The Phnom Penh Post Search

Search form

Logo of Phnom Penh Post newspaper Phnom Penh Post - ភូមិ​បៃតង ឋាន​សួគ៌​ប្រណីត​អម​ទេសភាព​ជនបទ​




ភូមិ​បៃតង ឋាន​សួគ៌​ប្រណីត​អម​ទេសភាព​ជនបទ​

Content image - Phnom Penh Post
អាង​ហែល​ទឹក​ដ៏ធំ​ ដែល​ភ្ញៀវ​អាច​គេង​គយគន់​ទេសភាព​បែប​ជនបទ និង​ថ្ងៃ​លិច។ ឈឹម ស្រីនាង

ភូមិ​បៃតង ឋាន​សួគ៌​ប្រណីត​អម​ទេសភាព​ជនបទ​

ភ្នំពេញ: ដើម​ត្នោត​ដុះរាយ ពេញវាល​ស្រែ​បៃតងស្រស់ ចម្ការ​ដំណាំ​ និង​ផ្ទះ​ឈើ​ប្រក​ក្បឿង ជា​ទេសភាព​ភូមិ​ឋានខ្មែរ ប៉ុន្តែ​អ្វី​ដែល​ប្លែក​ភ្នែក​នោះ គឺ​វត្តមាន​អ្នក​ទេសចរ​ស្លៀក​ឈុត​ហែលទឹក​គេង​សំដិល​លើគ្រែ​ក្រោម​ឆត្រ​ក្បែរ​អាង​ហែលទឹក​តូចធំ​ ហាក់បី​ដូចជា​ឋានសួគ៌​ផុសកណ្ដាល​ទី​ជនបទ។

នេះ​ជា​រីហ្សត ភូមិ​បៃតង ដែល​ស្ថិតនៅ​ភូមិ​ស្វាយដង្គុំ សង្កាត់​ស្វាយ​ដង្គុំ។ ទើបបើក​ដំណើរ​ការ​កាលពី​ខែកញ្ញា​ឆ្នាំ ២០១៥ រីហ្សត​លំដាប់​ខ្ពស់នេះ​ត្រូវបាន​បង្កើត​ឡើង​ដោយ​ជនជាតិ​បារាំង​លោក អារណូដ ហ្សង់នីយែរ (Arnaud Zannier) ដែល​មានចិត្ត​ស្រឡាញ់​ផ្ទះ​បែប​ខ្មែរ​សង់តាម​វាលស្រែ។

ផ្ទះ​ខ្មែរចាស់ៗ​ជាច្រើន​បាន​រំលេច​ខ្លួន​ក្នុងភូមិ​ដ៏ធំទូលាយ ស្ងប់ស្ងាត់ មាន​ខ្យល់អាកាស​បរិសុទ្ធ ក្រអូប​ក្លិនស្រូវ និង​ស្លឹកគ្រៃ ដែល​ម្ចាស់រីហ្សត​ចង់នាំ​មកនូវ​បរិយាកាស​នៃ​ភូមិ​ខ្មែរ​ពិតៗ​កាលពី​ជំនាន់​មុន​ទៅឲ្យ​ភ្ញៀវ​ទេសចរ​មកស្នាក់​នៅ​លេង​កម្សាន្ត។

Content image - Phnom Penh Post
ផ្ទះ​បែប​ខ្មែរ​ដែល​មាន​ការ​រចនា​យ៉ាង​ទំនើប មាន​អាង​ទឹក​ឯកជន​ផ្ទាល់ខ្លួន​។ ឈឹម ស្រីនាង

ស្ថាបនិក​ជនជាតិ​បារាំង​រូបនេះ​បាន​ថ្លែងថា៖ «យើង​សាង​សង់​ភូមិ​បៃ​តង​នេះ​ឡើង គឺចង់​ឲ្យ​ភ្ញៀវ​ដែល​មកលេង​នៅ​ខេត្ត​សៀមរាប​នេះ ក្រៅពី​ទស្សនា​ប្រាសាទហើយ គឺ​បាន​យល់ដឹង​បន្ថែម​ពី​ជីវភាព​រស់នៅ​បែប​ខ្មែរ ជាមួយ​បរិយាកាស​ស្រស់​ស្រាយ​ក្នុង​ភូមិ​ មានទាំង​ការដាំដុះ​ស្រូវ ដាំដំណាំ​តាមបែប​បុរាណ​គ្មានជាតិ​គីមី ស្គាល់​ច្បាស់​ពីផ្ទះ​ស្នាក់​មានការ​រចនា​ម៉ូដរបៀបខ្មែរ ដែល​សព្វ​ថ្ងៃនេះ​មិនសូវ​ជា​មាន​ប៉ុន្មាន​ទេ»។

ដើម្បី​ឲ្យភ្ញៀវ​កាន់​តែមាន​អារម្មណ៍​យល់​ច្បាស់ពី​ជីវភាព​តាម​ស្រុកស្រែ​ក្នុងភូមិ​បៃតងនេះ លោកនឹង​បន្ថែមគោ​ពីរ​បី​ក្បាលដាក់​ភ្ជួរ​​ស្រែ​ឲ្យភ្ញៀវ​មើល ដោយ​មាន​ទាំងការ​ពន្យល់ពីរបៀប​សាប​ព្រោះ​ដកស្ទូង ហើយ​ភ្ញៀវ​ក៏អាច​សាកល្បង​ធ្វើស្រែ​ជាមួយ​អ្នកស្រុក​នៅ​ក្នុងភូមិ​បៃតង​ផងដែរ។

លោក អារណូដ និយាយ​ថា៖ «នៅ​រដូវ​ច្រូតកាត់ យើង​បានឲ្យ​គាត់ច្រូត​ជាមួយ​និង​ក្រុម​ការងារ ហើយ​គាត់​អាចយក​ស្រូវទាំង​នោះ​ត្រលប់​ទៅ​ផ្ទះវិញ​ទុកជា​អនុស្សារីយ៍»។

Content image - Phnom Penh Post
ការ​រចនា​នៅ​ក្នុង​បន្ទប់ ទាំង​គ្រឿង​សង្ហារិម និង​បរិក្ខា​រមាន​ស្ដង់ដារ​លំដាប់​ផ្កាយ ៥​។ ឈឹម ស្រីនាង

ក្នុង​ចំណោម​ផ្ទះ ៤៥ ខ្នង ២៥ ខ្នង​មាន​សួនច្បារ​ឯកជន​នៅ​ខាង​មុខ​សម្រាប់​ភ្ញៀវ​លម្ហែ​កាយ គេង​ហាលថ្ងៃ និង​អង្គុយមើល​ព្រះអាទិត្យ​អស្ដង្គត រីឯ ២០ ខ្នងទៀត​មាន​អាងហែល​ទឹករៀងៗ​ខ្លួន។​

ម្ចាស់ រី​ហ្សត ​ដ៏រួសរាយ​រូបនេះ​បាន​រៀបរាប់ថា៖ «ផ្ទះ​ទាំងអស់​នោះ​គឺ​យើង​រចនា​ឡើង​ផ្នែក​ខាងក្រៅ និង​ដំបូល​តាម​ក្បាច់ ម៉ូដ​បែប​ខ្មែរ ក៏ប៉ុន្តែ​នៅ​ខាងក្នុង​បន្ទប់​គេង និង​បន្ទប់ទឹក​គឺ​យើង​បំពាក់​ដោយ​បរិក្ខារទំនើប​ទាន់​សម័យ​ស្តង់ដារ​សណ្ឋាគារ​លំដាប់​ខ្ពស់​ផ្តាយ ៥ នៅលើ​ពិភពលោក ដូចជា​​ទូរស័ព្ទ​បំពាក់​ក្នុង​បន្ទប់គេង​គឺ​យើង​ប្រើស៊េរី​ទំនើប​បំផុត​ដែល​គេប្រើ​នៅក្នុង​សណ្ឋាគារ​ទីក្រុង​ឌូបៃ ហើយ​ក៏យើង​តុបតែង​លាយ​ជាមួយតុ កៅអី​ចាស់ៗ​ខ្លះ​របស់​ខ្មែរ​ផងដែរ»។

ក្រៅពី​មាន​អាងទឹក​រួមខ្នាតធំ​ អាច​ងូត​ទឹក គេង​សំដិល​មើលសូរិយា​ ភូមិបៃតង​ក៏មាន​កន្លែង​បម្រើ​អាហារ​ខ្មែរ​គឺ​ភោជនីយដ្ឋាន «បាយ​ផ្សារ» និង «ហាង​បាយ» ដែល​ចម្អិនម្ហូប​ដោយ​ប្រើប្រាស់​បន្លែ​បង្ការដាំ​តាម​ធម្មជាតិ​។

សេវាកម្ម​ម៉ាស្សា និងស្ប៉ា​មាន​ស្នាដៃអ្នក​ជំនាញខ្មែរ​ រួមទាំង​ការម៉ាស្សា​ដោយ​បង្ហូរ​ប្រេងតាម​បែបឥណ្ឌា។

បន្ទាប់ពី​ទទួល​ភ្ញៀវ​លក្ខណៈ​គ្រួសារ មិត្តភ័ក្តិ​ និង​គូស្នេហ៍​ក្រេបទឹក​ឃ្មុំ លោក អារណូដ នៅ​តែបន្ត​ព្យាយាម​ទាក់ទាញ​ភ្ញៀវ​ខ្មែរបន្ថែម ដោយ​លោក​លើក​ឡើងថា៖ «យើងចង់​បាន​ភ្ញៀវ​ខ្មែរគាត់​មកស្នាក់នៅ​ឲ្យបានច្រើន​ជាប្រចាំ​ដោយសារ​កន្លែង​យើងឲ្យ​តម្លៃខ្ពស់​ទៅលើ​ភ្ញៀវ​ក្នុងស្រុក​ខ្លាំង​ជាង​បរទេស ជាពិសេស​បុគ្គលិក​មាន​ការអប់រំ​សិក្សាពី​របៀប​ស្វាគមន៍​ភ្ញៀវ​បាន​ត្រឹមត្រូវ​ អ៊ីចឹងហើយ​ខាងយើង​គឺចាំ​ទទួល​ស្វាគមន៍​ភ្ញៀវ​ខ្មែរ​ដែលចង់​មក​ស្នាក់​នៅ​នេះ​ជានិច្ច»៕

អត្ថបទគួរចាប់អារម្មណ៍