The Phnom Penh Post Search

Search form




Logo of Phnom Penh Post newspaper Phnom Penh Post - ភូមិ​រូប​គំនូរ​ជីវចល​នៅ​តៃវ៉ាន់​ទាក់​ទាញ​ភ្ញៀវ​ទេសចរ​​ច្រើន

ភូមិ​រូប​គំនូរ​ជីវចល​នៅ​តៃវ៉ាន់​ទាក់​ទាញ​ភ្ញៀវ​ទេសចរ​​ច្រើន

គំនូរ​ទេព​មច្ឆា​លើ​ជញ្ជាំង​ផ្ទះ​អ្នក​ភូមិ​ហ៊ុយ​ជៀ​​​។
គំនូរ​ទេព​មច្ឆា​លើ​ជញ្ជាំង​ផ្ទះ​អ្នក​ភូមិ​ហ៊ុយ​ជៀ​​​។ រូបថត AFP

ភូមិ​រូប​គំនូរ​ជីវចល​នៅ​តៃវ៉ាន់​ទាក់​ទាញ​ភ្ញៀវ​ទេសចរ​​ច្រើន

កោះតៃវ៉ាន់: ស្ថិត​នៅ​ក្នុង​ភូមិ​ហ៊ុយជៀ​ភាគ​ខាង​ត្បូង​កោះ​តៃវ៉ាន់ ផ្ទះ​សម្បែង​នីមួយៗ​រំលេច​រូបភាព​គំនូរ​ជីវចល​នានា​ដ៏​ស្រស់​ស្អាត​លើ​ផ្ទៃ​ជញ្ជាំង​។

គួរ​បញ្ជាក់​ថា ផ្ទះ​សម្បែង​ក្នុង​ភូមិ​ហ៊ុយជៀ បាន​ឡើង​ថ្លៃ​​ខ្ពស់​ និង​បាន​ទាក់​ទាញ​ភ្ញៀវ​ទេសចរ​ជា​ច្រើន​ តាំង​ពី​ភូមិ​មួយ​​នេះ​បាន​ប្រែ​ក្លាយ​មុខ​មាត់​ថ្មី​កាល​ពី​ ១​ ឆ្នាំ​កន្លង​ទៅ​​។

បើ​យោងតាម​មន្ដ្រី​មូលដ្ឋាន បាន​​ឲ្យ​ដឹង​ថា ការ​រចនា​រូប​គំនូរ​ជីវចល​ក្នុង​ភូមិ​បាន​ផ្ដើម​ពី​បង​ប្អូន​​ស្រី ​៣​ នាក់​ដែល​បាន​គូរ​រូប​ខណៈ​ទៅ​សួរ​សុខ​ទុក្ខ​ជីដូន​ក្នុង​ខែ​ មេសា ឆ្នាំ​២០១៤​។ ដោយ​មាន​អារម្មណ៍​ធុញ​ថប់ និង​ចង់​ផ្ដល់​ការ​កម្សាន្ដ​ដល់​ជីដូន​ នារី​ទាំង​​នោះ​បាន​គូរ​រូប​ភាព​លើ​ផ្ទៃ​ជញ្ជាំង​ខាង​ក្រៅ​ផ្ទះ​ជាមួយ​នឹង​តួ​អង្គ​​គំនូរ​ជីវចល​ និង​តុក្កតា​ដារូម៉ា ជា​តួ​អង្គ​នាំ​សំណាង​របស់​ជប៉ុនជាដើម​​។

នៅ​លើ​បង្អួច​មួយ​ ចៅស្រី​ទាំង​៣​នាក់​ បាន​គូរ​រំលេច​ពាក្យ​ពេចន៍​ថា៖ «​នេះ​ជា​កន្លែង​ដែល​ជីដូន​រស់​នៅ​»។

អ្នក​ជិត​ខាង​ម្នាក់ ដែល​មាន​ឈ្មោះ​ថា អ្នកស្រី លាវ​ បាន​និយាយ​ថា​៖ «​មនុស្ស​នៅ​ក្នុង​សហគមន៍​នេះ​ចាប់​ផ្ដើម​ចម្លង​តាម​គំនិត​របស់​​បងប្អូន​ស្រី​ទាំង​៣​នោះ​ និង​​គូរ​ផ្ទះ​របស់​ពួកគេ​រៀង​ៗ​ខ្លួន​»។

បច្ចុប្បន្ន ក្នុង​សហគមន៍​ទាំង​មូល​គឺជា​តំបន់​ពោរ​ពេញ​ដោយ​រូបភាព​គំនូរ​ជីវចល​រាប់​សិប​រូប​លើ​ជញ្ជាំង​ ហើយ​គំនូរ​ថ្មី​ៗ​ចាប់​ផ្ដើម​រំលេច​ខ្លួន​ជា​បន្ដ​បន្ទាប់​។ វិចិត្រករ (​អ្នក​ភូមិ​) រមែង​ជាប់​ដៃ​ជាមួយ​នឹង​ជក់ និង​ទឹក​ថ្នាំ​លាប​ពណ៌​ជានិច្ច​។

អ្នកស្រី លាវ បាន​និយាយ​ថា៖ «​កុមារ​ក៏​គូរ ហើយ​សាលា​សិល្បៈ​ខ្លះ​មក​ផ្ដល់​សេវាកម្ម​របស់​ខ្លួន​ ឬ​អ្នក​ភូមិ​នឹង​ជួល​អ្នក​ជំនាញ​មក​គូរ​លើ​ជញ្ជាំង​ឥដ្ឋ​របស់​ពួក​គេ​។ ពេល​នេះ យើង​ទទួល​ស្វាគមន៍​ភ្ញៀវ​ទេសចរ​ជា​ច្រើន​ ដែល​ភាគ​ច្រើន​ពួក​គេ​មក​ពី​ក្រុង​ហុងកុង និង​ចិន​ដី​គោក​តែ​ម្ដង»។

នៅ​ក្បែរ​អារាម​ក្នុង​ទីក្រុង​ ម្ចាស់​ហាង​មួយ​ឈ្មោះ ស៊ូ ឃីង​មីន ​​និយាយ​ថា ជំនួញ​របស់​លោ​ក​បាន​រីក​ចម្រើនជា​លំដាប់​។ លោក​បាន​ឲ្យ​ដឹង​ថា​៖ «​កាល​ពី​មុន ​នៅ​ទីនេះ​សម្បូរ​មនុស្ស​តែ​ពេល​បុណ្យ​ទាន​​ ដែល​រៀបចំ​ឡើង​ត្រឹម​តែ​៣​ដង​ប៉ុណ្ណោះ​ក្នុង​មួយ​ឆ្នាំ​។ ប៉ុន្ដែ​ឥឡូវ​នេះ​កន្លែង​យើង​មាន​មនុស្ស​មក​កម្សាន្ត​អ៊ូអរ​រាល់​ថ្ងៃ​តែ​ម្ដង»៕ HR

អត្ថបទគួរចាប់អារម្មណ៍