ក្រុងសែនមនោរម្យ: សម្រស់ធម្មជាតិនៃសមុទ្រព្រៃឈើរលករលេញ បំពេញដោយរុក្ខជាតិខ្ពស់ៗដុះលើវាលស្មៅខ្ពង់រាបបៃតងខ្ចី អមដោយវិថីពត់ពេនបន្លាយវែងអន្លាយផុតកន្ទុយភ្នែក ជាទេសភាពដ៏ត្រជាក់ភ្នែកនារដូវវស្សាដែលភ្ញៀវទេសចរមកពីទីណាៗខំស្កាត់ទៅលេងទឹកដីខេត្តមណ្ឌលគិរី។
រដូវវស្សាមិនត្រឹមតែលើកសោភ័ណធម្មជាតិឲ្យស្រស់បំព្រងប៉ុណ្ណោះទេ ប៉ុន្ដែខែសម្បូរភ្លៀងថែមទាំងជាវេលាដំណាំហូបផ្លែហុចផលដ៏សម្បូរបែប រាប់ទាំង ទុរេន ក្រូចវល្លិ (ផ្លែផាសិន) មង្ឃុត សាវម៉ាវ និងផ្លែប៊័រជាដើម។
យ៉ាងណា ទោះស្ថិតក្នុងអំឡុងរដូវផ្លែឈើខ្មែរហុចផលក៏ដោយ ក៏ភ្ញៀវទេសចរទាំងជាតិ និងអន្ដរជាតិរមែងប្រយ័ត្នប្រយែងចំពោះការជ្រើសរើសទិញផ្លែឈើ ដែលមួយចំនួនធំត្រូវបាននាំចូលពីប្រទេសជិតខាង។
ក្នុងចំណោមផលាទាំងនោះ ប៊័រមណ្ឌលគិរី ដែលស្ទើរតែក្លាយជាផ្លែឈើតំណាងខេត្ដមណ្ឌលគិរី បានធ្វើឲ្យអ្នកភ្នំពេញភាគច្រើនប្រាថ្នាចង់ភ្លក្សរសជាតិផលិតផលសុទ្ធពីចម្ការឯទឹកដីនៃភាគឦសាន។
ជាមួយបទពិសោធបេះផ្លែប៊័រផ្ទាល់ដៃនៅឯចម្ការចម្ងាយប្រមាណ ១០ គីឡូម៉ែត្រ ពីរូបសំណាកគោព្រៃតំណាងខេត្ដមណ្ឌលគិរី លោក ពីរ ណារ៉ា ជាអ្នកដំណើរម្នាក់បានប្រាប់ថា លោកពិតជារំភើបចិត្ដ ដែលមានឱកាសមកបេះផ្លែប៊័រដល់ចម្ការ និងឃើញទេសភាពដ៏ស្រស់ត្រកាលនៃខេត្ដមណ្ឌលគិរីនារដូវវស្សា។
លោកបន្ដទាំងញញឹមញញែមថា៖ «ខ្ញុំគិតថា ភ្ញៀវទេសចរក៏ប្រាកដជាមានអារម្មណ៍ដូចខ្ញុំដែរ ពេលបានមកដល់ចម្ការដំណាំបែបនេះ»។
ស្ថិតនៅភូមិពូត្រំ សង្កាត់រម្យនា ក្រុងសែនមនោរម្យ ចម្ការប៊័ររបស់លោក តុង ហេង លើផ្ទៃដី ៧ ហិកតា ចាប់ផ្ដើមប្រមូលផលពីខែកក្កដា រហូតដល់ ខែកញ្ញា ឬតុលា ដោយមួយដើមៗអាចចេញផ្លែបានជិត ២០០ គីឡូក្រាមឯណោះ។
ផ្ទៃដីដែលមានដំណាំរួមផ្សំ ទុរេន ស្វាយ ចេក និងក្រូចវល្លិ លោក យ៉ា ជាអ្នកគ្រប់គ្រងចម្ការ តុង ហេង បាននិយាយបណ្ដើរ ខណៈដៃកំពុងតម្រង់តម្ពក់ និងភ្នែករំពៃរកមើលផ្លែប៊័រចាស់ៗបណ្ដើរថា៖ «ផ្លែប៊័រដើមដៃ អាចហុចផលម្ដងជិត ១០០ គីឡូក្រាម ហើយបន្ទាប់មកធ្លាក់ត្រឹម ៣០ មក ១០ គីឡូក្រាមរហូតផុតរដូវ»។
យោងតាមអ្នកគ្រប់គ្រងចម្ការរូបនេះ ផ្លែប៊័រដើមដៃមានតម្លៃជាង ១ ម៉ឺនរៀលក្នុង ១ គីឡូក្រាម រហូតដល់រដូវសម្បូរខ្លាំងពីដើមខែសីហា ដល់អស់ តម្លៃធ្លាក់មកត្រឹម ៦០០០ រៀល។
ចាប់ពីខែតុលា ប៊័រចាប់ផ្ដើមអស់ផ្លែ ស្របវេលាធម្មជាតិបៃតងប្រែពណ៌បន្ដិចម្ដងៗ រហូតដល់រំលេចសម្រស់មួយបែបទៀតនៃទេសភាពពណ៌មាសគ្របដណ្ដប់ទឹកដីមណ្ឌលគិរី។
ទោះរដូវផ្លែប៊័រកន្លងហួស ហើយភ្ញៀវទេសចរពិបាករកទិញផ្លែប៊័រក្នុងស្រុក ដោយសម្បូរតែផ្លែប៊័របរទេសយ៉ាងណាក៏ដោយ ក៏បច្ចុប្បន្នទឹកដីមណ្ឌលគិរី អាចផ្គត់ផ្គង់ផ្លែប៊័រខុសរដូវ សម្រាប់ភ្ញៀវទេសចរទទួលទានផ្លែឈើពីចម្ការខ្មែរស្ទើរតែពេញ ១ ឆ្នាំដែរ។
អ្នកស្រី សុភក្ដ្រ អ្នកលក់ផ្លែប៊័រ និងជាមន្ត្រីមន្ទីរទេសចរណ៍ ខេត្ដមណ្ឌលគិរី បានបញ្ជាក់ថា៖ «ពេលនេះ ប៊័រខុសរដូវមណ្ឌលគិរី អាចហុចផលពីខែវិច្ឆិកា ដល់ខែមេសា ជាមួយតម្លៃខ្ពស់រហូតដល់ជាង ១ ម៉ឺនរៀល»។
ដំណាំហូបផ្លែប្រចាំខេត្ដមណ្ឌលគិរី ក៏ជាចលករទាក់ទាញភ្ញៀវទេសចរមកកម្សាន្ដលេង និងភ្លក្សរសជាតិផ្លែឈើដល់ចម្ការផងដែរ ក្រៅពីសម្រស់ទេសភាពវាលភ្នំ សមុទ្រព្រៃឈើ ទឹកជ្រោះ និងអំណោយអាកាសធាតុត្រជាក់ស្រួលពីធម្មជាតិ។
លោក ងិន សុវិមាន ប្រធានមន្ទីរទេសចរណ៍ខេត្ដមណ្ឌលគិរី បាននិយាយថា៖ «ត្រឹមត្រូវណាស់ ភ្ញៀវទេសចរក៏មានបំណងសំដៅចង់ភ្លក្សរសជាតិផ្លែឈើ ដូចជា ប៊័រ ក្រូចវល្លិ របស់អ្នកមណ្ឌលគិរីផងដែរ បន្ទាប់ពីទស្សនាសម្រស់ធម្មជាតិព្រៃភ្នំ និងទឹកធ្លាក់»៕