.jpg)
បឹងឈូកខាងលិច (West Lake Lotus) នៅក្រុងហាណូយ ជាទីទាក់ទាញអ្នកថតរូបអ៊ីនស្តាក្រាម។ រូបថត AFP
ក្រុងហាណូយ: បឹងផ្កាឈូកខាងលិចមានទេសភាពដ៏ស្រស់ត្រកាលបំផុតមួយសម្រាប់ជាទស្សនីយភាពត្រជាក់ភ្នែក។ ផ្កាឈូកចាប់ផ្ដើមចោលសម្រស់មីរដេរដាស និងហុចផ្លែចាប់ពីខែឧសភាដល់ខែកក្កដា។
ទុកកង់ម៉ូតូមួយកន្លែង អង្គុយក្នុងខ្ទមកណ្ដាលបឹងឈូក រួចរីករាយនឹងទឹកតែបណ្ដែតត្របកផ្កាឈូក ដែលបង្កើនរសជាតិ និងក្លិនឈ្ងុយឈ្ងប់ដល់ភេសជ្ជៈកាន់តែវិសេស។ សំបុត្រចូលលេងបឹងឈូកនេះមានតម្លៃចាប់ពី ២ ម៉ឺន ដល់ ៥ ម៉ឺនដុង (៣៥០០ ដល់ ជិត ១ ម៉ឺនរៀល)។
ស្ដ្រីទាំងចាស់ និងក្មេងនាំគ្នាមកលេងបឹងឈូកអំឡុងពេលរដូវឈូកចេញផ្កា ដែលជាទស្សនីយភាពថតរូបសែលហ្វីដ៏ស្រស់ត្រកាល ជាពិសេសក្នុងឈុតអាវប្រពៃណីវៀតណាម។
លើសពីផ្កាឈូកស្ថិតនៅលើផ្ទៃបឹងតែមួយ ម្ចាស់ចម្ការក៏បានដាំដើមផ្កាចម្រុះពណ៌ផ្សេងៗទៀតបំណងផ្គាប់ចិត្ដអ្នកនិយមសែលហ្វ៊ី។
ឧទ្យាននេះក៏បានបន្ថែមនូវរុក្ខជាតិប្លាស្ទិក និងរៀបចំតុបតែងបែបកែច្នៃ តែវានៅតែរំលេចនូវទិដ្ឋភាពស្រស់ស្អាត និងទាក់ទាញភ្ញៀវរាប់ពាន់នាក់ក្នុងមួយថ្ងៃៗ។ បឹងឈូកខាងលិច (West Lake) មានប្រជាប្រិយខ្លាំងបំផុតក្នុងរដូវផ្កាឈូករីក។
ក្នុងមួយថ្ងៃមនុស្សម្នាក់អាចប្រមូលផលផ្កាឈូកបាន ៤០០ ទង។ រូបថត AFP
រយៈពេលជាច្រើនឆ្នាំ ដើមឈូកត្រូវបានដាំនៅតាមតំបន់នានានៃទីក្រុងហាណូយសម្រាប់ជាការលម្អ ថ្វាយព្រះ និងផលិតតែដ៏ល្បីល្បាញ។
គ្រួសាររបស់លោក ង្វៀង ធេសាន ក្នុងស្រុកបាកធូលែម បានដាំឈូកលើផ្ទៃដី ៦ ពាន់ហិកតា។ លោក សាន បាននិយាយថា៖ «ឈូកដុះតាមធម្មជាតិរបស់វា និងអាចប្រមូលផលចន្លោះពីថ្ងៃទី ១៩ ខែឧសភា រហូតដល់ដើមខែកញ្ញារៀងរាល់ឆ្នាំ»។
ពេលផ្ការីកពេញទំហឹងលោក សាន ក្រោកពីដំណេកតាំងពីម៉ោង ៤ ភ្លឺ និងអុំទូកកាត់បឹងឈូកដើម្បីបេះផ្កា តែមិនអាចផ្គត់ផ្គង់តម្រូវការសម្រាប់ភ្ញៀវដែលបានរង់ចាំនៅត្រើយម្ខាងជាស្រេចបាន។ ការប្រមូលផលផ្កាឈូកនាព្រឹកព្រលឹមមុនផ្កាបើកស្រទាប់ ពិតជាល្អបំផុត។ ដូច្នេះក្លិនឈ្ងុយឈ្ងប់របស់វានៅតែស្ថិតស្ថេរបានយូរ។
លោក ហាញ ជាកសិករដាំឈូកបាននិយាយថា៖ «ការផលិតតែឈូកមិនមានបញ្ហាស្មុគស្មាញនោះទេ។ កិច្ចការចម្បងគឺជ្រើសរើសប្រភេទឈូកដ៏ត្រឹមត្រូវ។ ឈូកត្រូវតែមកពីបឹងភាគខាងលិចដោយត្រូវមានរាងមូល និងថ្លោសៗ»។
មនុស្សម្នាក់អាចប្រមូលផលផ្កាឈូកជាង ៤០០ ទងក្នុងមួយថ្ងៃ។
ស្លឹកលាយតែលម្អតផ្កាឈូកមានតម្លៃ ៥០ ម៉ឺនដុង (ជិត ១០ ម៉ឺនរៀល) ក្នុងមួយគីឡូក្រាម។ សម្រាប់តែឈូកសុទ្ធមិនមានលាយស្លឹក មួយគីឡូក្រាមអាចមានតម្លៃដល់ ១០ លានដុង (១, ៧ លានរៀល)។
តែឈូកមួយកញ្ចប់តូចដែលអាចឆុងបានពីរបីដងមានតម្លៃ ៣ ម៉ឺនដុង (ជាង ៦ ពាន់រៀល) ហើយវាត្រូវបានរក្សាទុកក្នុងទូទឹកកកបាន ៦ ខែ។
លោក ឡេ ង៉ុកយេន ធ្លាប់ផលិតតែឈូកបាននិយាយថា៖ «ជាទូទៅផ្កា ១ អាចផលិតស្លឹកតែឈូកបានប្រមាណ ១៣ ក្រាម។ ស្លឹកតែនឹងបញ្ចេញនូវក្លិនឈូកដ៏ក្រអូប»៕ HR
