The Phnom Penh Post Search

Search form




Logo of Phnom Penh Post newspaper Phnom Penh Post - ភូមិនារី​កវែង​ ទាក់​ចិត្ដ​ភ្ញៀវ​ថតរូប និង​ទិញ​វត្ថុ​អនុស្សាវរីយ៍




ភូមិនារី​កវែង​ ទាក់​ចិត្ដ​ភ្ញៀវ​ថតរូប និង​ទិញ​វត្ថុ​អនុស្សាវរីយ៍

Content image - Phnom Penh Post
ភ្ញៀវ​ទេសចរ​​ទិញ​វត្ថុអនុស្សាវរីយ៍​ពីនារី​កវែង ជាការ​រួម​ចំណែក​នាំចំណូល​ដល់​ពួកគេ​​។ ហុង រស្មី

ភូមិនារី​កវែង​ ទាក់​ចិត្ដ​ភ្ញៀវ​ថតរូប និង​ទិញ​វត្ថុ​អនុស្សាវរីយ៍

ក្រុងម៉េហុងសន: ភ្ញៀវទេសចរ​ដែល​ធ្វើ​ដំណើរ​ទៅ​កាន់​ស្រុក​ប៉ៃ ខេត្ដ​ម៉េហុងសន ប្រទេស​ថៃ​មិន​ភ្លេច​ឆៀង​ចូល​ទទួល​យក​បទពិសោធ​ប្លែក​នៃ​ជីវិត​តាមរយៈ​ការទស្សនា​ភូមិ​នារី​កវែង។ ភ្ញៀវ​នាំគ្នា​មក​ថតរូប​ជាមួយ​នារី​កវែង​ដូច​សត្វ​ជីរ៉ាហ្វ មុនពេល​បន្ដ​ដំណើរ​ទៅ​កាន់​គោលដៅ​ផ្សេងៗ​ទៀត។

នារី​កវែង ឬ​ការ៉េន ជាអម្បូរ​កុលសម្ព័ន្ធ​ដែល​មាន​ប្រវត្ដិ​រស់នៅ​តាម​តំបន់​ព្រៃភ្នំ​នៃ​ប្រទេស​មីយ៉ាន់ម៉ា ក្បែរ​ព្រំដែន​ប្រទេស​ថៃ។ ដោយ​ត្រូវបាន​ស្គាល់​ត្រង់​កវែង​នារី​ការ៉េន​បាន​ពាក់​កង​ធ្ងន់ៗ​នៅ​លើ ក កំភួនដៃ និង​ឆ្អឹងស្មង។

ខណៈ​បុរស​ការ៉េន​មាន​ភារកិច្ច​រក​ចំណូល​ប្រចាំ​គ្រួសារ​ដូចជា​កម្មករ និង​កសិករ នារីៗ​មាន​មុខរបរ​ដូនតា​ចំពោះ​ការងារ​តម្បាញ និង​ចម្លាក់​ឈើ។

ជាទូទៅ​កុលសម្ព័ន្ធ​កវែង រស់នៅ​ក្នុង​ស្ថានភាព​លំបាក​លំបិន នឿយ​ហត់ និង​សាមញ្ញ​បំផុត។ ប៉ុន្ដែ​ផ្លែផ្កា​ពីការងារ​របស់​ពួកគេ​ពិតជា​ល្អ។

ប៉ុន្ដែ​យ៉ាងណា​មិញ នៅ​ប្រទេស​ថៃ ពួកគេ​អាច​ថែរក្សា​វប្បធម៌​ប្រពៃណី​ដូនតា។

លោក Ajui មគ្គុទ្ទេសក៍​ទេសចរណ៍​ប្រចាំ​ខេត្ដ​ ឈៀងម៉ៃ​ បាន​និយាយ​ថា៖ «រដ្ឋាភិបាល​របស់​យើង​ព្យាយាម​ចាប់​ខ្លួន និង​បញ្ជូន​ពួកគេ​ទៅកាន់​ស្រុក​កំណើត​វិញ [ប្រទេស​មីយ៉ាន់ម៉ា]។ ប៉ុន្ដែ​យើង​បែរជា​បង្កើត​កំហុស​ធំ​ទៅវិញ ពីព្រោះ​ពួកគេ​បាន​កៀរគរ​គ្នា​កាន់តែ​ច្រើន​មក​ទីនេះ​ដោយសារ​តែ​ពួកគេ​ស្គាល់ផ្លូវ​ស្រាប់»។

Content image - Phnom Penh Post
មុខរបរ​ពីដូនតាគឺ​ការងារ​តម្បាញ និង​ចម្លាក់​ឈើ។ ហុង រស្មី

លោក​បាន​បន្ដថា៖ «ចុងក្រោយ​ព្រះមហាក្សត្រ​បាន​ព្រះរាជា​នុញ្ញាត​ឲ្យ​ពួកគេ​រស់នៅ​ប្រទេស​ថៃ​តែ ៣ ខេត្ដ ប៉ុណ្ណោះ​ដូចជា​ឈៀង​ម៉ៃ ឈៀង​រ៉ៃ និង ​ម៉េហុងសន។ ពួកគេ​រស់នៅ​រាយប៉ាយ​នៅ​តាម​បណ្ដា​ខេត្ដ​ទាំង​នេះ»។

ខណៈ​នារី​ការ៉េន​មាន​កវែង ប្រពៃណី​ពាក់​កងក​នេះ​បាន​ធ្វើ​ឲ្យឆ្អឹង​ស្មា​ធ្លាក់​ដែល​មើល​ទៅ​បង្ហាញ​ឲ្យឃើញ​ពីទម្រង់​ ក វែង ហើយ​កង​ទាំងនេះ​ផលិត​ឡើង​ពីដែក​រឹងធ្ងន់​ពណ៌​មាស​រំលេច​នូវ​សភាព​ភ្លឺរ​លោង។ រៀង​រាល់ពេល​ស្ដ្រី​ការ៉េន​បន្ថែម​កង​លើ ក របស់​ពួកគេ​ដោយ​ផ្ដើម​តាំងពី​អាយុ ៤ ឬ ៥ ឆ្នាំ នាង​ត្រូវបាន​បំពាក់​កង​សណ្ឋាន​ជា​រង្វង់​រ៉ឺស័រ ដែល​មាន​ចំនួន​ប្រមាណ ២៥ កង។

ក្រោយពី​រូបថត​សែលហ្វី​ជាមួយ​ស្ដ្រី​កវែង​ក្នុង​ភូមិ​នារី​កវែង​រួចរាល់ ភ្ញៀវទេសចរ ​មិន​ភ្លេច​ជួយ​ទិញ​វត្ថុ​អនុស្សាវរីយ៍​ជា​ស្នាដៃ​សិប្បកម្ម​របស់​ពួកគេ​ផ្ទាល់ ដែល​ជាចំណូល​មួយ​ផ្នែក​សម្រាប់​ផ្គត់ផ្គង់​ការរស់នៅ​របស់​កុលសម្ព័ន្ធ​ភៀស​ខ្លួន ទាំង​នេះ​ឡើយ៕

Content image - Phnom Penh Post
ភ្ញៀវទេសចរ​ថត​រូប​ជាមួយ​នារី​កវែង​នៅ​ភូមិ​នារីក​វែង។ ហុង រស្មី

អត្ថបទគួរចាប់អារម្មណ៍