.jpg)
ក្យូសឈើប្រក់ស្បូវសរុបទាំងអស់ចំនួន ១៤ សង់ជុំវិញមាត់ស្រះដែលមានត្រីប្រមាណ ១ តោន សម្រាប់ភ្ញៀវស្ទូចលេងកម្សាន្ត។ រូបថត យូសុះ អាប់ឌុលរ៉ាស់ហ៊ីម
ភ្នំពេញ: អ្នកដែលមាននូវភាពតានតឹងធុញថប់ពីការងារ ឬការសិក្សា និងអ្នកចង់ស្វែងរកកន្លែងសម្រាក លម្ហែអារម្មណ៍ ដោយមិនចាំបាច់ជិះរាប់ម៉ោងទៅកាន់ទីកន្លែងឆ្ងាយៗអាចមកកម្សាន្តនៅភោជនីយដ្ឋានបែបធម្មជាតិ ម្អមស្រែទើបនឹងបើកថ្មីនៅម្ដុំផ្លូវឧកញ៉ាទ្រីហេង ភូមិច្រេស សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ដោយធ្វើដំណើរតាមបណ្តោយផ្លូវឧកញ៉ាទ្រីហេង ផុតផ្សារបឹងបៃតងប្រមាណជាង ៩០០ ម៉ែត្ររួចបត់ស្តាំប្រមាណ ៤០០ ម៉ែត្រភោជនីយដ្ឋាន ម្អមស្រែ ស្ថិតខាងឆ្វេងដៃដែលមានទំហំផ្ទៃដីជិត ១ ហិកតា។
ភោជនីយដ្ឋាននេះមានក្យូសឈើប្រក់ដំបូលស្បូវសម្រាប់អង្គុយលម្ហែសរុបចំនួន ១៤ ក្បូស។ ក្យូសធំ ១ អាចទទួលភ្ញៀវបានចំនួន ១០០ នាក់សក្ដិសមនឹងពិធីជប់លៀងគ្នាច្រើន។ ក្បូស ១ ទៀតបាន ៤០ នាក់ និងមានក្យូសតូចៗចំនួន ១២ នាក់អង្គុយបានភ្ញៀវ ១០ នាក់។ នៅតាមបង្កាន់ដៃក្បូសមានដាំដើមឈើ និងផ្កាចម្រុះពណ៌បង្កើតបានជាសម្រស់ស្អាតមួយបែបគួរជាទីត្រជាក់ភ្នែក។
ម្ហូបនៅ ម្អមស្រែ មានតម្លៃជាមធ្យម ៨ ដុល្លារ។ រូបថត យូសុះ អាប់ឌុលរ៉ាស់ហ៊ីម
មានទីតាំងអំណោយផលនៅជិតបង្កើយភោជនីយដ្ឋាន ម្អមស្រែ ម្ហូបខ្មែរបែបធម្មជាតិចាប់បើកពីម៉ោង ៩ ព្រឹករហូតដល់ម៉ោង ១២ យប់ដោយមានកន្លែងចតរថយន្តធំទូលាយ ខ្យល់អាកាសបរិសុទ្ធផ្ដល់ភាពត្រជាក់កាយដល់ភ្ញៀវមកអង្គុយនៅក្យូសប្របមាត់ស្រះ។
ផ្ទៃទឹកមានបណ្តោយ ៤០ ម៉ែត្រ និងទទឹង ៣០ ម៉ែត្រមានត្រីជាង ១ តោនហែលឆ្វែលឆ្វាត់សម្រាប់ភ្ញៀវអាចស្ទូចត្រីលេងដោយគិតតម្លៃមួយគីឡូក្រាម ១ ម៉ឺនរៀល។
ប្រសិនបើភ្ញៀវចង់ភ្លក្សរសជាតិត្រីដែលខ្លួនស្ទូចបាននៅនឹងកន្លែង ភោជនីយដ្ឋានគិតតម្លៃ ១ ម៉ឺនរៀលក្នុងមួយគីឡូក្រាមដូចគ្នា។ ចំណុចពិសេសមួយទៀតភ្ញៀវដែលមកកម្សាន្តក៏អាចច្រៀងបន្ធូរអារម្មណ៍នៅភោជនីយដ្ឋាន ម្អមស្រែផងដែរ។
អ្នកគ្រប់គ្រងភោជនីយដ្ឋានម្អមស្រែលោក ឈុន ឡៃ បាននិយាយ៖ «ថ្ងៃចន្ទដល់ថ្ងៃព្រហស្បតិ៍ ភ្ញៀវយើងក៏ចូលមកច្រើនដែរបង ហើយបើច្រើនជាងគេគឺសុក្រ សៅរ៍ អាទិត្យ គឺច្រើនមែនទែនមានទាំងភ្ញៀវខ្មែរ និងបរទេស តែភ្ញៀវខ្មែរមានច្រើនជាង។ ពួកគាត់ស្គាល់ផេកហ្វេសប៊ុក និងមិត្តភក្តិប្រាប់តៗគ្នា»។
ក្យូសមានដាំដើមឈើ និងផ្កាបង្កើនសោភណភាព។ រូបថត យូសុះ អាប់ឌុលរ៉ាស់ហ៊ីម
ទន្ទឹមនឹងនេះអ្នកគ្រប់គ្រងរូបសង្ហាវ័យ ២៧ ឆ្នាំរូបនេះបានបន្តថា ភោជនីយដ្ឋាន ម្អមស្រែ មានសេវាកម្មល្អរហ័ស បុគ្គលិកមានភាពរួសរាយរាក់ទាញ និងមានទេសភាពបែបធម្មជាតិ ទោះជាស្ថិតក្នុងទឹកដីក្នុងក្រុងក្តី។
ប៉ុន្តែលោកក៏ទទួលស្គាល់ផងដែរពីចំណុចខ្វះខាតមួយចំនួនដូចជា នាពេលចុងសប្តាហ៍ ការបម្រើសេវាកម្មអាចនឹងមានការយឺតយ៉ាវបន្តិច ហើយលោកនឹងព្យាយាមពង្រឹងចំណុចនេះ ដើម្បីបំពេញតម្រូវការរបស់ភ្ញៀវឲ្យបានកាន់តែល្អប្រសើរ។
ម្ហូបពិសេសប្រចាំភោជនីយដ្ឋាន ម្អមស្រែ មានដូចជាសម្រស់ម្អមស្រែតម្លៃ ១៥ ដុល្លារ ម្ជូរខួក្តាមពងត្រីមានតម្លៃ ៨ ដុល្លារ និងសាច់គោម្អមស្រែតម្លៃ ៨ ដុល្លារ។ ក្រៅពីម្ហូបពិសេសភោជនីយដ្ឋានក៏មានម្ហូបខ្មែរបែបធម្មជាតិគ្មានជាតិគីមីដូចជា សម្លកកូរ ៨ ដុល្លារ សម្លប្រហើរ ៨ ដុល្លារ សម្លម្ជូរគ្រប់ប្រភេទ និងមានម្ហូបផ្សេងៗជាច្រើនជិត ២០០ មុខ។
ភោជនីយដ្ឋាន ម្អមស្រែ មានទំព័រហ្វេសប៊ុក M''ormSrae និងលេខទំនាក់ទំនង ០៩៨ ៧៦ ៦៦ ៦២, ០៩៧ ៣១ ៥៧ ៣៣០ និង ០៩៦ ៥០ ៧៦ ៤២១៕
វីដេអូ៖
