.jpg)
ទឹកហូររឹមៗច្រៀកតាមទីទួលដីដុះលើកម្រាលបាតស្ទឹង បីដូចជាប្រជុំកូនកោះបៃតង។ ផា លីណា
ពោធិ៍សាត់: មិនមែនមានន័យថា មកពីទឹកតិច ឬច្រើននោះទេ តែអាស្រ័យលើឱកាសដ៏ស័ក្ដិសម រមណីយដ្ឋានទំនប់ឈើតោក ក៏ដូចជាទីឋានកម្សាន្ដជាច្រើនទៀតក្នុងខេត្ដពោធិ៍សាត់ ដែលស្ទើរតែពេញមួយរដូវរៀងរាល់ឆ្នាំ រមែងខ្វះភ្ញៀវមកបំពេញន័យ បើករដូវកាលស្វាគមន៍ភ្ញៀវភ្លូកទឹកភ្លូកដីនៅរដូវបុណ្យភ្ជុំបិណ្ឌ ស្របពេលកម្ពស់ទឹកស្ទឹងគួបនឹងសម្រស់ព្រៃភ្នំ និងវត្ដមានភ្ញៀវរំលេចជាទិដ្ឋភាពស្រស់បំព្រងមួយឆ្នាំម្ដង។
ទឹកហូររឹមៗច្រៀកតាមទីទួលដីដុះលើកម្រាលបាតស្ទឹង បង្កើតបានជាទស្សនីយភាពស្រដៀងនឹងប្រជុំកោះលើដងទន្លេសេសាន។ ភ្លៀងធ្លាក់ដើមដៃបានរុញច្រានទឹកពីប្រភពភ្នំឱរ៉ាល់ក្នុងទឹកដីខេត្ដកំពង់ស្ពឺ មកដល់តំបន់ទំនប់ឈើតោក នៃខេត្ដផ្ដិលគជ់ សម្រាប់ឲ្យភ្ញៀវទេសចរជិតឆ្ងាយបានលេងសប្បាយនាចុងសប្ដាហ៍។
កម្ពស់ទឹករាក់ៗល្មមលេង អមដោយ រុក្ខជាតិរំលេចពណ៌បៃតងស្រស់ ក្រោមបរិយាកាសស្រឡះស្អាត ពិតជាស័ក្ដិសមសម្រាប់ការងូតទឹកលេងកម្សាន្ដទាំងក្មេង ទាំងចាស់។
ប៉ុន្ដែ រមណីយដ្ឋានទំនប់ឈើតោកប្រែជាស្ងាត់ជ្រងំ ស្ទើរតែគ្មានមនុស្សនឹកនា ទោះបីជាវាស្ថិតក្នុងតំបន់ទីប្រជុំជនឃុំសន្ទ្រែយ៉ាងណាក៏ដោយ។ បើក្រឡេកមើលក្យូសតូបលក់អាហារ ដែលធ្លាប់តែអ៊ូអរនារដូវបុណ្យភ្ជុំវិញ ក៏ប្រែជាតូបរខេករខាកហាក់បីដូចជាត្រូវគេបោះបង់ចោលយូរយារមកហើយ។
លោក សំ ឃីម ប្រធានមន្ទីរទេសចរណ៍ ខេត្ដពោធិ៍សាត់ បានលើកឡើងថា៖ «រមណីយដ្ឋានឈើតោក មួយថ្ងៃកាត់មួយថ្ងៃកោរ។ បើខែប្រាំង អត់ទឹកទេ ហើយបើខែវស្សា ពេលខ្លះ ទឹកឡើងខ្លាំង។ បើអត់ដល់ថ្នាក់បែកពពុះទេ នៅរដូវភ្ជុំនេះ ប្រជាពលរដ្ឋបណ្ដែតប្រទីប បណ្ដែតកន្ទោង បណ្ដែតពោងហែលលេង»។
ស្របពេលនឹងការលើកតម្កើងពីសក្ដានុពលរមណីយដ្ឋានច្រកល្អៀង ដែលខែប្រាំងមិនខ្សត់ទឹក និងខែវស្សាមិនសម្បូរជោរជន់ លោកប្រាប់ពីស្ថានភាពទំនប់ឈើតោកថា៖ «រមណីយដ្ឋាននេះមានភ្ញៀវមកលេងតែថ្ងៃបុណ្យទានទេ ជាពិសេស រដូវបុណ្យភ្ជុំបិណ្ឌ»។
អង្គុយយោលអង្រឹងក្រោមផ្ទះ ក្បែរទីកម្សាន្ដនៃរមណីយដ្ឋានទំនប់នេះ លោក ណាក់ ជាជាងចម្លាក់ឈើ បានប្រាប់ថា៖ «ក្រៅពីរដូវបុណ្យភ្ជុំបិណ្ឌ ថ្ងៃណាក៏គ្មានភ្ញៀវមកលេងដែរ។ យ៉ាងច្រើនណាស់ ថ្ងៃចុងសប្ដាហ៍ មានភ្ញៀវមកអើតឈ្ងោក ៤-៥ នាក់ប៉ុណ្ណោះ»។
ខុសពីរដូវបុណ្យ រមណីយដ្ឋាន ឈើតោក មានសភាពស្ងប់ស្ងាត់។ ផា លីណា
ក្រោមផ្ទះឈើសង់ផុតពីដីក្រាលកម្ទេចអាចម៍រណារ និងចម្លាក់អប្សរាមិនទាន់ឆ្លាក់រួចរាល់ លោក ណាក់ ប្រាប់ឲ្យដឹងទៀតថា៖ «ក្នុងចន្លោះបុណ្យកាន់បិណ្ឌ ភ្ញៀវចាប់ផ្ដើមមកលេងទំនប់ឈើតោកនេះជាហូរហែ ហើយនៅថ្ងៃភ្ជុំបិណ្ឌធំ ៣ ថ្ងៃ ចំនួនភ្ញៀវកើនភ្លូកទឹកភ្លូកដី»។
ក្រៅពីរដូវបុណ្យភ្ជុំបិណ្ឌដែលភ្ញៀវអាចកុម្ម៉ង់ម្ហូបអាហារពីអាជីវករលក់ដូរព្រោងព្រាតតាមដងទំនប់ឈើតោក លោក ណាក់ និងម្ចាស់តូបអាហារដទៃ មិនបានត្រៀមខ្លួនផ្ដល់សេវាកម្មជូនណាមួយជូនភ្ញៀវឡើយ។ ដូច្នេះ ភ្ញៀវទេសចរដែលប្រាថ្នាចង់ទៅកម្សាន្ដនៅទំនប់ឈើតោកនាឱកាសនេះ កុំភ្លេចវេចខ្ចប់អាហារផ្ទាល់ខ្លួនផង។
រមណីយដ្ឋាន ទំនប់ឈើតោក ស្ថិតក្នុងភូមិស្រែពពាយ ឃុំសន្ទ្រែ ស្រុកភ្នំក្រវាញ ដោយចូលតាមវត្ដកែវឧត្ដម ហៅវត្ដកណ្ដាល ចម្ងាយប្រមាណ ៣ គីឡូម៉ែត្រ៕
ភ្ញៀវទេសចរភ្លូកទឹកភ្លូកដី ចុះលេងទឹកទំនប់នារដូវបុណ្យភ្ជុំ។ ហ្វេសប៊ុក
តូបម្ហូបម្ហាត្រូវបានទុកចោល ទាល់តែរដូវមានភ្ញៀវទើបជួសជុល។ ផា លីណា
