ក្រុងសែនមនោរម្យ: ភ្លៀងមូសុងនារដូវវស្សាបានជំរុញប្រភពទឹកគ្រប់ច្រកល្ហកហូរពីទីទួលខ្ពស់ធ្លាក់តាមចំណោតថ្មចូលអាងទឹក បង្កើតជាទឹកធ្លាក់ ស្ថិតនៅក្បែរផ្លូវបង្កើយ។ ទឹកធ្លាក់កម្ពស់ ៧ ម៉ែត្រហូរនាំទឹកសម្បុរកាហ្វេទឹកដោះគោ ញែកជា ២ ធ្លាក់ លើថ្លុកទឹកធំជម្រៅប្រមាណ ១០ ម៉ែត្រ ជ្រកក្រោមម្លប់ឈើត្រជាក់ល្ហឹម មុននឹងរត់ប្រដេញគ្នាតាមដងអូរទៅកាន់ខ្សែទឹកខាងក្រោម។
ទឹកធ្លាក់អូរអង្កាល ស្ថិតក្នុងភូមិពុំទាន់មានឈ្មោះ ឃុំស្រែអំពូម ស្រុកពេជ្រាដា ខេត្ដមណ្ឌលគិរី ចម្ងាយប្រមាណ ១០ គីឡូម៉ែត្រពីផ្លូវបំបែកកោះញែក ទឹកជ្រោះប៊ូស្រា ឬប្រមាណ ២០ គីឡូម៉ែត្រពីទីរួមខេត្ដមណ្ឌលគិរី រំលេចនូវភាពស្រស់បំព្រងបែបធម្មជាតិ និងមានទីតាំងជិតជាងទឹកជ្រោះប៊ូស្រាដ៏ពេញនិយមសម្រាប់ភ្ញៀវធ្វើដំណើរពីក្រុងសែនមនោរម្យ។
ជាអកុសល អូរអង្កាលមិនសូវមានអ្នកស្គាល់ និងមិនមានភាពទាក់ទាញភ្ញៀវទេសចរ ដែលធ្វើដំណើរឆ្លងកាត់ទៅកាន់រមណីយដ្ឋានទឹកធ្លាក់ប៊ូស្រាដ៏ល្បីល្បាញឡើយ។
បើទោះបីជាអូរអង្កាល ស្ថិតនៅចម្ងាយប្រមាណតែ ១០០ ម៉ែត្រពីផ្លូវទៅកាន់ទឹកធ្លាក់ប៊ូស្រាដែលភ្ញៀវចុះពីរថយន្ដដើរតែមួយភ្លែត និងមិនឆ្ងាយប៉ុន្មានពីរមណីយដ្ឋានអូរផ្លាយយ៉ាងណាក៏ដោយ ក៏ទីទឹកធ្លាក់នេះហាក់គ្មានភ្ញៀវមកអើតទាល់តែសោះ។
លោក អៀង ស៊ីធុល អាយុ ៤៦ ឆ្នាំ ជាអ្នកគ្រប់គ្រងនៅរមណីយដ្ឋានធម្មជាតិអូរផ្លាយ និងជាអ្នករស់នៅក្បែរទឹកធ្លាក់អូរអង្កាល បានប្រាប់ថា៖ «មិនមានអ្នកដំណើរបានដឹងថា ទីនេះមានទឹកធ្លាក់ស្រស់ស្អាត មិនចាញ់ទឹកជ្រោះប៊ូស្រានោះទេ។ មានតែអ្នករស់នៅម្ដុំនេះទេដែលមកអើត ឈ្ងោកលេងមួយភ្លែតៗប៉ុណ្ណោះ»។
លោក ជាង រ៉ា អាយុ ៥៤ ឆ្នាំ ដែលផ្ទះកូនស្រីរបស់លោកលក់ចាប់ហួយ និងគ្រឿងក្លែមយីហោ ម៉ាក់ ម៉េងហេង ស្ថិតនៅទីតាំងច្រកចូលបរិវេណទឹកធ្លាក់ បាននិយាយថា៖ «ភាគច្រើន មានតែបងប្អូនជនជាតិភាគតិចមកលេងទីនេះ។ ទេសចរ គេមិនដឹងទេ ពីព្រោះអត់មានស្លាកសញ្ញាសម្គាល់ និងផ្លូវចេញចូល។ ផ្លូវដីដែលដើរទៅដល់ទឹកធ្លាក់ជាសម្បត្ដិកម្មសិទ្ធិឯកជន»។
លោកបន្ដថា លោកមានបំណងសង់ក្យូសលម្ហែមួយក្បែរទឹកធ្លាក់ តែលោកបារម្ភពីកម្ពស់ទឹកកើនឡើងយ៉ាងឆាប់រហ័ស ពេលមានភ្លៀងធ្លាក់ខ្លាំងម្ដង។ ប៉ុន្ដែពេលរដូវប្រាំង មានទឹកហូរតិចៗ និងមានកម្ពស់ខ្ពស់ជាង ១០ ម៉ែត្រ។
ទាក់ទងនឹងការអភិវឌ្ឍទឹកធ្លាក់អូរអង្កាលជារមណីយដ្ឋានទាក់ចិត្ដភ្ញៀវ ដែលធ្វើដំណើរហួសទៅលេងទឹកធ្លាក់ប៊ូស្រានោះ លោក ងិន សុវិមាន ប្រធានមន្ទីរទេសចរណ៍ខេត្ដមណ្ឌលគិរី បានប្រាប់ភ្នំពេញ ប៉ុស្ដិ៍ ថា៖ «យើងមិនមែនចាំតែទឹកធ្លាក់មួយកន្លែងនេះទេ។ កន្លែងណាក៏យើងអភិវឌ្ឍដែរ ប៉ុន្ដែយើងមិនទាន់រៀបចំអស់ ហើយយើងត្រូវការប្រាក់។ យើងត្រូវការអ្នកវិនិយោគដើម្បីសហការគ្នាអភិវឌ្ឍតំបន់ទេសចរណ៍»។
លោកបានឲ្យដឹងទៀតថា៖ «យើងសាទរ និងស្វាគមន៍ បើមានអ្នកនិយោគលើវិស័យទេសចរណ៍ មិនថាតែរមណីយដ្ឋាននោះទេ ប៉ុន្ដែថែមទាំងផ្ទះសំណាក់ សណ្ឋាគារ និងភ្នាក់ងារទេសចរណ៍»។
ប្រធានមន្ទីរទេសចរណ៍ខេត្តមណ្ឌលគិរីក៏បានទទួលស្គាល់ពីសក្តានុពលទឹកធ្លាក់មួយនេះថា អូរអង្កាល នៅក្បែរផ្លូវនេះនឹងផ្ដល់ភាពងាយស្រួលដល់ភ្ញៀវមកកម្សាន្ដ៕