The Phnom Penh Post Search

Search form




Logo of Phnom Penh Post newspaper Phnom Penh Post - ភ្លក្ស​ម្ហូប​ខ្មែរ និង​ស្រា​ក្រឡុក​ក្បែរ​អាង​ទឹក​លើ​អា​កាស




ភ្លក្ស​ម្ហូប​ខ្មែរ និង​ស្រា​ក្រឡុក​ក្បែរ​អាង​ទឹក​លើ​អា​កាស

Content image - Phnom Penh Post
ទិដ្ឋភាព​ Cloud9 Skybar ដ៏​ស្រស់​ត្រកាល​ដែល​មាន​បម្រើ​ស្រា​ក្រឡុក និង​ម្ហូប​ខ្មែរ​។ រូប សហការី

ភ្លក្ស​ម្ហូប​ខ្មែរ និង​ស្រា​ក្រឡុក​ក្បែរ​អាង​ទឹក​លើ​អា​កាស

ភ្នំពេញៈ សណ្ឋាគារ​ពណ៌​សធំ​ស្កឹម​ស្កៃ Sun & Moon Urban Hotel ដែល​រំលេច​ខ្លួននៅ​ចំ​កណ្តាល​ទីក្រុង​ភ្នំពេញ​ ត្រូវបាន​ការរចនា​ឡើង​ដោយ​ស្ថាប​ត្យករ​ល្បី​ Adrien Desport Architects (ADA) ជា​ក្រុមហ៊ុន​ដែល​មាន​ជំនាញ​ខ្ពស់​ក្នុង​ការសាង​សង់​សណ្ឋាគារ​ស្ដង់ដារ​ពិភព​លោក។

បន្ទាប់ពី​បើក​បាន​រយៈពេល ៦ ខែមក​ សណ្ឋាគារ​នេះ​ត្រូវបាន​គេ​ស្គាល់​ខ្លាំង​តាមរយៈ​បារ៍ Cloud9 Skybar នៅជា​ន់ទី ៩ អាច​មើល​ទេសភាព​ទីក្រុង​ភ្នំពេញ​បាន​ច្បាស់​ជាមួយ ​អាកាស​ធាតុ​ត្រជាក់​នាពេល​យប់។

ទីនោះ​រំលេច​ដោយ​ភ្លើង​ពណ៌​ចេញពី​ដំបូល​ដែល​រចនា​ឡើង​ដូចជា​ព្រះចន្ទ ទីកន្លែង​ធំ​ទូលាយ​អាចអង្គុយ​ជជែក​គ្នាកម្សាន្ត និង​ស្តាប់​តន្ត្រី​ដែល​លេង​ដោយឌីជេ។

ទន្ទឹម​នឹង​នោះ ភ្ញៀវ​អាចមក​ហែល​ទឹក​លេង​បាន​ផងដែរ។

Content image - Phnom Penh Post
ឆ្អឹង​ជំនី​រ​ជ្រូក​ចៀន​មាន​រសជាតិ​ឈ្ងុយ​ឆ្ងាញ់។ រូប សហការី

កញ្ញា នូវ មាន​សំបូរ ជំនួយ​ការ​អ្នក​គ្រប់គ្រង​សណ្ឋា​គារ នេះ​បាន​ថ្លែងថា៖ «បន្ទាប់ពី​បើក​បាន​បីបួន​ខែមក​យើង​មើល​ឃើញ​ថា ភ្ញៀវ​ភាគច្រើន​គាត់​ចូលចិត្ត​មក​អង្គុយ​កម្សាន្ត​លេង​នៅលើ Cloud9 Skybar ដោយសារ ទីនេះ​មាន​អាកាសធាតុ​ល្អ ខ្យល់​បរិសុទ្ធ អាច​អង្គុយ​ពិសា​អាហារ​ពេល​ល្ងាច​តាមបែប​ខ្មែរ និង​អឺរ៉ុប បាន ជាមួយ​ការ​ស្តាប់​តន្ត្រី ឬក៏​ងូតទឹក​កម្សាន្ត​ជាមួយ​មិត្ត​ភកិ្ត​បាន​ផង​ដែរ»។

អមជា​មួយ​ភេសជ្ជៈ​ ឬស្រា​ក្រឡុក ភ្ញៀវ​ក៏អាច​កុម្ម៉ង់​ម្ហូបខ្មែរ​ដូចជា ស្វាយ​ក្រឡុក​ បង្គា​ក្រៀម ស្លាបមាន់​បំពង មីឆា ឆ្អឹងជំនី​​រចៀន និង​ម្ហូប​ជា​ច្រើន​មុខ​ទៀត។

សម្រាប់​ការ​ហែល​ទឹកនៅ Cloud9 Skybar ភ្ញៀវ​ត្រូវបង់​ម្នាក់ ១៨ ដុល្លារ​ដោយ​បញ្ចូល​ការ​ ស្ទីម សោ​ណា និងហាត់​ប្រាណ​ពេញ​មួយថ្ងៃ។

Content image - Phnom Penh Post
ស្វាយ​ក្រឡុក​ម្ទេស​ស័ក្ដិសម​នឹង​ក្លែម​ជា​មួយ​ស្រា​។ រូប សហការី

ការ​បង់ជា​ខែ ម្នាក់​គឺតម្លៃ ៨៨ ដុល្លារ។ដោយ​ឡែក​សេវាកម្ម​ស្នាក់នៅ​ សណ្ឋាគារ​ក៏មាន​បន្ទប់​ស្អាត​ចំនួន ៨០ និង​អាផាត​មិន​ទំនើប​ប្រើ​រចនាប័ទ្ម​ពណ៌​ស ប្រផេះ​ខ្ចី និង​ទឹកក្រូច​ឆើត។

កញ្ញា​បាន​ឲ្យដឹង​ទៀតថា៖ «សម្រាប់​តម្លៃ​បន្ទប់ Delux ចន្លោះ​ពី ៨០ ទៅ ១០០ ដុល្លារ រីឯ​បន្ទប់ Suite តម្លៃ​ពី ១៣០ ទៅ ១៥០ ដុល្លារ»។

ក្នុង​សណ្ឋាគារ​ក៏មាន​ភោជ​នីយដ្ឋាន Salt N'Pepper Gastropub បម្រើ​ម្ហូប​បារាំង អង់គ្លេស និង​អ៊ី​តាលី​ដែល​ភ្ញៀវ​មិន​ចាំបាច់​បារម្ភពី​តម្លៃ​សេវា ឬពន្ធ​លើ​តម្លៃ​បន្ថែម​ទេ។

សណ្ឋាគារ Sun & Moon Urban Hotel ស្ថិតនៅ​កាច់​ជ្រុង​ផ្លូវ ១៣៦ និង ១៥ ម្តុំ​ផ្សារ​កណ្តាល​៕​

អត្ថបទគួរចាប់អារម្មណ៍