពុជា។ ខ្ញុំជ្រើសរើសសៀមរាប ដើម្បីផ្ដល់បទពិសោធអ្វីដែលថ្មីដល់អ្នកមកទស្សនាប្រាង្គប្រាសាទនានា»។
ការទិញដំណើរកម្សាន្ដនេះ អតិថិជននឹងអាចទទួលទានភេសជ្ជៈនានា ដូចជា ស្រាបៀរ ស្រាវ៉ុដកា ជីន និងទឹកក្រូចឥតដែនកំណត់ ព្រមទាំងការធាក់កង់រ៉ឺម៉កកម្សាន្ដតាមដងស្ទឹងសៀមរាប ផាប់ស្ទ្រីត តំបន់ភោជនីយដ្ឋានដ៏អ៊ូអរ។
អ្នកនាង Ducky ដែលរៀបចំកម្មវិធីជប់លៀងខួបកំណើតផងនោះបានបន្ដថា៖ «យើងអាចទទួលចាប់ពីភ្ញៀវ ៤ នាក់រហូតដល់ ១២ នាក់។ គ្មានបញ្ហាទេ! យើងទទួលទាំងអស់ ដូចជា ភ្ញៀវទេសចរ ពលរដ្ឋខ្មែរ និងជនបរទេស ហើយសកម្មភាពពេញនិយម គឺការរៀបចំពិធីខួបកំណើត»។
អ្នកនាងនិយាយថា ក្រៅពីការជួល ១ ម៉ោង ឬ ២ ម៉ោង ពួកគេក៏អាចទិញជាកញ្ចប់ ៣ ម៉ោងកន្លះ ដែលធ្វើដំណើរលើផ្លូវតែមួយ និងបន្ដទៅតាមតំបន់ផ្សេងៗទៀត។
Seon Gnam បានបន្ដថា៖ «យើងមានភាពរីករាយខ្លាំង ដែលយើងបានបន្ថែមដំណើរ ១ ម៉ោងទៀត។ យើងអាចធាក់កង់តិច ឬច្រើនទៅតាមចំណូលចិត្ដ។ ដូច្នេះ កុំបារម្ភខ្លាចនឿយហត់អី»។
ពេល Smilley ជាតៃកុងបារ៍រ៉ឺម៉ក ដែលខំស្កាត់ពីភ្នំពេញជាមួយ Ducky បានអញ្ជើញភ្ញៀវឡើងរ៉ឺម៉កដែលកំពុងក្រេបស្រាបៀរ និងងក់ក្បាលតាមចង្វាក់ភ្លេង ខណៈជើងខំរវៃរន្ថាន់តាមសូរតន្ត្រី។
សំណើចក្អាកក្អាយ សំឡេងជជែកប្រជែងនឹងចង្វាក់តន្ដ្រី និងសកម្មភាពជល់កំប៉ុងស្រាបៀរ លាន់រំពងនៅតាមដងផ្លូវ។
មុនពេលបារ៍ឡើងចំណោត និងបត់ក្បាលឡើងស្ពានស្ទឹងសៀមរាប អ្នកនាង Ducky បានងាកមកស្រែកប្រាប់សមាជិកលើរ៉ឺម៉កថា៖ «ម៉ោះយើង! បង្កើនល្បឿន!»។
យ៉ាងណាមិញសម្រែកបន្ថែមល្បឿនមិនមែនមានន័យថា វាជាបន្ទុករបស់ភ្ញៀវដែលត្រូវធាក់ឈ្នាន់ល្បឿនលើដងផ្លូវដ៏វែងឆ្ងាយនោះទេ។
Ducky ប្រាប់ថា៖ «កុំបារម្ភ! ការបង្កើនល្បឿនតាមរយៈការធាក់ឈ្នាន់គ្រាន់តែជាសកម្មភាពរីករាយ និងរួមចំណែកទំនាក់ទំនងជាមួយគ្នាប៉ុណ្ណោះ។ រ៉ឺម៉ករបស់យើងក៏មានបំពាក់អគ្គិសនី ដែលផ្ដល់ជម្រើសដល់អតិថិជន ដូចជាការធាក់ឈ្នាន់សុទ្ធ ការជំរុញល្បឿន ៥០ បូក ៥០ រវាងកម្លាំងឈ្នាន់ និងអគ្គិសនី ឬជម្រើសអគ្គិសនីសុទ្ធ»។
ក្រោយពីចូលចតនៅចំណតមុខកាហ្វេហាដរ៉ុក Richard មកពីក្រុងមែនឆេស្ទ័រ ជាមួយមិត្ដប្រុស បានប្រាប់ពីអារម្មណ៍ថា៖ «សប្បាយមែន! ខ្ញុំមិនធ្លាប់ជួបបទពិសោធបែបនេះពីមុនមកទេ។ ល្អ និងមានបរិយាកាសគួររីករាយមែនទែន។ យើងមកទីនេះ ៤ ទៅ ៥ ថ្ងៃហើយ ហើយនឹងបន្តដំណើរទៅភ្នំពេញ និងកំពតទៀត»។
Bar Cycle Cambodia ចាប់ផ្ដើមដំណើរការពីម៉ោង ៤ ល្ងាច ដល់ម៉ោង ១០ យប់រៀងរាល់ថ្ងៃ ដែលភ្ញៀវអាចកក់ដំណើរកម្សាន្ដរយៈពេល ១ ឬ ២ ម៉ោង តម្លៃ ១៥ ដុល្លារ ១ ម៉ោង សម្រាប់ម្នាក់ ៣ ម៉ោងកន្លះ តម្លៃ ៤៥ ដុល្លារម្នាក់។
សម្រាប់ព័ត៌មានបន្ថែម សូមចូលទៅកាន់វេបសាយ https://barcycle-cambodia.com ឬហ្វេសប៊ុក @barcyclecambodia៕
វីដេអូ៖