ក្រុងប៊ីលីស៊ី: សណ្ឋានដីភ្នំរដិបរដុប ជម្រាលភ្នំធម្មជាតិដ៏ស្រស់ត្រកាល និងទេសភាពត្រជាក់ចិត្ដ តំបន់ដ៏ស្ងប់ស្ងាត់បំផុតនៅប្រទេសហ្ស៊កហ្ស៊ី ស្វាណេទី ខាងលើ ឬ Upper Svaneti ជាឋានសួគ៌សម្រាប់អ្នកនិយមកីឡាជិះស្គី និងត្រៀមរៀបចំព្រឹត្ដិការណ៍អូឡាំពិករដូវរងានៅថ្ងៃណាមួយ។
ជាមួយភាពល្បីល្បាញចំពោះភូមិឋានបុរាណ រំលេចជាមួយប៉មគន់ទេសភាពចំទើតលើថ្ម ទឹកធ្លាក់កណ្ដាលព្រៃ និងជ្រលងភ្នំច្រូងច្រាង តំបន់ អាស៊ីប៉ះអឺរ៉ុប ដ៏តូចនេះ ជាភូមិឋានពលរដ្ឋដ៏ដាច់ស្រយាលនិងខ្ពស់បំផុតមួយនៅអឺរ៉ុប។
ស្វាណេទី ខាងលើ ស្ថិតនៅឆ្ងាយពីពិភពខាងក្រៅអស់រយៈពេលជាច្រើនទសវត្សរ៍ តែប៉ុន្មានឆ្នាំចុងក្រោយនេះ វាបានក្លាយជាគោលដៅទេសចរណ៍ពេញនិយមសម្រាប់ភ្ញៀវមកពីអឺរ៉ុប និងតំបន់ដទៃទៀតក្នុងពិភពលោក។
ជម្រាលភ្នំស្វាណេទី ជាទីកន្លែងរដូវលេងស្គីទឹកកកមានរយៈពេលយូរពី ៦ ទៅ ៧ ខែក្នុងមួយឆ្នាំ អំណោយផលយ៉ាងពិសេសសម្រាប់អ្នកលេងស្គីទឹកកកនេះឯង។
អ៊ីហ្គ័រ លីប៉ូវ៉ូអ៊ី ជាអ្នកជិះស្គីទឹកកកមកពីអ៊ុយក្រែន បានប្រាប់ AFP លើជម្រាលភ្នំ តេតនូលឌី ថា៖ «វាជាឋានសួគ៌សម្រាប់ខ្ញុំ ហើយក្រៅពីនេះ ការចាយវាយក៏សមរម្យ វាថោកជាងនៅអឺរ៉ុបឆ្ងាយណាស់»។
ដើម្បីទាក់ទាញភ្ញៀវទេសចរ រដ្ឋាភិបាលបានចំណាយប្រាក់រាប់លានដុល្លារ បង្កើនសេវាដឹកជញ្ជូនទៅកាន់ ស្វាណេទី និងកសាងអាកាសយានដ្ឋានថ្មីមួយក្នុងភូមិ ម៉េស្ទៀ និងរីសតទំនើប។
តំបន់ ដែលត្រូវបានចុះក្នុងបញ្ជីបេតិកភណ្ឌពិភពលោកជាទីឋានដាច់ស្រយាល ដោយមានរតនសម្បត្ដិដទៃទៀត រួមទាំង ព្រះគម្ពីស្រោបស្បែកសត្វបន្សល់ទាំងពីឆ្នាំ ៨៩៧ ត្រូវបានថែរក្សាទុកក្នុងសារមន្ទីរ។
អ្នកស្រី ម៉េកហ្គា សានីគីដ អ្នកនាំពាក្យឲ្យក្រុមហ៊ុនអភិវឌ្ឍន៍រីសតភ្នំហ្ស៊កហ្ស៊ី បាននិយាយថា រយៈពេល ៥ ឆ្នាំចុងក្រោយនេះ រដ្ឋាភិបាលបានទទួលភ្ញៀវបរទេសកាន់តែច្រើនឡើងៗ ខណៈតម្លៃកញ្ចប់ទេសចរណ៍ជិះស្គីនៅស្វ៊ីសនារដូវកាលថោក ក៏ជិត ៤០០ ដុល្លារ រីឯហ្ស៊កហ្ស៊ីតែត្រឹម ៨០ ដុល្លារ។
អ្នកស្រី បានប្រាប់ AFP ថា៖ «ចំណាប់អារម្មណ៍អន្ដរជាតិចំពោះរីសតស្គីទឹកកកហ្ស៊កហ្ស៊ី ដូចជា ស្វាណេទីនេះ កំពុងតែស្វាគមន៍ភ្ញៀវច្រើនសន្ធឹក។
តំបន់ស្វាណេទី មានទីលានជិះស្គីទឹកកកប្រវែង ៣០ គីឡូម៉ែត្រ ពិតជាស័ក្ដិសមទាំងអ្នកថ្មោងថ្មី និងការប្រកួតប្រជែងអន្ដរជាតិ»៕