សៀមរាប៖ ក្រៅពីការទស្សនាប្រាង្គប្រាសាទនៅទឹកដីខេត្តសៀមរាប ភ្ញៀវទេសចរអាចភ្លក្សបទពិសោធថ្មីប្លែក ជាការផ្សងព្រេងបើកបរម៉ូតូកង់ ៤ កម្សាន្តតាមវាលស្រែខៀវស្រងាត់ គយគន់សម្រស់ធម្មជាតិ ក្រោមជំនោរខ្យល់បរិសុទ្ធលើផ្លូវដីក្រហមឯទីជនបទ។
សេវាកម្មជិះម៉ូតូកង់ ៤ Siem Reap Quad Bike Adventure ត្រូវបានបង្កើតឡើងដោយលោក វង្ស សាវុធ ជាអ្នកចូលចិត្តដំណើរកម្សាន្តបែបផ្សងព្រេងតាមទីជនបទ និងក្នុងព្រៃ និងធ្លាប់ធ្វើការក្នុងវិស័យទេសចរណ៍ជាច្រើនឆ្នាំ។
លោកសង្កេតឃើញថា៖ «ភ្ញៀវមកភាគច្រើន គឺមកលេងប្រាសាទអង្គរវត្ត បន្ទាប់ពីមើលប្រាសាទ គាត់ចង់មានអ្វីកម្សាន្តបន្ថែមទៀតហើយពួកបរទេស គេចង់ឃើញជីវិតនៅតាមជនបទសាមញ្ញ ខុសពីជីវិតអ្នកទីក្រុងហ៊ឺហា ដែលពួកគេសុទ្ធតែធ្លាប់ឃើញហើយ។ អ៊ីចឹងខ្ញុំឃើញថា ពេលពួកគាត់បានទៅលេង គឺគាត់សប្បាយ និងចាប់អារម្មណ៍ទីជនបទណាស់ អ៊ីចឹងបានខ្ញុំងាកមកបង្កើតក្រុមហ៊ុននេះខ្លួនឯង»។
ផ្តើមអាជីវកម្មនៅឆ្នាំ ២០១១ Siem Reap Quad Bike Adventure មានម៉ូតូកង់ ៤ ត្រឹមតែ ៨ គ្រឿងប៉ុណ្ណោះ ជាមួយដើមទុនតិចតួច និងជួបឧបសគ្គជាច្រើន ដូចជាបញ្ហាថវិកាត្រូវសន្សំសំចៃ ភ្ញៀវមានចំនួនតិចតួច និងមានបញ្ហាចម្បង គឺការកុម្ម៉ង់គ្រឿងបន្លាស់ម៉ូតូតម្លៃថ្លៃពីក្រៅប្រទេសដោយចំណាយពេលរង់ចាំយូរ។
លោក សាវុធ បន្ថែមថា៖ «អ៊ីចឹងបង្កើតដំបូង ដើម្បីឲ្យក្រុមហ៊ុនយើងដំណើរការបាន យើងបានបង្កើតទំនាក់ទំនងដើម្បីផ្សព្វផ្សាយឲ្យភ្ញៀវបានដឹង អ៊ីចឹងមានខាងក្រុមហ៊ុនទេសចរណ៍ ខាងសណ្ឋាគារ និងមានតាមរយៈ Guide ជាដើម បន្ទាប់មកយើងចេះតែទទួលបានភ្ញៀវជាហូរហែ រហូតមកដល់សព្វថ្ងៃ»។
ម៉ូតូកង់ ៤ របស់ Siem Reap Quad Bike Adventure មាន ៣ ប្រភេទដូចជា៖ Polaris ម៉ាស៊ីន ៣៥០ cc Yamaha ម៉ាស៊ីន ៣៥០ cc និង Kawasaki ម៉ាស៊ីន ៣០០ cc សុទ្ធសឹងតែជាប្រភេទម៉ូតូកង់ ៤ ប្រើប្រាស់លេខ អូតូ ងាយស្រួលក្នុងការបើកបរ មិនពិបាកដូចម៉ូតូកង់ ៤ ដទៃដែលប្រើចង្កឹះលេខ ឬអំប្រ៊ីយ៉ា។
ម្ចាស់ក្រុមហ៊ុន អាយុ ៣៩ ឆ្នាំរូបនេះបញ្ជាក់ថា ម៉ាស៊ីនម៉ូតូកង់ ៤ ទាំងអស់នេះ មានកម្លាំងម៉ាស៊ីនមធ្យម ស័ក្ដិសមនឹងស្ថានភាពផ្លូវដីក្រហម និងមានជង្ហុកច្រើនក្នុងតំបន់ជនបទ។
ភ្ញៀវដែលមានចំណាប់អារម្មណ៍ចង់ជិះម៉ូតូកង់ ៤ ក្រុមហ៊ុនក៏មានសេវាកម្មដឹកជញ្ជូនភ្ញៀវទៅមកពីទីតាំងភ្ញៀវស្នាក់នៅផងដែរ។ បន្ទាប់មក ភ្ញៀវដែលមកដល់ទីតាំងនឹងទទួលបានការបង្រៀន និងណែនាំមុននឹងចេញដំណើរ ខណៈភ្ញៀវមានបទពិសោធរួច អាចឡើងកាន់ដៃចង្កូតម៉ូតូកង់ ៤ នេះតែម្ដង។
ម្ចាស់ក្រុមហ៊ុនមាឌធំដំបងរូបនេះនិយាយថា៖ «ម៉ូតូនេះស្រួលបើក ព្រោះជាម៉ាស៊ីនអូតូ ហើយមុននឹងឡើងជិះ ពួកខ្ញុំបង្រៀនគាត់ជាមុន ឲ្យគាត់ស្ទាត់បាត់ភ័យសិន ទើបយើងឲ្យគាត់បើកបរ តែគាត់នៅតែភ័យតែបើអត់ទេ យើងឲ្យក្រុមការងារអង្គុយពីក្រោយមើលការខុសត្រូវ»។
បុគ្គលិកដែលពន្យល់ និងមើលការខុសត្រូវភ្ញៀវមានចំនួនជាង ១០ នាក់ សុទ្ធសឹងតែមានជំនាញក្នុងការបើកបរម៉ូតូកង់ ៤ ដោយស្គាល់ពីភូមិសាស្ត្រច្បាស់លាស់។
ក្រុមហ៊ុនមានម៉ូតូកង់ ៤ សម្រាប់ជួលចំនួន ៥៥ គ្រឿង ដោយគិតម៉ោង ក្នុង ១ ម៉ោង តម្លៃ ៣០ ដុល្លារ ២ ម៉ោង តម្លៃ ៦០ ដុល្លារ និង ១ ថ្ងៃតម្លៃ ១៧០ ដុល្លារ។
ភ្ញៀវរបស់លោកភាគច្រើនជាជនជាតិបរទេសដែលប្រាថ្នាជិះម៉ូតូកង់ ៤ ទៅមើលថ្ងៃលិចតាមវាលស្រែឯទីជនបទ ក្រោយពីបញ្ចប់ ដំណើរកម្សាន្តទស្សនាប្រាសាទនានារួចមក។
លោកបន្ថែមថា៖ « ភ្ញៀវគេសរសើរយើងថាល្អ ហើយសប្បាយ ព្រោះពេលពួកគេមកដល់កន្លែងវិញ យើងតែងតែសួរគាត់ថា មានអារម្មណ៍ម៉េចដែរ? ហើយឃើញទេសភាពស្រុកខ្មែរម៉េចដែរ? គាត់ថា ពេញចិត្ត good គាត់ចូលចិត្ត។ ទន្ទឹមនឹងនេះ យើងក៏ទទួលបានលិខិតសរសើរពី Trip Advisor រៀងរាល់ឆ្នាំ ដោយសារភ្ញៀវគាត់បង្ហោះក្នុង blog អីផ្សេងៗថាយើងល្អ អ៊ីចឹង»។
ក្រុមហ៊ុន Siem Reap Quad Bike Adventure មានទីតាំង ជិតសាលាឃុំសាលាកំរើក ប្រមាណ ១ គីឡូម៉ែត្រ ពីផ្សារចាស់។ ទំនាក់ទំនងទូរស័ព្ទលេខ ០១២ ៣២ ៤០ ០៩ /០៩៧ ៩៦៥ ១៤ ៥១/ ០១១ ៦២ ០៧ ៧៧ ឬហ្វេសប៊ុក Siem Reap Quad Bike Adventure៕
វីដេអូ៖